Osyndaı ózgege úlgi bolarlyq eldi mekenniń biri – Zaporoje aýyly. Aýyldyq okrýg quramyna 1 765 turǵyny bar Zaporoje aýyly men 620 turǵyn turatyn Lozovoe eldi mekeni kiredi. Respýblıkalyq «Taza Qazaqstan» aksııasynyń mán-mazmunyna jete nazar aýdaryp, oń bastamany biraýyzdan qoldaǵan eldi meken turǵyndary kógerip kóktem shyqqannan-aq aýyl ishin qystan qalǵan qoqystan tazartýǵa jumyla kiristi.
– Eń aldymen turǵyndarmen birneshe márte júzdesip, tazalyqtyń ózimiz úshin kerek ekenin uǵyndyrdyq. Bir jaqsysy, barlyǵy jete túsinip, qoldady. El bolyp kirisken soń kez kelgen sharýany eńserip ketetinimiz belgili edi, – deıdi Zaporoje aýyldyq okrýgtiń ákimi Dýman Haýsylov.
Okrýg ákimdigi qyzmetkerleri, el aǵalary jaqsy iske uıytqy bolyp, jalpy jurtty jumyldyra bilgen. Nátıjesinde, aýyldyń maqtanyshy ispetti stadıonnyń mańy, park aımaǵy, kósheler muntazdaı etip tazartylǵan. Berekeli aýyldyń sánin keltirip turǵan aǵashtardyń dińi áktelgen. Jaıaý júrginshiler joldary tazartylyp, jol jıegindegi shaqpa tastar aǵartylǵan. Aıaldamalar da ádemi keıipke engizilgen. Ortaq sharýaǵa eldi mekenderdiń eńbektegen balasynan eńkeıgen kárisine deıin aıanbaı atsalysty desek, artyq aıtqandyq emes. Aldymen aýyldyń kireberisinen bastalǵan abattandyrý jumysy qaltarystaǵy kishkentaı kóshelerge deıin qamtylǵan. Osynaý jumysqa 300-den asa adam atsalysyp, 12 tehnıka paıdalanylǵan. Nátıjesinde, 50 tonnaǵa jýyq qoqys shyǵarylǵan. 350 aǵash kósheti otyrǵyzylyp, el ishinde kórgen jannyń kózqýanyshyna aınalǵan gúlzarlar baptalǵan. Qazir uqypty qoldyń taby anyq baıqalatyn aýyl ishi naq bir qonaq kútken úıdiń aýlasyndaı jarqyraı jaınap tur.
Árıne, on saýsaqtyń birdeı emestigi belgili. Árbir úıdiń mańaıy el qatarly tazartylýǵa tıis. Bul jumysqa mán bermegen 20 otbasyna eskertý jasalypty. Áıtse de, kógaldandyrý qaǵıdasyn buzǵandarǵa aıyppul salynbaǵan eken.
– Bizdiń aýylda jumys qaınap jatyr. Bir jaqsysy, jastar da turaqtap qaldy. Olardyń bos ýaqytynda kóńil kóteretin mádenı, sport oshaqtary qaltqysyz jumys istep tur. Al aýyl aqsaqaldary bolsa keshkilik parkte jınalyp, syndarly suhbat qurady. Elimizdiń keshegi ómiri, baıandy bolashaǵy týraly parasatty pikirler aıtylady. Halyqqa jumys bar. Birneshe dúken jumys isteıdi. Tipti osyndaǵy sharýa qojalyqtary jumys qolyna zárý. Osyndaı bosaǵasyna bereke bitken elde turǵan soń ózimizdiń kindik qanymyz tamǵan jerdi aıalap, kútip ustaý – perzenttik paryz. Bizdiń eldiń adamdary osyny jaqsy túsinip, kez kelgen jumysqa birlese kirisip ketip, qolǵabysyn tıgizip jatyr. Saıyp kelgende Zaporoje aýlynyń turǵyndary mańaıynyń jaınap turǵan tazalyǵymen, kóztartarlyq sán-saltanatymen maqtana alady, – deıdi aýyl turǵyny Qojabergen Toǵjanuly.
Kórikti mekendi kútip ustaý bir sáttik naýqandyq jumys emes, jyldyń qaı mezgili bolsyn, aýyl turǵyndarynyń kez kelgeni osyndaı jınaqylyqty kókseıdi. Endeshe, halyqtyń qalaýy óz aýlynyń ajary dep aıtsaq, synyqsúıem artyqtyǵy bolmas.
Aqmola oblysy,
Jaqsy aýdany
