Eki kúnge sozylǵan qoıan-qoltyq urysta erlermen qatar áskerdiń jeti quramasynan kelgen 19 áıel sportshy óner kórsetti. Áıelder arasyndaǵy jeke esepte 52 kıloǵa deıingi salmaq dárejesinde qatardaǵy jaýynger Ánel Stambekova birinshi oryndy ıelendi. Ol buǵan deıin de túrli jarystarda baq synap, jeńimpaz atanǵan.
«О́zim sportqa jaqynmyn. Qazir júzý men qoıan-qoltyq saıystarǵa shyǵyp júrmin. Bul jarys men úshin mańyzdy boldy, eńbegimniń jemisin kórip otyrmyn. Áskerı bólimniń sporttyq ujymyna alǵysym sheksiz, bizdiń daıyndyq jasaýymyzǵa múmkindik berip, árqashan qoldaý kórsetedi. Qarsylastarym da joǵary daıyndyqpen kelipti. Ásirese Shyǵys pen Ońtústiktiń qyzdary myqty eken. Degenmen namysqa tyrysyp, jeńiske jettim», deıdi júlde ıesi aǵynan jarylyp.
Qoıan-qoltyq urys árbir áskerı qyzmetshini daıarlaýdyń negizgi elementteriniń biri. Jaqyn shaıqasta atys nemese basqa qarý túrlerin qoldanýǵa múmkindik bolmaǵan jaǵdaıda áskerı qyzmetshi túrli jaýyngerlik jáne sporttyq ádisterdi qoldana bilýi shart. Áskerı qoldanbaly sport túrinen alǵash ret baq synaǵandar arasynda serjant Áıgerim Bekmyrzaeva men kishi serjant Inabat Amanova da bar. Olar jarysqa daıyndyq kezinde sporttyq qasıetterin shyńdaǵanyn aıtady.
«Qyzdardyń daıyndyǵy joǵary deńgeıde boldy. Solardyń ishinen 5-orynǵa iligý bizge ońaı bolǵan joq. Basynda qorqynysh, qobaljý bolǵanmen, qyzdarmen bir-eki jekpe-jek ótkizgennen keıin shırap aldyq. Bizdi jigerlendirip, osy dodaǵa yntalandyryp alyp barǵan jetekshimiz, maıor Aıymbek Qaıraqanovqa alǵysymyz sheksiz», deıdi qos arý.
Jekpe-jekte erler arasynda 80 kılo salmaqta elordalyq quramanyń sarbazy, qatardaǵy Oljas Abdývalıev jeńiske jetti. Sondaı-aq Nıkıta Sherbakov 57 kılo salmaqta, Qurbanjan Sadyqov 97 kılo salmaqta úshinshi oryndy elshiledi.
Jalpykomandalyq eseptik kórsetkishte 5573 áskerı bóliminiń quramasy 5-orynǵa turaqtady. Qatardaǵy Ánel Stambekova, Qurbanjan Sadyqov pen Oljas Abdývalıev Ulttyq ulannyń quramasyna qabyldandy. Endi jaýyngerler 8 tamyz kúni Taraz qalasynda ótetin jekpe-jekte kúsh synaspaq.
