Foto: Qazaq ulttyq qyzdar pedagogıkalyq ýnıversıteti
Qyzdar beınelengen monýmentaldy-sándik paneldi Qazaq ulttyq qyzdar pedagogıkalyq ýnıversıteti ujymy, QR Sýretshiler Odaǵy jáne Moldahmet Kenbaevtyń uly birlese saqtap qalmaq. Ýnıversıtet rektory Gúlmıra Qanaı joba demeýshilerine qoldaý kórsetkeni úshin alǵysyn bildirip, qalanyń mádenı murasy úshin osyndaı artefaktilerdi saqtaýdyń mańyzdylyǵyn atap ótti.
«Ashana ǵımaratynyń buzylýyna baılanysty ýnıversıtet panelderdi qalpyna keltirýdi jáne jańa orynǵa qaıta ornatýdy josparlap otyr, sonyń arqasynda ony qala turǵyndary da kóre alady. Mozaıka tek kórkemdik qana emes, sonymen qatar tarıhı qundylyqqa ıe. Moldahmet Kenbaev pen Nıkolaı Sıvchınskıı kóptegen biregeı panelder men vıtrajdar jasap, Qazaqstannyń monýmentaldy ónerinde eleýli iz qaldyrdy. Olardyń qazaq eposyn beınelegen shyǵarmalary búginde qundy mádenı jádigerlerge aınaldy. Alaıda olardyń kópshiligi joǵalyp ketti, bizge qalǵan shyǵarmalardy saqtap qalýymyz kerek», dedi QyzPU rektory.
Qazaq KSR Halyq sýretshisi Moldahmet Kenbaevtyń uly Alpamys Kenbaev ta sýretshi-monýmentalıst, mozaıkany qalpyna keltirý prosesine belsendi atsalysyp jatyr. Sýretshi ónerdi bolashaq urpaq úshin saqtaýdyń mańyzdylyǵyn atap ótti jáne panelderdi qalpyna keltirýge, jańa jerge ornatýǵa kómektesýge daıyn ekenin jetkizdi. QR Sýretshiler odaǵy da mozaıkany qalpyna keltirý úshin jobany qoldaýǵa daıyn.
«Bul mozaıkalyq panel – Qazaq ulttyq qyzdar pedagogıkalyq ýnıversıtetiniń tarıhy. Al tarıhty umytpaýymyz kerek. Bul paneldiń janynan ártúrli kezeńde qanshama stýdent, qyzmetkerler ótti. Ýnıversıtet basshylyǵyna Qazaqstan tarıhyn túsinetin adam kelgenine óte qýanyshtymyn. Jóndeý jumystary júrgizilgende mozaıkalyq panelderdiń ústinen qabyrǵa sylanǵany óte ókinishti. Bul mozaıkalyq panel – tutas bir dáýir. Tarıhty umytpaý jáne stýdentterdiń Otanǵa degen mahabbatyn oıatý, olarǵa sulýlyqty kórýdi úıretý óte mańyzdy. Olar bul súıispenshilikti oqýshylaryna da jetkizýi tıis. Qazir mozaıkany qalpyna keltirý boıynsha aýqymdy jumys kútip tur, smaltanyń tús shemasyn barynsha tańdaý kerek. Mozaıkany bólshekteý kezinde keıbir smalttar túsip ketedi, olardy jınap, panelge qaıta bekitý syndy jumystar bar. Plıta jarylyp ketýi de múmkin, ony da qalpyna keltirý shart. Mozaıka qajyrly eńbekti talap etedi. Oǵan smalta, kafel, shyny sııaqty materıaldar kerek. Keıbir materıaldar ózimde saqtalǵan. Munyń bári materıaldyń túsine baılanysty. Máskeýden nemese Sankt-Peterbýrgten tapsyrys berýge týra keledi», dedi Alpamys Kenbaev.
