Akademısterdiń 2023-2024 oqý jylyndaǵy jetistikterin eske ala otyryp, akademııanyń ekinshi quramynyń barlyq konserti zor tabyspen ótkenin aıta ketýimiz kerek. Jas solıster K.Baıseıitova atyndaǵy kameralyq zal sahnasynda óner kórsetip, ásirese kórermenge erekshe áser syılaǵan «Bravo, Opera!» konsertin usyndy. Sondaı-aq klassıkalyq mýzykany unatatyn jandar XI teatr maýsymy boıy «Astana Opera» repertýarynda usynylǵan operalyq spektaklderde tyńdaýshylardy tamsandyrdy.
Akademııa tyńdaýshylarynyń bilim alý barysy qarqyndy jáne túrli formatta ótken. Máselen, kókshetaýlyq barıton Bekulan Erbolatuly men astanalyq tenor Nursultan Ánýarbek álemge áıgili altshy ári dırıjer Iýrıı Bashmet ártistik dırektory bolyp tabylatyn XVII Qysqy óner festıvali aıasynda Sochıge oqýǵa shaqyryldy. Solıster úzdik ustazdar men mýzyka qaıratkerleriniń sheberlik sabaqtary men dáristerine qatysyp, qorytyndy konsertte óner kórsetti.
Álemge áıdik ıtalııalyq koých-pıanıst ári dırıjer Alessandro Benını men Ozımo qalasyndaǵy Vokal akademııasynyń professory Alla Sımonıshvılıdiń sheberlik sabaqtary jyldyń eń aıtýly oqıǵalarynyń birine aınaldy. Maestrolar jas ánshilerdi G.Donısettıdiń «Qońyraý nemese dárihanashynyń neke túni» operasynyń premerasyna, sondaı-aq osy kompozıtordyń «Mahabbat sýsyny», P.Chaıkovskııdiń «Iolanta» qoıylymdaryna daıyndady. Otandyq ustazdar, dırıjerler men konsertmeısterler de jas ártisterdiń qalyptasýy jolynda qajyrly jumys atqarǵan. Qazaqstannyń eńbek sińirgen qaıratkerleri Jupar Ǵabdýllına men Azamat Jyltyrkózov kún saıyn olardyń vokaldyq sheberlikteri men sahnalyq ónerlerin ushtap otyrdy.
Akademııa tyńdaýshylarynyń jetken jetistikteri zor. Atap aıtsaq, Fırýza Rahmetova Nurjamal Úsenbaevanyń birinshi halyqaralyq vokaldyq óner baıqaýynda ekinshi oryn ıelenip, júldeger atandy. Onyń áriptesi Leıla Alamanova Ázerbaıjan astanasy Bakýde ótken Bıýlbıýl atyndaǵy IX halyqaralyq vokalıster baıqaýynda ekinshi orynǵa qol jetkizdi. Nematıllo Zkrýllaev Grýzııa astanasy Tbılısıde ótken Otar Taktakıshvılı atyndaǵy úshinshi halyqaralyq «Rondo-Klasika» baıqaýynda ekinshi oryn ıegeri atandy. О́ner jolyndaǵy bul jetistikter akademııanyń jas vokalısteri jetken joǵary sheberlik deńgeıin kórsetetini anyq.
«Bul jyl men úshin shynymen umytylmastaı boldy. Úzdik ustazdardan bilim alyp, teatrdyń bedeldi sahnalarynda óner kórsetýge biregeı múmkindik aldym. Akademııa jańa bilim berip, daǵdyny qalyptastyrdy, sondaı-aq óz kúshimizge degen senimdilikti oıatty», deıdi soprano Fırýza Rahmetova.
Al horvatııalyq barıton Iýrısa Iýrasıch Kapýn men Reseıden kelgen soprano Anastasııa Remeskova atalǵan joba opera ónerin tereńirek túsinýge jol ashqanyn atap ótti.
«Akademııadaǵy oqý bizge opera ónerin túsiný turǵysynan jańa belesterdi ashty. Árbir sheberlik synyptary, árbir daıyndyq jańa, qundy tájirıbe ala keldi. Jas daryndardy damytýda akademııa mańyzdy ról atqarady jáne de biz osynaý úrdistiń bólshegi bolǵanymyzǵa qýanyshtymyz», dedi Anastasııa Remeskova.
«Astana Opera» halyqaralyq opera akademııasynyń atqarýshy dırektory Aısulý Tánı túlekterge óz baǵasyn berip, olardyń bir jyl boıy joǵary sheberlik pen ártistik deńgeılerin pash etkenderin, olar buǵan oqý barysynda qol jetkizgenin atap ótti.
«Men olardyń jetistikterin maqtan etemin jáne solıster opera áleminde óz mansaptaryn oıdaǵydaı jalǵastyratynyna senimdimin. Biz osy kúzde akademısterdiń jańa quramyn asyǵa kútemiz jáne olar da sondaı qýanysh pen shabyt ákeledi degen úmittemiz. Túlekterimizge sáttilik pen jańa shyǵarmashylyq jeńister tileımin», dedi Aısulý Tánı.
Iá, atalǵan akademııanyń ekinshi shyǵarylymy alǵashqy quram túlekterinen esh kem emes, talantty ári zerek bolǵan.
Eske salsaq, «Astana Opera» halyqaralyq opera akademııasy 2019 jyly ashyldy. 2023-2024 oqý jylynda munda elimizden jáne shetelderden jas oryndaýshylar biliktilikterin arttyrdy. Eki kýrstyń da túlekteri mamandyqty sátti bastap, elimizde sátti jumys istep jatyr. Tipti shetelde de suranysqa ıe.
