Qaıyrymdylyq aksııasy bastaldy

Atalǵan aksııa oqý jylyna daıyndyq kezinde az qamtylǵan otbasy­lardyń balalaryna demeý­shilik kómek kórsetýge baǵyt­talǵan. 15 jyl ýaqyt araly­ǵyn­da «Mektepke jol» aksııasy myńdaǵan balaǵa jańa oqý jy­lyn qýanyshpen bastaýǵa kó­mek­testi. Osyndaı ıgilikti is-shara­ǵa eriktiler, kásipkerler, mese­nattar, úkimettik emes uıym­dar jáne barlyq janashyr azamattar qatysa alady. Keıingi úsh jylda materıaldyq kómek kó­lemi barlyq óńirde 2,5 esege artty. Naqtyraq aıtsaq, 17 myń­nan, 43,4 myń teńgege ósip otyr. Bul memle­kettik qol­daý­dyń art­­­­­­qanyn jáne ál­eý­met­tik osal toptardaǵy balalar úshin jaǵ­daı­dyń jaqsarǵanyn kór­se­tedi.

Bala­lardyń quqyqtaryn qor­ǵaý komıtetiniń tóraǵasy Nasym­jan Ospanovanyń aıtýynsha, bıyl 500 myńnan astam balanyń ata-anasy «Jalpyǵa birdeı bilim berý» qory aıasynda mektepke daıyndalý úshin materıaldyq kómek alady. Olardyń qatarynda ataýly áleýmettik kómek alatyn otbasylardaǵy mektep oqýshylary men jan basyna shaqqandaǵy ortasha tabysy eń tómengi kúnkóris deńgeıinen tómen otbasylardyń balalary, sondaı-aq jetim balalar men tótenshe jaǵdaıǵa tap bolǵan otba­sy­lardyń balalary bar. Materıal­dyq kómek kıim-keshek, onyń ishin­de mektep formasy, aıaqkıim, oqý quraldaryn satyp alý úshin bólinedi.

 «О́zderińiz biletindeı, jyl saıyn 1 tamyzdan 30 qyrkúıekke deıin elimizdiń barlyq óńirinde «Mektepke jol» respýblıkalyq qaıy­rym­dylyq aksııasy ótki­zi­ledi. «Jalpyǵa birdeı bilim berý» qory halyqtyń áleýmettik osal toptaryndaǵy balalarǵa qoldaý kórsetip, oqýǵa qajetti qarajat bóledi. Budan bólek, jańa oqý jyly qarsańynda tótenshe jaǵdaı saldarynan járdem talap etetin otbasy­lardan shyqqan balalar qar­jylaı kómek alady. Oqý-aǵartý mınıstrligi kómek kórsetý tetigin jaqsartý boıyn­sha túrli shara qa­byldady. Máse­len, mektep forma­sy men keńse taýarlaryn satyp alýǵa arnal­ǵan materıaldyq kómek ata-analardyń esepshotyna jibe­ri­ledi. Osylaısha, árbir ata-ana balalaryna barynsha sapaly taýar alýǵa tyrysady. «Jal­pyǵa mindetti bilim berý» qory­nyń aıasynda árbir bilim alý­shyǵa beriletin materıaldyq kó­mektiń eń tómengi mólsheri − 43 407 teńgeni quraıdy. Osyǵan oraı barlyq júregi keń azamat­ty, onyń ishinde eriktilerdi, kásip­kerlerdi, úkimettik emes uıym­­dardy jáne basqa da múd­deli qa­tysýshylardy bizdiń qaıy­­rymdylyq bastamamyz­ǵa qa­ty­sýǵa shaqyramyz», dedi N.Ospanova.

Búgingi tańda «Jalpyǵa bir­deı bilim berý» qory aıasynda ata-analardyń esepshottaryna 77 806 balany qamtı otyryp, mektep kerek-jaraqtary men qajetti taýarlardy satyp alý úshin 3,4 mıllıard teńgeden astam qarajat aýdarylǵan. Atalǵan kómek alýshylardyń jalpy sanynyń 15%-yn quraıdy. Qazir óńirler mektep quraldaryn satyp alý úshin ata-analarynyń nemese olardyń zańdy ókilderiniń esepshottaryna qarajat aýdara bas­tady. Qarajat alǵan ata-ana­lar qajetti taýardy satyp alǵa­nyn rastaıtyn qujattardy usy­nýǵa tıis. Materıaldyq kómek alý úshin árbir ata-ana mektep dırek­to­rynyń atyna ótinish jazady.

Budan bólek, jańa oqý jyly qarsańynda mektep taýar­­lary­nyń qoljetimdiligin qam­ta­masyz etý maqsatynda ákim­dikter men «Ata­meken» Ult­tyq kásipkerler pala­­tasy jár­meńkeler, onyń ishin­­de kóshpeli jár­meńkeler men mektep kerek-jaraq­taryn sata­­tyn avtolavkalar uıym­das­ty­­ra­­dy. Osy tusta baǵanyń negiz­siz ósýin boldyrmaý – mańyzdy shart.

Aıta keteıik, aksııa barysynda «jedel jelilerdiń», «senim telefondarynyń», qoǵam­dyq qabyldaý bólme­le­riniń úzdiksiz jumysy uıym­das­tyrylady. Sondaı-aq kómekke muqtaj nemese qoldaý kórsetýge daıyn jandar Balalardyń quqyqtaryn qorǵaý komıtetiniń 74-25-28 senim telefonyna nemese «Bala qorǵaý» Telegram chatyna júgine alady.