foto: primeminister.kz
«Qazaqstan-Túrikmenstan» shekarasyna tikeleı shyǵatyn termınaldyń múmkindigi mol. Bul – 8 shaqyrym temirjol men óziniń jyljymaly quramy bar perspektıvaly logıstıka haby. Atalǵan termınal bir mezgilde 100 tonna astyq saqtap, kúnine 500 vagonǵa deıin qabyldaı alady. Al bolashaqta munyń qýaty kúsheıe túspek.
Sondaı-aq munda táýligine 320 tonna un men 80 tonna kebek óndirýge múmkindik beretin dıirmen kesheni bar. Qazir onda jańǵyrtý jumystary júrgizilip jatyr. Odan soń keshende jalpy qýaty táýligine 400 tonna un shyǵaratyn eki jeli iske qosylady. Al qurama jemniń táýliktik qýaty 240 tonnaǵa deıin ulǵaıady.
Astyq termınalynda Aýǵanstan delegasııasynyń ókilderi, Azyq-túlik korporasııasynyń basshysy jáne «Beıneý» termınalynyń basshylyǵy termınal arqyly astyq jetkizý perspektıvasyn talqylady. Atap aıtqanda, elimizdegi bıdaıdy termınal arqyly Aýǵanstan men Pákistanǵa eksporttaýdyń negizgi jáne turaqty baǵytyn uıymdastyrý múmkindigi qarastyrylyp jatyr.
Mundaı jospardy iske asyrý úshin shekara mańyndaǵy aýmaqtarda qosymsha qoıma, úı-jaılaryn salý jáne Túrikmenstan aýmaǵy arqyly logıstıkany jolǵa qoıý mańyzdy. Ári múddeli taraptar otandyq astyqty jetkizýdiń jańa eksporttyq baǵytyn qurýǵa nıet tanytyp otyr.
