Keshe Astana qalasynan zeınetker marafonshy Qazaqstan – Reseı – Mońǵolııa – Qytaı baǵyty boıynsha kezekti saparyna attandy. Birneshe elge tabany tıetin qarııa bul jolǵy saıahatyn Dúnıejúzilik kóshpeliler oıyndaryna arnaıtynyn aıtty.
О́skemennen Altaı aımaǵyna ótip, ary qaraı Mońǵolııaǵa aıaldap, Qytaıdyń astanasy Beıjińge jol tartatyn qarııany keshe elordalyqtar aq jol tilep, tileýlestik tanytyp, sáttilik tiledi.
«Birneshe eldiń shekarasyn basyp ótetin saıahatymdy Astana qalasynda ótetin Dúnıejúzilik kóshpeliler oıyndarynyń qurmetine arnaımyn. Etnosport saıysyn ótkizý arqyly ózimizdiń tól mádenıetimizdi, babalarymyzdyń at ústinde júrip, órkenıetti ómir súrgenin kúlli álemge áıgileımiz. Kóshpeli halyqtyń urpaǵy bolǵandyqtan, dúnıejúzilik dodany nasıhattaýǵa bel býdym. Byltyr Atyraýdan attanyp, Túrkııanyń Ystanbul qalasyna deıin jaıaý júrdim. Bıyl Eýropa elderin aralaýdy josparlap edim, qujattyq resimdeýde kiltıpan bolyp, reti kelmedi. Mońǵolııanyń Ulanbatyr qalasynan Qytaı astanasy Beıjińge deıin, jalpy 3 500 shaqyrymdy basyp ótpekpin», deıdi marafonshy.
Sársenbaı Qotyrashev bala kúninen jaıaý júrýmen shuǵyldanǵanyn aıtty. Búginde zeınetker marafonshy kúnine 35-40 shaqyrym jol óndiredi. Salamatty ómir saltyn nasıhattap, kópshilikke úlgi kórsetip júrgen qarııa qyzyǵy men qıyndyǵy qatar óriletin ár saıahatynda meıirimdi jandardyń qamqorlyǵyn kóp kórgenin de jetkizdi.
