О́tken jyldyń mamyr aıynda el Prezıdenti Qasym-Jomart Toqaevtyń Qytaıǵa sapary kezinde birneshe qujatqa qol qoıylǵan edi. Qazirgi kezde naqty júzege asa bastaǵan jel energııasyn óndirýge baǵyttalǵan jobalar da – sol sapardyń jemisi.
Qazan aıynda Ulytaý oblysy ákimdiginde otandyq «TehnoGrýpServıs» JShS jáne qytaılyq «Sinohydro Engineering Bureau Machinery and Equipment Co.Ltd» kompanııalarynyń arasynda memorandýmǵa qol qoıyldy.
Memorandým boıynsha Jańaarqa aýdanynda jel energetıkalyq stansasyn salý jáne Jezqazǵan qalasynda sol stansalarǵa qajetti munaralardyń metall konstrýksııalaryn óndirý kózdelgen edi. Jobany iske asyrý úshin Jańaarqa aýdanynda 20 myń gektar, al Jezqazǵandaǵy zaýyt qurylysy úshin 20 gektar jer telimi bólindi. Memorandýmǵa qol qoıylǵannan keıin Jezqazǵanda salynatyn zaýyttyń orny belgilenip, saltanatty jaǵdaıda kapsýla salyndy.
Bul ınvestısııalyq 2 jobanyń jalpy quny – 489 mlrd teńge. Stansa jylyna 3,4 mlrd kVt/saǵ.
energııa óndiretin bolady. Bul oblystyń qajetin tolyqtaı óteıdi.
Al jel stansalaryna qajetti munaralar shyǵaratyn zaýyt jylyna qýattylyǵy 500-600 megavatt quraıtyn 100 munara shyǵarady. Qos joba tolyq paıdalanýǵa berilgende eń kemi 300 turaqty jumys orny paıda bolady.
Bulardan tys qazirgi kezde Jezqazǵan qalasynyń mańynda quny 24,5 mlrd teńgeni quraıtyn taǵy bir ınvestısııalyq joba qolǵa alyndy. Qýaty 100 MVt jel elektr stansasynyń qurylysyn qytaılyq kompanııamen birge «Mezgilder Qushteri» JShS atqaryp, jobany belgilengen ýaqytynda paıdalanýǵa berýdi qamtamasyz etýdi maqsat etip otyr. Negizgi stansa Jezqazǵanda, al qosalqy stansa Sátbaev qalasynda ornalasady. Jel stansasy paıdalanýǵa berilgen kezde munda 11 adam turaqty jumyspen qamtylady.
Jasyl energııa týraly az aıtylǵan joq. «Qulaq estigendi kóz kóredi» demekshi, elimizde, sonyń ishinde Ulytaý oblysynda balamaly energııa kózderin paıdalanýǵa kóshý qazirdiń ózinde bastaldy. Buǵan – joǵarydaǵy júzege asyrylyp jatqan jobalar aıqyn dálel.
«Jasyl energııanyń tıimdiligi kóp. Birinshiden, ekologııaǵa zııan keltirmeıdi. Ekinshiden, arzan energııaǵa qol jetkizetin bolamyz.Úshinshiden, artyq energııany kórshi oblystarǵa satýǵa da múmkindik bar. Al jel stansalaryna qajetti qurylǵylarǵa, ıaǵnı munaralarǵa suranys jaqyn shetelderden de túsip qalýy múmkin. Munyń bári oblys ekonomıkasyn damytýǵa óziniń oń áserin tıgizetin bolady», deıdi «Ulytaý oblysynyń kásipkerlik jáne ónerkásip basqarmasy» MM basshysy Ǵazız Tóleýov.
Ýaqyt árqashan óziniń jańalyǵyn usynatyny ras. Jasyl energııa da – sonyń biri. Endeshe, ǵylymnyń, tehnologııanyń jetistikteriniń nátıjesi sanalatyn jańalyqtardyń ıgiligin kóre bilgenge ne jetsin.
