Rasynda atalǵan dertke shaldyqqandardyń basym bóligi egde jastaǵy adamdar bolǵanyna qaramastan, ishinara bul dertke dýshar bolǵan jastar da kezdesip jatady. Olardyń qatarynda der kezinde emshara qabyldamaǵandyqtan múgedek bolyp qalǵandar da bar. Búkil álemniń bas aýrýyna aınalǵan dertpen kúresý maqsatynda Jambyl oblysynda revmatologııa ortalyǵy ashyldy.
Jańadan ashylǵan ortalyq Taraz qalasyndaǵy oblystyq kópbeıindi aýrýhananyń bazasynda ornalasqan. Medısınalyq mekeme qyzmetkeleri revmatıkalyq dertke shaldyqqan azamattardy táýlik boıy emdeýge daıyn kórinedi. Ol úshin barlyq múmkindik qarastyrylǵan. Bilikti mamandar jetkilikti.
«Bul ortalyqta óńir turǵyndarynyń ómir súrý sapasyn jaqsartýǵa múmkindik beretin negizgi dári-dármekterdi ýaqtyly taǵaıyndaý úshin emdelýshilerdiń dınamıkalyq monıtorıngi uıymdastyrylady. Munda mamandar fızıoterapııa jáne jattyǵý terapııasynyń ádisterin qoldanyp, naýqastarǵa múgedektiktiń aldyn alý boıynsha kómek kórsetedi. Táýlik boıy jumys isteıtin jáne kúndizgi stasıonarlardan bólek, emdelýshilerge tekserilý, keńes alý jáne emdeý múmkindigin beretin ambýlatorııalyq qyzmet keńeıe túsedi. Bir sózben aıtqanda, ortalyqta jumys isteýge qajetti múmkindiktiń bári qarastyrylǵan», deıdi oblystyq densaýlyq saqtaý basqarmasynyń basshysy Janar Ospanova.
Basqarma basshysynyń aıtýynsha, ortalyqta ınjenerlik bıologııalyq terapııa kabıneti, býynishilik manıpýlıasııalar kabıneti, kapıllıaroskopııa, densıtometrııa kabınetteri ornalasqan. Tórt dáriger der kezinde medısınalyq kómek kórsetedi. Sondaı-aq óńir turǵyndary tegin medısınalyq kómektiń kepildik berilgen kólemi jáne mindetti áleýmettik saqtandyrý sheńberinde emhana joldamasy boıynsha tekserý jáne emdeýden tegin óte alady.
J.Ospanova keltirgen derekke sensek, oblys boıynsha revmatologııalyq dıagnozben 4 825 naýqas dıspanserlik esepte tur eken. Onyń ishinde qurylymynda negizgi bóligi boıynsha osteoartroz – 1 656, seronegatıvti revmatoıdti artrıt – 1 142, seropozıtıvti revmatoıdti artrıt – 985, júıeli qyzyl jegi aýrýymen jáne basqa reaktıvti artropatııa dertimen 142 emdelýshi tirkelgen.
Taraz
