Endigi úmit – Nurbek pen Nazymda

Bastapqy básekelerde eki qar­sylasyn qapy qal­dyr­ǵan Muha­med­sabyr Bazar­baı­uly (63,5 kg) shırek fınalda grýzııalyq Lasha Gýrýlıge ese jiberdi. Dál sol mejede Sáken Bıbosynov (51 kg) Hasanboı Dýma­tov­pen kúsh synasty. Aıqas teń dáre­jede ótti. Ekeýi de aıanbaı aıqa­syp, bir-birin jaqsylap turyp tóm­­peshtedi. Alaıda úshinshi raýnd­ta qandasymyz qarqynyn báseń­detip aldy. Kerisinshe, ózbek boks­shy­sy qushtarlana tústi. Eger alǵash­qy eki raýndta 3:2, 2:3 esebi tirkel­geni­men, sońǵysynda barlyq tóreshi Olım­pıa­da men álem chempıony, Barker kýboginiń ıegeri, Azııa oıyndary jeńimpazynyń basymdyǵy aıqyn boldy dep eseptedi. Nátıjesinde, Dýsmatov jeńis toıyn toılady.

Dúbirli doda bastalǵaly beri áleýmettik jelilerde «qazylar qazaq boksshylaryna qııanat jasap jatyr» degen sıpatta áńgimeler órbip júr. Bálkim, solaı da shyǵar. Biraq bosqa shýlaǵannan eshteńe ózgermeıdi. Tóreshi kimniń qolyn kóterse, jeńimpaz – sol. «Qarǵa qarǵanyń kózin shuqymaıdy» demekshi qazylar ońaılyqpen óz sheshim­de­rin ózgertpeıdi. Ári ketse, bura tart­qan tóreshiler jazalanyp, jarystan shettetiledi. Al odan bizge ne paıda? Kelip-keteri joq. Soǵan áldeqashan kózimiz jetken. Árkimdi bir tabalap, árkimnen kinárat izdep, beker baıbalam salǵansha bokstaǵy qalyptasyp qalǵan eski júıe men jattyǵýdy, basshylyq quramy men bapkerlerdi ózgertý kerek. Qazaqstandaǵy №1 sport túriniń basy-qasynda shyn jan­ashyrlar men qolynan is keletin aza­mattar júrýi qajet. El boksy­na jańa lep, jańa býyn kerek. Ke­zin­de osy sport túriniń «otymen kirip, kúlimen shyqqan», búginderi bap­kerlik kásipti serik etip júrgen jas mamandarǵa múmkindik berilse, bálkim is ońǵa basyp, tyǵyryqtan shyǵarmyz. Eń birinshi kezekte osy jaǵyn oılastyrǵanymyz jón.

Sonymen, jarys jolynda eki boksshymyz ǵana qaldy. Osyǵan deıin ázerbaıjandyq Murat Alah­verıev pen domınıkandyq Krıs­tıan Pınalesti jeńgen 80 kg sal­maqtaǵy Nurbek Oralbaı fınal­da ýkraınalyq Aleksandr Hıjnıakpen aıqasady. 28 jas­taǵy Poltava týmasynyń Olım­pıa­danyń kúmis júldegeri, álem jáne Eýropa chempıony, Eýropa oıyndarynyń eki dúrkin jeńimpazy degen ataǵy bar. Bizdiń Nurbek te osal emes. 24 jastaǵy qandasymyz 2003 jyly Tashkentte álem chempıony atandy. Esterińizde bolar, osydan úsh jyl buryn Tokıodaǵy oıyndardyń aqtyq synynda Hıj­nıak brazılııalyq Ebert Kon­seısandy eki raýnd boıy qýyp júrip sabady. Úshinshi raýndta da onyń basymdyǵy baı­qaldy. Biraq janushyra alǵa um­tylǵan qarsylasyn Konseısan báseke aıaqtalar tusta jaqsylap turyp kútip alyp, ony aýyr nokaýtqa jiberdi. Aıaǵynan ázer turǵan Aleksandrdyń ózi­niń opa­syzdyǵyna kúıingeni son­shalyq, onyń zarly daýsy «Kokýgıkan Arenasyn» jań­ǵyrt­ty. Dál sondaı erlik qaısar qazaq­tyń da qolynan keledi dep oılaımyz. Bul jekpe-jek 8 tamyzda ótedi.

Asa jeńil salmaqtaǵy Nazym Qyzaıbaıdyń da qazirgi qarqyny jaqsy. Italııalyq Djordana Sorrentıno, brazılııalyq Almeı­da de Karolıne jáne kolým­bııa­lyq Ingrıt Valensııany qapy qaldyrǵan ol jartylaı fınal­ǵa joldama aldy. Bul mejede­ Nazym byltyrǵy álem chem­pıony, Azııa oıyndarynyń jeńim­pazy, qytaılyq Ý Iýmen sheber­lik baıqasady. Kelesi báse­kede túrkııalyq Býsenaz Shákiroǵly men fılıppındik Aıra Velegas sheberlik baıqasady. Bul tartysty 7 tamyzda tamashalaımyz.