«Saılaý demokratııalyq ustanymdar negizinde ótti»

KО́KShETAÝ. 26 sáýir. Aqmola oblysynda saılaýǵa keshke qaraı halyqtyń 87 paıyzy daýys berdi. Saılaýda tańerteń ertemen daýys berýdiń basy-qasynda júrgen azamattardyń arasynda Kókshetaý qalalyq máslıhatynyń hatshysy Boranbaı Begalın de boldy.  Ol «Nur Otan» partııasynan baıqaýshy retinde qatysty. Búgin osy azamatpen áńgimeleskenimizde ol bizge saılaýdyń ótý barysy týraly aıtyp berdi. Bul týraly egemen.kz tilshisi habarlady. «Men Kókshetaý qalasyndaǵy №6 saılaý ýchaskesindegi saılaý barysyna «Nur Otan» partııasynan baıqaýshy bolyp qatystym. Saǵat týra 7.00-de komıssııa tóraǵasy, №1 orta mekteptiń dırektory Irına Golovchenko jyly shyraımen qarsy alyp, «Qazaqstan Respýblıkasyndaǵy saılaý barysyn baqylaý jónindegi respýblıkalyq qoǵamdyq komıssııanyń» múshesi Vıktor Geı jáne Prezıdenttikke úmitker Á.Qusaıynov shtabynyń múshesi Serik Esmaǵambetov úsheýmizdi arnaıy orynǵa ornalastyrdy», - dedi ol. Sodan keıin ol saılaýdyń ótý tártibi týraly oıymen bólisti. Onda baıqaýshy tańerteń ertemen Qazaqstan Respýblıkasynyń Ánurany oryndalyp, jurtshylyqtyń kózinshe bıýlletender saqtalǵan seıftiń ashylýyna, móldir daýys berý jáshiginiń mórlenýi rásimine qatysyp, osyndaǵy bes daýys berý kabınasyn baıqap shyqqanny aıtty. «Komıssııa músheleri turǵyndardy tizim boıynsha tólqujattarymen tekserip, bıýlleten alǵandyǵy jóninde arnaıy jýrnalǵa qoldaryn qoıdyryp otyrdy. Kelýshiler tarapynan qandaı da bir túsinispeýshilik, artyq suraqtar qoıý baıqalǵan joq. Daýys berý uıymshyldyq jaǵdaıynda ótkizile bastady», - dedi Boranbaı Begalın. Sonymen birge ol ýchaskelik komıssııa tarapynan konstıtýsııalyq zańnamanyń qatań saqtalǵanyn, munyń ózi  daýys berýdiń óz dárejesinde ótýine yqpal etkenin jetkizdi. Onyń aıtýynsha, saılaýda belsendilik te joǵary boldy. Saǵat 16.00-degi málimet boıynsha daýys berýshilerdiń 87 paıyzy ózderiniń azamattyq paryzyn ótep úlgerdi. Sondaı-aq, saılaý ýchaskesinde býfettiń jumys isteýi, mektep pen qala ónerpazdarynyń konserttik baǵdarlamasynyń qoıylýy merekelik kóńil-kúıdi ósire tústi. Baqbergen Amalbek. Derek, sýret: egemen.kz