Áskerı keńes otyrysynyń kún tártibinde Ulttyq ulannyń 2024 jyldyń birinshi jartyjyldyǵyndaǵy qyzmettik-jaýyngerlik qyzmetiniń jaı-kúıi jáne jańadan qurylǵan bólimshelerdi jasaqtaý baǵytyndaǵy jumystyń nátıjeleri qaraldy. Otyrysty ashqan E.Sádenov Ulttyq ulan qoǵamdyq qaýipsizdik pen quqyqtyq tártipti qamtamasyz etýde sheshýshi ról atqaratynyn atap ótti. Sonymen qatar mınıstr quqyqtyq tártip áskerlerine qatysty ózekti máselelerdi, sonyń ishinde ofıserler men serjanttar quramyn jasaqtaý máselesine toqtaldy.
– Árbir komandır bólimshelerdiń qyzmettik-jaýyngerlik jumysyn qamtamasyz etý úshin bilikti kadrlardy irikteýmen aınalysýǵa tıis. Bas shtabqa, áskerı bólimderdiń komandırleri men orynbasarlaryna bos laýazymdardy shuǵyl túrde jasaqtaýdy tapsyramyn. Jeke quram úshin barlyq qajetti jaǵdaıdy jasaý qajet. Jergilikti atqarýshy organdarmen, Qorǵanys mınıstrliginiń Qorǵanys isteri jónindegi departamentterimen jáne bólimderimen birlesip osy baǵyttaǵy jumysty jandandyrý qajet, – dedi IIM basshysy.
Ishki ister mınıstriniń orynbasary – Ulttyq ulannyń Bas qolbasshysy, general-leıtenant Erkin Botaqanov birinshi jartyjyldyqta Ulttyq ulanǵa júktelgen barlyq mindet tolyq kólemde oryndalǵanyn atap ótti.
– Quqyqtyq tártip áskerleriniń shtattaryna Aqtaý, Atyraý, Qyzylorda, Oral, Qostanaı qalalarynda jedel maqsattaǵy bes batalon engizildi. Mamyr aıynda el Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaevtyń qatysýymen avıasııalyq baza saltanatty túrde ashyldy. 3 myńnan astam áskerı qyzmetshi, 160-tan astam avtokólik jáne arnaıy tehnıka, sondaı-aq 7 avıasııa kóligi tabıǵı sıpattaǵy TJ rejimi jaǵdaıynda sý tasqynyn joıýǵa tartyldy. Jeke quramnyń jalpy kúshimen 4 myńnan astam adam, 600 tonna júk jáne 130 tonna gýmanıtarlyq kómek tasymaldandy, 5 myńnan astam azamat evakýasııalandy, – dedi ol.
Otyrys barysynda quqyqtyq tártip áskerleriniń qyzmettik-jaýyngerlik jumysynyń nátıjesi týraly Ulttyq ulan Bas qolbasshysynyń birinshi orynbasary – Bas shtab bastyǵy, general-maıor Qaırat Aqtanov baıandama jasady. Áskerıler 80-nen astam birlesken oqý-jattyǵýǵa, onyń ishinde vedomstvoaralyq toptar quramyndaǵy daǵdarystyq jaǵdaılarǵa den qoıý jónindegi keshendi oqý-jattyǵýlarǵa qatysqany atap ótildi.
Quqyqtyq tártip áskerleriniń bólimsheleri ózara is-qımyl jasaıtyn organdarmen birlesip jyl basynda qoǵamdyq tártipti kúsheıtýge, tabıǵı sıpattaǵy tótenshe jaǵdaılardyń saldaryn joıýǵa qatysty. Shanhaı yntymaqtastyq uıymynyń halyqaralyq sammıtin ótkizý kezinde Ulttyq ulannyń jeke quramy ishki ister organdarynyń qyzmetkerlerimen birlesip qala kóshelerinde táýlik boıy kezekshilik atqardy.
Otyrysta óńirlik qolbasshylyqtar qolbasshylarynyń «Baǵynysty áskerı bólimder men bólimshelerdegi qyzmettik-jaýyngerlik qyzmetti uıymdastyrý jónindegi isterdiń jaǵdaıy týraly» taqyrybyndaǵy esepteri, sondaı-aq Ulttyq ulan Bas qolbasshysynyń orynbasary, general-maıor Qaırat Úmbetovtiń «Birinshi jartyjyldyqtaǵy áskerı tártiptiń, zańdylyq pen quqyqtyq tártiptiń jaı-kúıi týraly» taqyrybyndaǵy baıandamasy tyńdaldy. Budan bólek, kadrlar jáne áskerı bilim basqarmasynyń bastyǵy, general-maıor Nurbol Mirtaev «Jańadan engizilgen bólimshelerdi jınaqtaýǵa qatysty jumys nátıjeleri týraly» baıandama jasady.
Aıta keteıik, áskerı keńes otyrysyn qorytyndylaı kele Ishki ister mınıstri áskerdiń jaýyngerlik daıyndyǵy men jaýyngerlik qabiletine erekshe nazar aýdardy.
– Áskerlerdi daıarlaý – jeke quram arasyndaǵy áskerı tártipke negizdelgen jaýyngerlik ázirliktiń negizi. Sondyqtan bólimshe komandırinen bastap ásker qolbasshysyna deıin barlyǵy áskerı qyzmetshilerdi tárbıeleýmen, moraldyq-psıhologııalyq jaı-kúıimen aınalysyp, áskerı qyzmettiń tartymdylyǵy men bedelin arttyrýǵa tıis, – dep túıindedi Erjan Sádenov.
