Atyraýda úsh basqarmanyń basshysy taǵaıyndaldy

ATYRAÝ. 22 qańtar. Atyraý oblysynyń ákimi Baqtyqoja Izmuhambetovtiń ókimderimen úsh basqarmanyń jańa basshylary taǵaıyndaldy. Bul týraly egemen.kz tilshisi habarlady. Jerdiń paıdalanýy men qorǵalýyn baqylaý basqarmasynyń basshysy bolyp Ǵıbrat Súleımenov taǵaıyndaldy. Uzaq jyldar prokýratýra jáne qalalyq, oblystyq ákimdikte túrli laýazymdy qyzmetter atqarǵan Ǵ.Súleımenov eki joǵary oqý ornyn bitirgen. Buǵan deıin Jer resýrstaryn basqarý agentiginiń Atyraý oblysy boıynsha aýmaqtyq jer ınspeksııasyna basshylyq jasaǵan. Al memlekettik sáýlet-qurylys baqylaýy basqarmasynyń basshysy laýazymy Qýanysh Muhametqalıulyna júktelip otyr. Ol Qazaq memlekettik sáýlet qurylys akademııasy men Qazaqstan ınjenerlik-pedagogıkalyq halyqtar dostyǵy ýnıversıtetiniń túlegi. 1999 jyldan beri qurylys salasyndaǵy káspioryndarda jumys istep, Oral qalalyq qurylys bólimi bastyǵynyń orynbasary, Batys Qazaqstan oblystyq qurylys basqarmasynyń bastyǵy qyzmetterin atqarǵan. 2013 jyldan beri Atyraý oblystyq memlekettik sáýlet-qurylys baqylaý jáne lısenzııalaý departamenti basshysynyń mindetin atqarýshy laýazymynda bolǵan. Atyraýda da buǵan deıin oblystyq memlekettik satyp alý basqarmasy qurylǵan bolatyn. Jańa qurylym basshysynyń mindetin atqarýǵa Jumabaı Qaraǵaev taǵaıyndaldy. Ol M.Gýbkın atyndaǵy munaı jáne gaz memlekettik akademııasyn taý-ken ınjeneri mamandyǵy boıynsha bitirgen. Tehnıka ǵylymdarynyń kandıdaty. Ár jyldary túrli kásiporyndarda, Atyraý qalalyq jáne oblystyq ákimdikterde jumys jasady. Osy kezge deıin Atyraý qalasy ákiminiń orynbasary laýazymyn atqardy. Joldasbek Shópeǵul. Derek: «Atyraý» gazeti. Sýret: ria.ru.