Shyǵys Qazaqstanda sheteldik baqylaýshylar saılaýǵa oń baǵa berdi

О́SKEMEN. 26 sáýir. Elimiz úshin saıası mańyzy zor naýqannyń ótý barysyn baqylaǵan sheteldik táýelsiz baqylaýshylar saılaý barysynda eshqandaı zańbuzýshylyqtardyń oryn almaǵandyǵyn málimdedi. Bul týraly egemen.kz tilshisi habarlady. Sergeı Pchelıakov – Reseıdiń Altaı ólkesinen Shyǵys óńirindegi saılaý barysyn baqylaýǵa kelgen delegasııa quramyndaǵy 27 adamnyń biri. Ol áriptesterimen birge О́skemen qalasyndaǵy birqatar saılaý ýchaskelerinde túske deıin qyzmet atqarsa, kúnniń ekinshi bóliginde oblystyń Glýbokoe aýdanyna arnaıy shyqty. Rýbsovsk qalasy basshysynyń orynbasary retinde Qazaqstandaǵy saılaýda birqatar erekshelikterdi baıqaǵanyn jetkizdi. «Men mundaı jaýapty naýqanǵa baqylaýshy retinde birinshi ret qatysyp otyrmyn. Al áriptesterimniń arasynda 3-4 márte qatysqandar bar. Biz О́skemen qalasyna 24 sáýirde keldik. Sodan beri birneshe toptarǵa bólinip, jumys isteýdemiz. Bir tobymyz 25 sáýirde Zyrıan aýdanyna attanyp ketti. Búgin sol jaqta jumys istedi. Saılaý ýchaskeleri ashyla salysymen О́skemen qalasyndaǵy bes saılaý ýchaskesinde boldyq. Qazir №82 jáne №83 saılaý ýchaskelerinde jumys isteýdemiz. Baıqaǵanymyz, jergilikti turǵyndar óte saýatty eken. Saılaý týraly jaqsy habardar etilgen, tıisti sharalar joǵary deńgeıde oıdaǵydaı uıymdastyrylǵanyn atap ótkim keledi. Ýchaskeler ashylmaı turyp kelgen saılaýshylardy baıqadyq. Túski saǵat 11 jarymǵa deıin ár ýchaskelerge saılaýshylardyń 50 paıyzdan astamy kelip, daýys berip úlgerdi. Baqylaýshylar tarapynan eshqandaı zańbuzýshylyqtar tirkelgen joq», – deıdi táýelsiz baqylaýshy. Sergeı Vıktorovıchtiń aıtýynsha, saılaý barysynda jastardyń belsendiligi erekshe nazar aýdartqan. Máselen, joǵary oqý ornynda ornalasqan №74 saılaý ýchaskesinde kúnniń alǵashqy jartysynda stýdent jastardyń basym bóligi óz tańdaýlaryn jasap úlgerdi. Táýelsiz baqylaýshylar toby bolǵan №82 jáne №83 saılaý ýchaskeleri О́skemendegi Ahmet Baıtursynov atyndaǵy orta mekteptiń ǵımaratynda ornalasqan. Munda negizinen Almaty, Mıhaelıs kósheleriniń turǵyndary kelip daýys berdi. Aldyńǵysynda túski on bir jarymǵa deıin barlyq 848 saılaýshynyń 466-sy kelip tańdaý jasasa (55 paıyzy), sońǵysynda 1 029 saılaýshynyń 537-si kelip úlgergen. «Daýys berý tańerteńgi 7-de bastaldy. Alǵash bolyp 18 jastaǵy osy mekteptiń 11-synyp oqýshysy, «Altyn belgiden» úmitker Saǵynysh Baıanbekova tuńǵysh ret óz tańdaýyn jasady. Odan soń 74 jastaǵy qala turǵyny Batıh Ábsadyqov keldi. Olar belsendilikteri úshin estelik syılyqtarmen marapattaldy, – deıdi №82 saılaý ýchaskesiniń tóraıymy Qanıpa Muqysheva. Bul jerdegi daýys berý barysyn baqylaǵan «Nur Otan» partııasynyń О́skemen qalalyq fılıalynyń qoǵamdyq baqylaýshysy Kúlsara Dákebaeva da saılaý barysy oıdaǵydaı júrgenin, zańbuzýshylyqtar oryn almaǵanyn málimdedi. «Osy aýdanda 15 jyldan beri turamyn. Birneshe saılaýlarǵa qatystym. Bári oıdaǵydaı ótti. Jármeńke, konserttik baǵdarlamalar jaqsy uıymdastyrylǵan eken. Úıimizge úsh márte kelip saılaý týraly aıtyp ketti. Tizimnen aty-jónimizdi esh qıyndyqsyz taptyq, otbasymyzben daýys berdik», – deıdi qala turǵyny Nadejda Paýytova. Dýman Anash, Derek: egemen.kz. Sýret: Lıýdmıla Malko.