Sátsizdikke toly seısenbi

Attılaǵa Abylaıhannyń áli jetpedi

Olımpıadalyq reıtıngtiń 81 kg salmaq dárejesinde TOP-ondyqty túıindep turǵan 24 jas­taǵy Abylaıhan Jubanazar Attıla Ýngvarımen kúsh synas­ty. 35 jastaǵy Majarstannyń marqasqasy kezinde Eýropa oıyn­darynda bir ret, Eýropa chempıonatynda eki márte qola medaldy ıelendi. Desek te qazirgi kezde onyń joly ońǵarylmaı júr. Sońǵy ret Ýngvarı byltyr naýryz aıynda Tashkentte uıymdastyrylǵan Grand-Slem týrnırinde bas júldeni oljalady. Sodan keıin 20-dan asa jarysqa qatysqanymen, barlyǵynan qur qol qaıtty. Sonyń saldarynan úzdikter tiziminde 20-orynǵa syrǵyp tústi.

Attılaǵa qaraǵanda Abylaı­hannyń jaǵdaıy áldeqaıda jaq­sy. 2023-2024 jyldar aralyǵyn­da ol bes birdeı dúbirli dodadan oljaly oraldy. Tarqatyp aıtsaq, Tbılısıdegi Grand-Slemde kúmis aldy, Ulanbatyr, Dıýsseldorf jáne Astanadaǵy Grand-Slemder men Hanchjoýdaǵy Azııa oıyndarynda qola júldeni enshiledi. Biraq bul eńbektiń barlyǵy beker ketti. Tórtjyldyqtyń basty dodasynda Jubanazar bilgeni­nen jańyldy. Ol reıtıngte ózinen ­10 saty tómen turǵan jáne 11 jas úlken, «shaý tartqan» sportshy­ǵa golden-skorda jol berdi.

Atalǵan salmaqtaǵy aıqasta Takanorı Nagase aıqyn basymdyq tanytty. Tipten, sońǵy úsh álem jáne Eýropa chempıonattarynda eshkimge des bermegen grýzııalyq Tato Grıgalashvılıdiń ózi oǵan jarytyp qarsylyq kórsete almady. Fınaldyq saıys negizgi ýaqytta «ıpponmen» aıaqtaldy. Osylaısha, orda buzar 30 jas­taǵy Japonııanyń juldyzy Tokıodaǵy nátıjesin qaıtalap, eki dúrkin Olımpııa oıyndarynyń jeńimpazy atandy. Odan bólek, Nagaseniń Rıo Olımpıadasynyń qola júldegeri, dúnıejúziniń úsh dúrkin chempıony jáne eki dúrkin qola júldegeri degen ataqtary taǵy bar. Qola medal ońtústikkoreıalyq Lı Joonhvan men tájikstandyq Somon Maha­madbekovke buıyrdy.

63 kg salmaqta óner kórset­ken­ 22 jastaǵy Esmıgúl Kýıýlova byl­tyr Hanchjoýdaǵy Azııa oıyn­dary ­men bıyl Gonkongtaǵy qurlyq chem­pıonatynda qola medaldy moınynda jarqyra­typ, jankúıerlerdi bir qýant­ty. Alaıda osy nátıjeniń ózi oǵan Olımpıadaǵa barý úshin jetkilik­siz boldy. Biraq Esmı­gúldiń jo­ly bolǵysh eken. Azııa qurlyǵy­na bólingen sanaýly ǵana kvota­nyń biri qazaq qyzyna buıyrdy. Sóıtip, dúnıejúzilik reıtıngte 37-orynda turǵan Kýıýlova Parıjge jol tartty. Tusaýkeser kezdesýde onyń joly jastar ara­syndaǵy ­­Eýropa chempıony (U-23), Grand-Slem týrnırleriniń eki dúrkin jeńim­pazy, aýstrııalyq Lýbıana Pıo­vezanamen qıysty. Bul tartys Eýropa ókiliniń paıdasyna sheshildi.

