Foto: istockphoto.com
Qarajat Oral qalasyndaǵy eki jylý magıstralin rekonstrýksııalaýǵa bólinedi. Olar táýekeldiń «qyzyl aımaǵyndaǵy» 19 jylý kóziniń tizbesine kiredi. Memleket basshysy Úkimetke olardy basym tártippen jańǵyrtýdy tapsyrǵan edi.
Premer-mınıstr bıyl aqpan aıynda óńirge jumys sapary barysynda ákimdikke kóp kidirtpeı rekonstrýksııalaýdy talap etetin jylýmen qamtý nysandary boıynsha qujattama daıyndaýdy tapsyrýy boıynsha TM-5 jáne TM-2 jylý magıstraldary boıynsha jobalar daıyndalǵan.
Oral qalasyndaǵy uzyndyǵy 1,6 shaqyrym bolatyn TM-5 jylý magıstrali 1987 jyly paıdalanýǵa berilgen, onyń tozýy 80%-dy quraıdy. Jóndeý jumystaryna 574 mln teńgege jýyq qarjy bólindi. Ekinshi joba 4 shaqyrym TM-2 jylý magıstralin rekonstrýksııalaýdy qamtıdy, onyń tozý deńgeıi – 75%. Jobany 4,3 mlrd teńge kóleminde qarjylandyrý kózdelgen.
Atalǵan eki ýchaskede de kúrdeli jóndeý buryn-sońdy júrgizilmegen.
Bólingen qarajat 106 kópqabatty úı men 20-ǵa jýyq áleýmettik nysandy, ıaǵnı 24 myń abonentti, balabaqshalar, mektepter, kolledjder, aýrýhanalar men emhanalardy úzdiksiz jylýmen qamtamasyz etýge múmkindik bermek.
