«WhoockAI» – IT-kompanııalarǵa jas IT-ázirleýshilerdi jasandy ıntellektige almastyrýdy usynady. Iá, qazirgi servıster saıt jasaýdy neǵurlym jeńildetken. Degenmen «frontend», «backend», derekter qory degendi bilmeıtinder óz betimen bul isti alyp kete almaıdy. Al Whoock-tyń maqsaty – kez kelgen adam saıt jasaı alatyndaı «no-code» sheshim quraý boldy. ChatGPT naryqqa enip, kóbi jasandy ıntellekt negizinde keıbir nárselerdi jaqsy ári jyldam jasaı alatynyn túsine bastady. Ársen de startapqa AI tásildi engizemiz dep sheshken. Basynda veb-saıt jasap júrgen jigitter, keıinnen startapty damytyp, jasandy ıntellekt jumysshylaryn daıarlaı bastaǵan.
«Biz AI-men jumys isteýden myqty ekenimizdi túsindik. Bul daǵdyny basqa kompanııalarǵa satamyz dep sheshtik. Atap aıtqanda, ázirleýshilerge jumsalatyn aqshany azaıtý úshin IT-bızneske jasandy ıntellekt engizýge kómektese bastadyq. Sondyqtan «Whoock»-tiń qazirgi negizgi ıdeıasy – kompanııalardyń tehnıkalyq komandalaryndaǵy «biliktiligi bastapqy deńgeıdegi baǵdarlamashyny» almastyrý. Iаǵnı olar bizdiń jasandy ıntellektimizdi bot retinde qosady, oǵan tapsyrma beredi, al jasandy ıntellekt adam sııaqty kod jazady. Bolashaqta bul vırtýaldy jumysshy poshtadaǵy habarlamalarǵa jaýap berip, toptyq jınalysqa qatysatyndaı dárejege jetýdi josparlap otyrmyz», dedi Ársen.
Bul elektrondy mamandy barlyq sala qoldanady. Ásirese tez sheshim qabyldap, gıpotezalardy salystyra alatyn jumysshy qajet bolsa, elektrondy maman daıar. IT-kompanııalarda bos jumys ornyn osy bot-ázirleýshi almastyrady. Tipti iri kompanııalar veb-ázirleýshilerdi jasandy ıntellektimen almastyrý arqyly kóp aqsha únemdemek. Negizi elimizde endi bastaǵan baǵdarlamashylardyń jalaqysy aıtarlyqtaı tómen. Al AQSh-ta tipti jańa bastaǵan IT-mamanyna mol aqsha tóleý qajet. Kompanııanyń jas mamandarǵa aılyq tólep qana qoımaı, oqytý keregin eskersek, bul startap IT salaǵa tamasha jańalyq ákeledi.
«Bizdiń botqa aı saıynǵy jazylý úshin kompanııa 149 dollar tóleıdi. Qazaqstandaǵy bastapqy deńgeıdegi baǵdarlamashylardyń ortasha jalaqysy 400–500 dollar bolsa, AQSh-ta myńdaǵan dollarmen ólshenedi. Sóıte tura, bizdiń AI ázirleýshi kólemdi jumysty atqarady. Bolashaqta dınamıkalyq baǵa qoıǵymyz keledi. Iаǵnı klıent belgilengen somany emes, bizdiń ónimdi naqty paıdalanǵan somasyn ǵana tóleıdi», dep túsindirdi joba avtory.
Bárimizge bul bottardyń kompanııaǵa qalaı «jumysqa ornalasatyny» qyzyq sekildi. Sony túsindirip óteıin. Startap eki ázirleý platformasymen jumys isteıdi: «GitHub» jáne «Jira». Joba ázirleýshileri kompanııa men botty sol jerge qosady, sodan keıin «Jira»-daǵy menedjer bottyń atyn belgilep, oǵan adamǵa nusqaǵan sekildi tapsyrma beredi. Al «GitHub»-taǵy bot alynǵan nusqaýlarǵa sáıkes kod jazady.
«Kompanııanyń kody «GitHub»-ta saqtalǵan veb-saıty bar delik. «Jira»-da menedjer «fon túsin aqtan ashyq surǵa ózgertińiz» dep jaza alady. Qaı kodty jáne qaı faıldy ózgertý kerek ekenin kórsetpeı-aq jazady. Bot bul suraýdy óńdeıdi jáne «GitHub»-ta bólek bólimshege qajetti kodty jazady. Sodan keıin tımlıd ony qaraıdy, eger bári durys bolsa, jobaǵa qoldanady», dedi Á.Qylyshbek. Oksford ýnıversıtetiniń zertteýine sensek, aldaǵy bes jyldyqta Eýropadaǵy jumys oryndarynyń 40 paıyzyn, AQSh-taǵy jumys oryndarynyń jartysynan kóbin, damýshy memleketterdegi jumys oryndarynyń birazyn avtomatty júıe almastyratyn bolady. Ársen tanystyrǵan jobaǵa qarasaq, bul zertteýdiń túbegeıli ras ekenine shúbásiz senesiz.