Negizi áıelderdiń 63 kg salmaq dárejesin «slovenııalyqtar­­dyń salmaǵy» dep aıtýǵa bolady. Or­talyq Eýropada ornalasqan ne­bári 2 mıllıonnan asa halqy bar shaǵyn ǵana memlekettiń tata­mı sheberleri osyǵan deıin­gi Olım­pııa oıyndarynda alty júlde jeńip alǵan eken. Sonyń tórte­ýin olar dál osy salmaqta ıelendi. Atap aıtsaq, 2004 jyly Afınada Ýrshka Jolnır qolany qanaǵat tutsa, 2012 jyly ol Londonda al­tynnan alqa taqty. 2012 jyly Tına Trestnıak aldyna jan salmasa, 2021 jyly Tokıoda kúmispen kúpteldi. Mine, endi Pa­rıjde Slo­­venııanyń úshinshi al­ty­ny men jetinshi júldesin 27 jas­taǵy Andreıa Leshkı oljalady. Aqtyq synda ol esimi kópshilikke beı­málim Prıska Gýadalýpe Avıtı Alkarastan aılasyn asyrdy. Bul – Meksıka dzıýdosy tarıhyn­da­ǵy tuńǵysh júlde. Úshinshi orynda – fransııalyq Klarıss Agbene­ný men kosovalyq Laýra Fazlıý.

Endi jarys jolynda eki dzıý­doshymyz ǵana qaldy. 100 kg sal­­maqtaǵy Nurlyhan Sharhan bú­gin álem chempıonatynyń kúmis jáne qola júldegeri, Eýropanyń eki dúrkin chempıony, Eýropa oıyn­darynyń qola júldegeri, bel­gııalyq Toma Nıkıforovpen aı­qasady. Qaı jeńgeni álem jáne qur­lyq chempıony, Azıada men Mas­ters týrnıriniń jeńimpazy, ózbek Muzaffarbek Toroboev­qa tap bolady. Erteń +78 kg sal­maq­taǵy Kámıla Berliqash Azııa oıyn­dary men qurlyq birin­shili­giniń jeńimpazy, mońǵo­lııalyq Amar­saıhany Adııaa­sýrenmen beldesedi. Odan keıin biz aralas komanda­lyq jarysty tamashalaımyz.

Ádilbek álsizdik tanytty

Erkin tásilmen 100 metrlik qashyqtyqqa júzýshiler saıysyna Ádilbek Mýsın shyqqanda demimizdi ishke tartyp otyrdyq. Qansha degenmen, osy sport túrin serik etken qandastarymyz tym sırek. Onyń ústine 24 jastaǵy saıypqyrannyń aıaqalysy da jaman emes. Ol birqatar halyq­aralyq jarysta jaqsy nátıje kórsetti. 2021 jyly Konıada Islam yntymaqtastyǵy oıynda­rynyń jeńimpazy atanyp, Dú­nıejúzilik Ýnıversıadada úshin­shi orynǵa turaqtady. 2018 ben 2023 jyldardaǵy Azııa oıyndarynda tórt ret úzdik úshtikti túıindedi. Osy jaǵdaıdyń bar­lyǵy Ádilbekke degen senimdi nyǵaıtty.

Shyny kerek, Fransııanyń astanasyndaǵy jarysta Mýsın 2016 jyly Rıo Olımpıadasynda aıdy aspanǵa bir-aq shyǵarǵan Dmıtrıı Balandınniń erligin qaıtalaı almasa da, biraz jerge deıin baratyn shyǵar dep úmit­tendik. Biraq ol irikteý synyn­da óz jankúıerlerin jerge qara­typ, 8 adamnyń arasynan máre­ge eń sońynda jetti. Endi qanda­sy­myz 2 tamyzda ótetin batter­flıaıshilerdiń 100 metrlik báse­kesinde óner kórsetedi. Bálkim, sol jarysta Ádilbektiń baǵy janar.

