Ata-ájelerimiz ertegi aıta ma?

Bala kezinen ata-ájeleriniń ertegileri men batyrlar jyryn estip ósken aǵa urpaqtyń sóz ónerin kıe tutyp, ulttyq qasıetterimizdi kóziniń qara­shyǵyndaı saqtap, halqyna, eline adal qyzmet etip júrgenin jaqsy bilemiz. Halyq aýyz ádebıetiniń káýsar bula­ǵymen sýsyndap ósken aǵa urpaq qazir ózderi nemerelerine ertegi aıta ma? Bireýden ilgeri, bireýden keıin turmysy bar, bala-shaǵasynyń qamyn jasaımyn dep «kosmostyq» dáýirde balalaryna, nemerelerine kóńil bólýge ýaqyt taba almaıtyn bolýy kerek degen de oı joq emes. Desek te, ýaqyt joq dep saırap júrgender teledıdarda berilip jatqan túrik pen káris, úndi serıaldaryn úzbeı kóredi. Nemerelerin aldaryna alyp, birge tamashalaıdy. Bul serıaldardy bala kórýge bola ma, joq pa, ony oılap jatqan eshqaısysy joq. Buryn ózderi qandaı qazaq aqyn-jazýshylary baryn, kim­­niń qandaı kitaby shyǵyp jat­qanyn bilip otyratyn. Al, qa­zir ózderiniń osy ádetterin ba­lalaryna, nemerelerine úlgi qyla almaýynyń sebebi nede? О́z urpaǵynyń kompıýter, teledıdar, telefon, ınternetti jaqsy meńgergenin alǵa tartyp maqtanady. Keıingi urpaqtyń zaman talabyna saı ǵylymı-tehnıkalyq progress jemisterin bilgeni durys qoı. Áıtse de, halqymyzdyń qııaly ushqyr, tili baı, tapqyrlyqqa toly erte­­gilerin tyńdap ósken ur­paq­tyń kókiregi meıirimge, adal­dyq­qa, qaıyrymdylyqqa, adam­gershilikke bólenip ósetinin uǵa tura, bala tárbıesine kó­ńil bó­lýde olqylyq jiberip otyr­ǵanymyz ókinishti. Sheteldenýdiń bári keremet dep, olarǵa tańdanýdyń qajeti joq ekendigin ata-ájelerimiz bilse ǵoı. Rýhanı quldyrap bara jatqan balalarymyzdyń erteńi ne bolmaq?  Olardyń bolashaq el tiz­ginin ustar azamat bolýy úshin ata-ájeleri, áke-shesheleri besik jyrynan bastap, ertegi, ańyzdar, batyrlar jyryn bala qulaǵyna quıyp otyrsa, bala ózi de beıimdeler edi. Nemereleriniń qulaq qu­ryshyn qandyratyn ertegi, ańyz áńgimeler aıtatyn ata-ájelerimiz kóbeıse eken dep tileımiz. Gúlmıra RAÝShANBEKQYZY, Shákárim Qudaıberdiuly atyndaǵy №75 jalpy bilim beretin mekteptiń muǵalimi. ALMATY.