Kýrchatovta «Mereıli otbasy» baıqaýynyń jeńimpazdary daýys berdi

О́SKEMEN. 26 sáýir. Byltyr elimizde ótken jalpyhalyqtyq «Mereıli otbasy» baıqaýynyń Shyǵys Qazaqstan oblysy boıynsha jeńimpazy jáne respýblıkalyq kezeńiniń qatysýshylary atanǵan Panıskııler otbasy da prezıdenttik saılaýda óz tańdaýlaryn jasady. Bul týraly egemen.kz tilshisi habarlady. Andreı men Dınara Panıskııler Qazaqstan Respýblıkasy Prezıdentin saılaý kúni otbasylyq mereke ispetti bolǵanyn aıtady. Olar erteńgilik balalaryn kıindirip alyp, ózderi turatyn Kýrchatov qalasynyń №294 saılaý ýchaskesinde daýys berdi. «Men tórt balanyń anasymyn. Shúkir, janymda jaqsy kóretin jarym men balalarym, turaqty jumysym men eńbekaqym bar. Kúıeýimniń ulty – orys, ózim qazaqpyn. Alaıda, biz úshin ulttyq erekshelikterimiz kedergi bolǵan emes. О́ıtkeni, biz – qazaqstandyqpyz! Biz otbasylyq merekelerimizde ultymyzdyń dástúri men saltyn qurmettep, balalarymyzǵa úıretip otyramyz. Sondyqtan, búgingi qol jetkizgen tabystarymyz qoǵamymyzdaǵy dostyq, beıbitshilik pen kelisimsiz júzege aspaǵan bolar edi dep oılaımyn. Kúıeýimdi áýletimizdiń basshysy retinde syılaımyn. О́zim sheksiz jaqsy kóretin balalarymnyń keleshegine úlken úmit artamyn. Elimizdiń qazirgi jan-jaqty júrgizip otyrǵan saıasaty bizdiń bolashaqqa degen berik senimimizdi qalyptastyrdy. Sol sebepti otbasymyzben saılaý ýchaskesine kelip, óz tańdaýymyzdy jasadyq», – deıdi Dınara. Al Andreı saılaý ýchaskesine saılaýshylardyń mol jınalǵanyn, olardyń arasynda kórshileri, tanystary, dostary men birge jumys isteıtin áriptesteri bar ekenin jetkizdi. «Meniń oıymsha, Kýrchatov turǵyndary kúlli qazaqstandyqtar sııaqty saılaýǵa belsendi túrde qatysty. Elimiz úshin ár daýys mańyzdy. Biz de elimizdiń, balalarymyzdyń bolashaǵyn tańdaý jolynda daýys berdik», – dedi ol. Dýman Anash, Derek, sýret: egemen.kz.