Foto: olympic.kz
Azııa oıyndary men qurlyq chempıonatynda júlde alyp júrgen Mońǵolııanyń eńseli qyzyna onyń áli jetpedi. Bul salmaqta álemde úsh ret júlde alyp, óz qurlyǵynda qarsylas shydatpaı júrgen brazılııalyq Beatrıs Soýzanyń baǵy jandy. Fınalda ol ızraıldik Raz Gershkony jolynan yǵystyrdy. Úshinshi oryndy fransııalyq Romane Dıkko men ońtústikkoreıalyq Kım Kaıýn ıemdendi. Erler arasynda asa aýyr salmaqta Teddı Rınerge teń keler eshkim tabylmady. Olımpıadanyń ashylý rásiminde alqyzyl alaýy tutandyrǵan Fransııanyń ataǵy jer jarǵan alyby sheshýshi tusta bıylǵy álem chempıony Kım Mındjonnyń tas-talqanyn shyǵardy. Tájik Temýr Rahımov pen ózbek Álisher Iýsýpov qola medaldy enshiledi.
Odan keıin komandalyq saıystardy tamashaladyq. Qazaqstan quramasy bastapqy básekede Brazılııamen aıqasty. Alǵashqy bolyp tatamıge shyqqan Ábıba Ábýjaqynova ózinen joǵary eki salmaqta óner kórsetetin Sılva Rafaelamen kúresti. Bul beldesý Olımpıada men dúnıejúzilik dodany eki ret utqan 32 jastaǵy ákki dzıýdoshynyń paıdasyna sheshildi. Kelesi kezdesýde Danııar Shamshaev Danıel Karnınnen jeńilip jatyp, báseke bel ortadan aýǵan tusta jeńisti qarsylasynyń ýysynan julyp áketti. Tokıo Olımpıadasy men Tashkenttegi álem chempıonatynda úzdik úshtikti túıindep, Panamerıka birinshiliginde úsh ret topjarǵan jampoz qazaq balýanynyń «qaqpanyna» qalaı túskenin ózi de ańǵarmaı qaldy. Úshinshi bolyp Esmıgúl Kýıýlova óner kórsetti. Osydan baqandaı 16 jyl buryn Beıjiń Olımpıadasynda qola medaldy ıelengen 36 jastaǵy ardager sportshy Ketlın Kýdrosqa 22 jastaǵy qazaq qyzynyń áli jetpedi. Abylaıhan Jubanazar ójettigimen óz qurlyǵynyń myqtysy Rafael Masedony tize búktirdi. Osy oraıda qandasymyzdyń 81, al brazılııalyqtyń 90 kg salmaq dárejesinde óner kórsetetinin de eskergen joq. Biraq odan keıin Kámıla Berliqash Parıj Olımpıadasynyń jeńimpazy Betarıs Soýzadan, Nurlyhan Sharhan Leonardo Konsalvesten utyldy. Sóıtip, Qazaqstan jarys jolynan shyǵyp qaldy. Komandalyq saıystyń fınalynda Fransııa Japonııany 4:3 esebimen utsa, qola medal Kanada men Brazılııaǵa buıyrdy.
