Foto: senate.parlam.kz
Senator aldymen Turar Rysqulov aýdanynda boldy. Qaıyńdy aýylyndaǵy feldsherlik-akýsherlik pýnktiniń, Aqyrtóbe aýylyndaǵy mádenıet úıiniń, Maldybaı aýylyndaǵy mekteptiń, sondaı-aq Jańaturmys aýylyndaǵy dene shynyqtyrý-saýyqtyrý kesheni men mádenıet úıiniń qurylysymen tanysty.
B.Orynbekov jumystardy sapaly jáne ýaqtyly aıaqtaýdyń mańyzdylyǵyn atap ótti. Ol jańa medısınalyq, bilim berý, mádenı jáne sporttyq nysandar jergilikti turǵyndardyń ómir súrý sapasy men qyzmetterdiń qoljetimdiligin jaqsartýda sheshýshi ról atqaratynyna toqtaldy. Bul jobalar halyqtyń densaýlyǵyn nyǵaıtý, bilim deńgeıin arttyrý jáne mádenı damýdy qoldaý arqyly aımaqtyń jan-jaqty damýyna zor yqpal etedi.
«Senat depýtattary el ómirinde sheshýshi ról atqaratyn mańyzdy zańdardy qabyldap keledi, sondaı-aq buryn qabyldanǵan zańnamalyq aktilerge túzetýler engizedi. Zańdar men ózge de quqyqtyq aktilerdiń iske asyrylýyna monıtorıng júrgizý maqsatynda olardyń qajetti standarttarǵa sáıkestigine kóz jetkizý úshin qurylys jumysynyń barysyn zerdeleımiz. Qurylystyń sapaly júrgizilýi jáne jaýapty tulǵalardyń osy jobalardyń oryndalýyna baqylaýdy kúsheıtýi asa mańyzdy. Aýyl turǵyndarynyń usynystary men pikirlerin muqııat eskerip, olarǵa berilgen ýádelerdi saqtaý kerek», dedi B.Orynbekov.
Depýtat Merki aýdanynda bolyp, Aqtoǵan aýylyndaǵy Tilemis batyr atyndaǵy №4 jalpy bilim beretin mekteptiń, Myńqazan aýylyndaǵy №30 mekteptiń, Oıtal aýyldyq okrýgindegi №48 mekteptiń qurylysymen tanysty. Ol sondaı-aq Rysqulov aýylynda dárigerlik ambýlatorııa qurylysyn da kórdi.