Stend atýshylardyń (trap) irik­teý saıysynda Ma­rııa Dmıt­rıen­ko 73 upaı jıyp, tórtinshi oryn­ǵa turaq­tady. Otandasy­myz­­dyń kelesi kezeńge ótýi úshin osy kórsetkish jetkilikti boldy. Endi Dmıtrıenkoǵa fınalǵa joldama alý úshin osy mejede úzdik altylyqtyń qatarynan kóriný qajet. Al sadaq atýdan synǵa tús­­ken Ilfat Abdýllın 1/32 fı­­nal­da álem chempıonatynyń kú­mis,­ Panamerıka oıyndarynyń qo­la júldegeri, kanadalyq Erık Pı­terske 4:6 esebimen ese jiberdi.

Nurbek ázer jeńdi, Sáken aıqyn utty

Seısenbide qos boksshymyz sharshy alańǵa kóterildi. 80 kg salmaqtaǵy Nurbek Oralbaı aýstralııalyq Kallým Pıterspen judyryqtasty. 21 jastaǵy jasyl qurlyq ókiliniń baǵyndyr­ǵan pálendeı belesteri bolmaǵany­men, soqqysy óte joıqyn eken. Tehnıkalyq arsenaly da mol. Ekinshi raýndta ol qazaqtyń ulyn bir márte eseńgiretip tastady. Desek te der kezinde es jıǵan álem chempıony Pıtersten upaı sanymen basym tústi. Dál sol salmaqta Qytaıdyń namysyn qorǵaǵan álem chempıonatynyń kúmis júldegeri, Azııa oıyndarynyń jeńimpazy Toqtarbek Tańatqan Domınıkan Respýblıkasynyń ókili Krıstıan Haver Pınalesti ekinshi raýndta nokdaýnǵa jiberdi. Biraq tóreshi qazaqtyń emes, qarsylasynyń qolyn kóterdi.

51 kg salmaq dárejesindegi Sáken Bıbosynov túrkııalyq Sámet Gýmýshpen qolǵap túıis­tir­di. Talaı dúrmekte ysylǵan Myr­zaǵalı Aıtjanovtyń tól shákirti 2023 jylǵy Eýropa oıyndarynyń fınalısi, 2024 jylǵy Eýropa chempıonyn esh qınalmaı-aq utty.

Shırek fınalda Nurbek Oral­­baı ázerbaıjandyq Murad Allah­­verdıevpen aıqassa, Sáken Bıbosynov О́zbekstannyń maq­tanyshy Hasanboı Dýsmatov­pen kúsh synasady. Bul básekeler 2 ta­myzda ótedi. Al oǵan deıin biz Mahmýd Sabyrhan (57 kg) men ıspanııalyq Hose Kıles, Va­len­tına Halzova men (75 kg) pana­malyq Ateına Baılan, Nazym Qyzaıbaı men (50 kg) bra­zı­lııalyq Karolıne Barbosa de Al­meıda, Aıbek Oralbaı (92 kg) men ázerbaıjandyq Loren Alfonso Domınges, Muhamed­sabyr Bazarbaıuly (63,5 kg) men grýzııalyq Lasha Gýrýlı jáne Karına Ibragımova (57 kg) men pýertorıkalyq Ashleııan Losada Motta jekpe-jekterin tamashalaımyz.

Keshe jarys jolyna úsh­saıysshy Ekaterına Shabalına, nysana kózdeýshiler Islam Sat­paev pen Konstantın Malınov­skıı (50 metrden úsh qalypta atý), stend atýshy Marııa Dmıtrıenko (trap), boksshy Mahmýd Sabyrhan (57 kg) men Valentına Halzova (75 kg), ústel tennısshisi Kırıll Gerasımenko (jekelegen saıys, 1/8 fınal), sporttyq gımnasshy Mılad Karımı (kópsaıys, fınal) syndy sańlaqtar shyqty. Olardyń qalaı óner kórsetkeni jaıynda gazetimizdiń kelesi sanynda baıandaımyz.