«Krendeldiń» ónimin bilmeıtin pavlodarlyq joq. Dál osy jerde san alýan tátti, dámdi toqashtar, tort, baýyrsaq, samsa, quımaq, jartylaı pisken jáne daıyn, muzdatylǵan ónimder pisiriletinin aýyl-qaladaǵy jurttyń bári biledi. Týǵan kún, ártúrli mereke-meıramdarda dástúrli túrde «Krendel» táttileri dastarqanda turady.
Kompanııa otandyq naryqta 29 jyldan beri qanatyn keńge jaıyp kele jatyr. Búginde onyń ónim pisirý sehtary ǵana emes, kofehana, dúken men meıramhana jelileri tabysty jumys istep tur. Kásiporynda shamamen 600 qyzmetker eńbek etedi. Kún saıyn sehtarda 5-7 tonna ónim daıyndalyp, birden saýda sórelerine jóneltiledi.
О́nimderi elimizdiń barlyq qalasynda, sondaı-aq Qytaı men Reseı elderinde tanymal. Mundaǵy saýatty damý men basqarý formasy búginde kóp kompanııa úshin úlgi bolyp otyrǵany da málim. Kásiporynnyń qazaq halqynyń qonaqjaılylyq qasıetin gastronomııalyq mádenıet turǵysynan arttyrýǵa da asa mán berip otyrǵany baıqalady.
Saýda-sattyq salasy men menedjerliktiń qupııasyn ábden meńgerip úlgergen Mádına Toqjanqyzy qyzmet mansabyn qarapaıym býhgalter bolyp bastaǵan. Keıin aýyl sharýashylyǵynda, sonyń ishinde asyl tuqymdy mal ósirý isimen aınalysqan. Biraz jyldar beton, temir-beton ónimderin óndirý, qurylys materıaldaryn satý, sement pen ınertti materıaldar tasymalyn, qurylys-montajdaý jumystaryn uıymdastyrýmen shuǵyldanypty. Al 2020 jyldan beri «Krendel» kompanııasyna qosylyp, kásiporynnyń jumysy boıynsha sheshimder shyǵarýǵa atsalysa bastaǵan. Arada tórt aı ótkende ol «Krendel» JShS atqarýshy dırektory, odan kóp uzamaı bas dırektory qyzmetin atqara bastady. Osylaısha, otandyq naryqta tátti ónimderimen tanymal kompanııanyń saýda-sattyq boıynsha damý strategııasyn ázirlep, ony batyl túrde iske asyra bastady. Qazirgi ýaqytta munda 1000-nan astam ataýly ónim bar. Olardyń barlyǵy tutynýshylar tarapynan suranysqa ıe.
«Bizdiń salada, sonyń ishinde Pavlodar qalasynda básekelestik joǵary deńgeıde ósip keledi. «Krendel» tek aımaǵymyzda ǵana emes, elimizdiń aýmaǵynda táttiler pisirýden nómir birinshi kompanııa bolyp otyrǵany aıqyn. Bul deńgeıden túspeý úshin bizge naryqtaǵy túrli qıyndyqtan jol taýyp shyǵýǵa týra keledi. Jumystaǵy basty qaǵıdam – óz isińniń patrıoty bolý. Súıip istegen eńbek qana jetistikke ákeledi. Ekinshiden, urpaǵymyz deni saý bolyp jetilýi úshin olar sapaly ári tabıǵı taǵamdy iship-jeýi kerek. Bul turǵyda bizdiń kompanııanyń tutynýshylar aldyndaǵy ary taza. Tehnologterimizden únemi ónimderimizdiń tabıǵı ári qunarly bolýyn talap etemin. Úshinshiden, tutynýshylardyń satyp alý múmkindigin eskerý. О́zderińiz baıqap otyrǵandaı, keıingi jyldary elde qymbatshylyq úrdisi baıqalady. Kommýnaldyq tarıfter jeke tutynýshylardy qospaǵanda, zańdy tulǵalar úshin bıyldyń ózinde 46 paıyzǵa kóterilip ketti. Munyń barlyǵy ónimderimizdiń qymbattaýyna ákep soqtyrady. Biraq biz kompanııa ónimderiniń baǵasyn ósirmeýge tyrystyq. Paıda burynǵydan az túsetinin bile tursaq ta, tutynýshylardyń satyp alý múmkindigimen sanasamyz. Sebebi aınalanyń bárinde qymbatshylyq úrdisi paıda bolǵanymen, eldiń báriniń eńbekaqysy kóterilgen joq. Osyny eskerý mańyzdy», deıdi ol.
Bıyl kásiporyn óz qyzmetkerleriniń eńbekaqysyn birtindep kótere bastady. Endigi rette memleket bıznestiń kommýnaldyq shyǵyndaryn tómendetýge kómektesse degen tilegi bar kásipkerdiń. Memleket basshysynyń otandyq bıznesti jan-jaqty qoldaý týraly tapsyrmasyn Úkimet pen joǵarydaǵy jaýapty vedomstvolar eskerse eken deıdi.
Búginde otandyq tátti taǵamdar salasyn sapaly shıkizatpen qamtýda biraz másele bar. Mysaly, ónimderge qosylatyn kóptegen shıkizat, sonyń ishinde margarın, sút, kilegeı, shokolad Reseıden jetkiziledi. Olardyń ónimi shyndap kelgende qymbat. Sondyqtan kondıterlik ónimder men táttiler daıyndaıtyn kompanııalardy otandyq shıkizatpen qamtıtyn arnaıy baǵdarlama jasalsa, jaman bolmas edi.
«Kóp dúnıeni elimizde jasaýǵa bolatynyna kózimiz jetip turyp, ishim ýdaı ashıdy. Máselen, keıingi jyldary Pavlodar oblysyndaǵy úı aýlalaryna, balalarǵa arnalǵan alańdarǵa reseılik oıyn jáne jattyǵý jabdyqtary ornatyla bastady. Neshe túrli qural-jabdyq kózdiń jaýyn alady. Dál mundaı sapadaǵy ónimdi ózimizdiń kásiporyndar da daıyndap shyǵara alar edi. Jalpy, ózge memleketterden kóp kólemde satyp alyp otyrǵan taýarlardy ózimizde óndiretin ýaqyt jetti. Esesine mıllıondaǵan bıýdjet qarajatyn elde qaldyratyn edik», dep ózin tolǵandyryp júrgen máselemen bólisti.
Mádına Toqjanqyzy búginde Pavlodar qalalyq máslıhatynyń depýtaty qyzmetin de abyroımen atqaryp júr. Adamdardyń jeke máselesin sheshýde aldyna jan salmaıdy. Deıturǵanmen onysyn áleýmettik jelilerde jarnamalaǵandy unatpaıtyny baıqalady. Buǵan qosa jergilikti meshit-medreselerge, jalǵyz basty analarǵa materıaldyq turǵydan turaqty kómek kórsetip keledi. О́mirlik qıyn jaǵdaıǵa tap bolǵan keıbir jandardy kásiporynǵa jumysqa shaqyryp, aıaǵyna turyp ketýine járdemdeskenin de estip bildik.
Sóz sońynda ol tutynýshylar rızalyǵynyń ólshemi arqyly óz kompanııasy óndiretin ónimderdiń sapasyn tarazylap otyratynyn jetkizdi. Tutynýshy – ónim sapasynyń barometri. Al bul saýda-sattyq salasynda mańyzdy ról oınaıdy. О́z tutynýshylaryn jaqsy kórý, týǵan eldi, jerdi súıý kásipker úshin búginde ómirlik kredoǵa aınalǵan.
Pavlodar oblysy
