Kásipker Ásel bala kezinen asúıge jaqyn ósipti. Qoly qalt etse, shaıǵa túrli tort, bálish pisirýdi ádetke aınaldyryp alǵan. Alǵash «Bal» men «Hanymnyń saýsaqtary» tortyn ázirleýdi úırenipti. Ol kezde qazirgideı kondıter ónimderin ázirleıtin seh joq. Qazaqtyń toı-qýanyshy kóp bolǵan soń, tapsyrys tópelep túse bastaıdy. Ármen qaraı mázirin molaıtqysy keledi. Sodan orys tilinde shyǵatyn «Lıýblıý gotovıt» («Taǵamdy daıyndaýdy unatamyn») degen shaǵyn jýrnaldy izdep júrip satyp alyp otyrǵan.
Keıinnen ınternetke qol jetken soń túrli tátti toqashtardyń quramyn, jasalý jolyn sodan alady. Sóıtip, torttyń, tátti deserttiń túr-túrin pisirýdi úırenedi. Birte-birte asúıinen shaǵyn sehqa aýysady. Kásibi odan saıyn dóńgelegen Ásel Erbolqyzynyń qaramaǵynda 24 adam jumys isteıdi.
Satylymdy uıymdastyratyn menedjerler, aspazdar, kondıterler, dúkenshi-kassırler, salat, nan qamyrlaryn daıyndaýshylar, bálish, pechene pisirýshiler, áleýmettik jelige jaýap beretin maman, mobılograf bári sehtaǵy jumys kórigin qyzdyrady. Eki kólik júrgizýshi jeńil kólikterimen tapsyrystardy tegin jetkizip beredi. Sonyń arqasynda kásip órkendeıdi.
Kondıterlik seh pen jyldam tamaqtaný bóliminde torttyń 35, pırogtiń 25, rýlettiń 9, chızkeıktiń 10, pırojnyıdyń 35, pıssanyń 6 túri pisiriledi. Munymen qosa mázirinde býrger, keks, hot-dog, samsa, chebýrek, bálish, toqash, taǵamdardan manty, tushpara, varenık, laǵman, dýmlıama, qazan-kebab, frı bar.
«Kýlınarlyq táttilerge, ystyq astarǵa tapsyrys óte kóp. Úlgermeı jatamyz. Tipti keıbir tapsyrystan bas tartýǵa týra keledi. Keńirek etip kofehana ashsaq degen oı bar. О́ıtkeni halyq, ásirese jastar sondaı jerdiń bolǵanyn qalaıdy. Otbasymen, balalarymen kelip tátti bálishpen kofe, shaı ishkileri keledi. Týǵan kún, basqa da mereke kúnderi jınalady», deıdi kondıter sehynyń basshysy.
Bilikti aspaz arnaıy kýrs ashyp, kenttiń jastaryna sheberlik sabaqtaryn júrgizedi. Odan dáris alǵan jıyrmaǵa tarta jas úılerine kent turǵyndarynan jeke tapsyrystar alyp, kásipterin jalǵastyryp jatyr. Kásipker qaıyrymdylyq sharalaryn da nazardan tys qaldyrmaıdy. Ol jaǵdaıy tómen otbasylarǵa, múmkindigi shekteýli jandarǵa qarjylaı kómek kórsetedi. Kent ishinde ótetin mádenı jáne sporttyq is-sharalarǵa únemi demeýshilik jasaıdy.
Aýdan ekonomıkasynyń órkendeýine aıtarlyqtaı úles qosyp júrgen, halyqtyń toı-qýanyshyna tátti ónimin usynyp júrgen «Caramel» kondıter sehy áli de damyp, jetile túsýdi kózdep otyr.
Qaraǵandy oblysy,
Shet aýdany,
Aqadyr kenti
