Aýdan ákimi Qanat Ázmuhanovtyń aıtýynsha, sý tasqynyna qarsy taıtalas Mııaly aýylynda 31 naýryzda bastalǵan. Oıyl ózeniniń sýy buryn-sońdy bolmaǵan qarqynmen arnasynan asyp, aýdan ortalyǵyna qaýip tóndirgen. Aýyl turǵyndary judyryqtaı jumylyp, bóget turǵyzyp júrgende tasqyn sý «Mııaly-Saǵyz» tasjolyn shaıyp ketken.
«Muqyr aýylynan jınalǵan qapshyqtar jetkizilip, atyraýlyq, maqattyq, kórshiles aýyldardaǵy jáne «Teńiz» kenishinde jumys istep júrgen eriktiler kómekke keldi. Naǵyz qysyltaıań shaqta oblystyq tótenshe jaǵdaı departamentinen 3 avtokólikpen 80 qutqarýshy der kezinde jetkizildi. Aýdandaǵy mekemelerdiń 275 qyzmetkeri, 48 polıseı, tótenshe jaǵdaılar salasynyń 110 qyzmetkeriniń,
20-dan asa arnaıy tehnıkanyń kómegimen aýyldy tasqyn sýdan qorǵap qaldyq», deıdi Q.Ázmuhanov.
Ákimniń deregine súıensek, Oıyl ózeniniń arnasynan asqan tasqyn sý 10 kún boıy aýdannyń eldi mekenderine qaýip tóndirip turǵan.
Turǵyndar osynsha kún úreılenip júrdi. Osy kezeńde analar men balalar, egde jastaǵy 570 turǵyn Atyraý qalasyna, 819 turǵyn evakýasııalyq pýnktterge jetkizilgen. Aýdan rezervindegi tehnıkalarǵa qosymsha oblystyq shtabtan, tótenshe jaǵdaılar departamentinen, sonymen qatar elimizdiń túkpir-túkpirinen eriktilerdiń demeýshiligimen qajetti qural-jabdyqtar ákelingen. Qapshyqtarǵa qum toltyrylyp, burynǵy 45 shaqyrymǵa qosymsha 28 shaqyrym bóget qosa soǵyldy. Qyzylqoǵa aýdanynan tasqyn sýmen kúreske quqyq qorǵaý jáne tótenshe jaǵdaılar salasynyń qyzmetkerleri men áskerılerden 3 myńnan asa erikti jumyldy. Arnaıy 89 tehnıka tartyldy.
«Apat aıtyp kelmeıdi» degendeı, tasqyn sýdyń saldarynan shyǵynǵa batqandar bar. Qyzylqoǵa aýdandyq ákimdiginiń málimetine súıensek, tabıǵı sıpattaǵy tótenshe jaǵdaıdan zardap shekkenderge keltirilgen zııandy baǵalaý jáne óteý jónindegi komıssııaǵa mal shyǵynyna qatysty 70 ótinish túsipti. Komıssııanyń qorytyndysyna sáıkes 58 sharýa qojalyǵy men jeke turǵyndardyń ólgen 191 maly úshin bıýdjetten jáne ózge kózderden 61 mln 772 myń 062 teńge ótemaqy tólendi.
Sondaı-aq arnaıy qurylǵan komıssııaǵa sý tasqynynan búlingen 31 úıdiń ıesi ótinish bergen. Onyń ishinde 7 turǵyn úıdiń qujaty bolmaǵan. Sol sebepten bul úılerdiń ıeleriniń ótinishi keri qaıtaryldy. Al 24 ótinish qanaǵattandyrylyp otyr.
Aýdan ákimi Q.Ázmuhanov tasqynnan zardap shekken turǵyndardyń ótinishine oraı shyǵyndy baǵalaýdy óz baqylaýyna aldy. Shyǵyndy esepteý úshin tehnıkalyq baǵalaýshylar shaqyryldy. «Baǵalaýshylardyń tehnıkalyq qorytyndysyna sáıkes 6 turǵyn úıge jóndeý jumystaryn júrgizý qajettigi anyqtaldy. Al 18 turǵyn úı apatty dep tanyldy. Aýdan ákimi búlingen turǵyn úılerge tehnıkalyq baǵalaý júrgizgen mamandardyń qorytyndy hattamalaryn turǵyndarǵa tanystyrdy. Tórt turǵyn úı salyp berýdi surady. Baǵalaý nátıjesimen 20 turǵynǵa búlingen úıi úshin ótemaqyǵa qarjy bólinip, tolyq óteldi», dep málimdedi aýdandyq ákimdikten.
Qazir Qyzylqoǵa aýdanyndaǵy Qonystaný aýylynda 3 turǵyn úıdiń qurylysy júrip jatyr. Al Mııaly aýylynda 1 turǵyn úıdiń qurylysyn júrgizý bastaldy.
Atyraý oblysy
