Foto: Aqorda
«Qaraǵandy ferroqorytpa zaýytyndaǵy qaıǵyly oqıǵa saldarynan adamdardyń qaıtys bolǵany týraly sýyt habardy tereń kúızelispen qabyldadym. Qaza tapqandardyń otbasylary men jaqyndaryna orny tolmas qaıǵylaryna ortaqtasyp, kóńil aıtamyn. Oqıǵanyń sebebin anyqtaý meniń jeke baqylaýymda. Qaza tapqandardyń otbasyna barlyq qajetti qoldaý kórsetiledi», dedi Oljas Bektenov.
Bektenovtyń aıtýynsha, Qaraǵandy ferroqorytpa zaýytynda bolǵan apattyń sebepterin anyqtaý maqsatynda arnaıy komıssııa qurylyp, jumys istep jatyr.
Eńbek jáne halyqty áleýmettik qorǵaý mınıstrliginiń málimetinshe, balalary bar qaza tapqandardyń otbasyna asyraýshysynan aıyrylý jaǵdaıyna baılanysty respýblıkalyq bıýdjetten járdemaqy jáne MÁSQ-tan áleýmettik tólemder taǵaıyndalady. Sondaı-aq qaza tapqandardyń otbasy saqtandyrý uıymynan tólemder jáne BJZQ-dan jerleýge birjolǵy tólem alady.
Sonymen qatar jumys berýshi kompanııa jerleý rásiminiń barlyq shyǵynyn, sondaı-aq kelesi mindettemelerdi:
- qaza tapqan qyzmetkerlerdiń otbasyna 10 jyldyq jalaqy mólsherinde birjolǵy tólem berýdi;
- qaza tapqandar men zardap shekkenderdiń otbasylarynyń turǵyn úı jaǵdaıyn jaqsartýǵa kómektesýdi;
- qaza tapqan qyzmetkerlerdiń otbasy músheleriniń barlyq nesıesin tolyq óteýdi óz moınyna aldy.
Aıta keteıik, Qaraǵandy ferroqorytpa zaýytyndaǵy apat saldarynan kóz jumǵandar sany tórt adamǵa jetti.
Eske salaıyq, 20 shildede № 1 zaýyt peshinde kenetten jalyn shyǵyp, saldarynan kásiporynnyń 8 qyzmetkeri zardap shekken edi.
