QOSTANAI. 22 qańtar. Qostanaı oblysy Altynsarın aýdanyndaǵy «Krasnyı Kordon» selosyna kógildir otyn keldi. Bul týraly egemen.kz tilshisi habarlady.
«Krasnyı Kordon» selosynyń turǵyndary gazdy kópten kútken bolatyn. Qazir qystyń qaqaǵan aıazynda selolyqtardyń úıine kógildir otyn kirip, onyń rahatyn sezinip otyr. Seloda 270 qojalyq jáne kóp qabatty úılerde taǵy 70 páter birtindep gaz qubyryna jalǵanyp jatyr. Búginge deıin 74 úıge kógildir otyn kirdi. Aldaǵy ýaqytta selo turǵyndarynyń barlyǵy da órkenıet jemisiniń ıgiligin kóretin bolady. Eń bastysy gaz qubyry aýylǵa keldi.
«Krasnyı Kordonǵa» kógildir otyn kelýiniń tusaýkeserinde aýdan ákimi Batyrbek Ahmetov aýyl turǵyndaryn qýanyshtarymen quttyqtady. Altynsarın aýdanynyń ákimi Batyrbek Ahmetov: «Krasnyı Kordon» selosy turǵyndarynyń turmysy burynǵydan da jaqsarýy úshin bıýdjetten 204 mıllıon teńge bólindi. Mine, osy qarjyǵa 18,6 shaqyrym gaz qubyry tartylyp, ár úıge kógildir otyn kirip tur. Endi aldaǵy ýaqytta aýyz sý qubyry tartylady. Oǵan da respýblıkalyq bıýdjetten qarjy bólinip, «Aq bulaq» baǵdarlamasy boıynsha jumys istelinip jatyr», dedi.
Aýylǵa gaz qubyry alty aıdyń ishinde jetkizildi. Ákim osy seloǵa keletin gaz qubyrynyń smetalyq-jobalyq qujattaryn jasaýdyń qarjysyn tólegen osy selonyń turǵyny, osyndaǵy «Kohan» jaýapkershiligi shekteýli seriktestiginiń dırektory Pavel Ýrbanovıchke jáne qubyrdy tartqan «Stroıgazekspertıza» jaýapkershiligi shekteýli seriktestiginiń dırektory Erkin Asadovqa rahmet aıtty.
Názıra Járimbetova.
Derek, sýret: egemen.kz.
