Ertede osy ólkeni mekendep, keıin joıylyp ketken Balqash jolbarysy bas rámiz retinde tańdalypty. Aýqymdy is-shara aıasynda kókshekóldiń jaǵalaýynda týrızm klasterin damytýdyń negizgi bastamalary júzege asyp otyr. «Kókshe teńizdiń» sýyna túsip, qumyna qyzdyrynǵysy keletin saıahatshylardyń qatary keıingi úsh jylda artyp otyr. Buǵan «Balkhash TourFest» festıvaliniń de yqpaly bar deıdi týrızm mamandary.
Festıvalda sý qoımasyn tazartatyn qurylǵy iske qosyldy. Qurylǵy kóldiń betindegi qaldyqtardy tazalaıdy. Munyń kómegine aıyna 7-10 márte júginedi. Qurylǵy Balqash qalasy ákimdiginiń balansyna berildi.
Ejelden jelkendi qaıyqpen elge belgili Balqash jelkendi regatasynyń ashylýy da úlken qýanysh syılady. Kól betindegi jarysqa Almaty, Qaraǵandy, Túrkistan oblystarynyń, Balqash, Shardara qalalarynyń kil myqtylary qatysty.
«Regata Balqash kólinde jańa jelkendi sport túriniń kúsh alýyna septigin sózsiz tıgizedi», deıdi respýblıkalyq deńgeıdegi bas tóreshi, Qazaqstannyń birneshe dúrkin chempıony Iýrıı Pasynkov.
Ashyq aspannyń astyndaǵy kınoteatrdan elimizdiń jáne shetel rejısserleriniń úzdik fılmderi kórsetildi. Batýt aımaǵynda «Jasyl el» jastarynyń arasynda Ninja Battle, Byroglaz events oıyndary ótkizildi. Úlkenderge tańǵy fıtnes, gımnastıka, tynys alýǵa arnalǵan jattyǵýlar, ıoga jasaýǵa mamandar nusqaýlyq berdi. Jaǵajaı voleıboly, jaǵajaı kúresi, ondaǵy arqan tartý jáne «Kóńildi starttar» boıynsha jaǵajaı draıv týrnıri dýmandy dúbirge bóledi. Jappaı júzý de jurttyń kóńilinen shyǵyp jatty. Fýtbolkalarǵa sýretter, balalarǵa akvagrım salyndy. Voleıbol, kir tasyn kóterý sporty jáne armrestlıng boıynsha jarys uıymdastyryldy. Doıby, shahmat, toǵyzqumalaq sekildi taqta oıyndary da tartysty ótti.
Festıval kezinde aýmaqty taza ustaýda úlken kúshti qajet etedi. Uıymdastyrýshylar onyń jolyn ońaı taýypty. Úsh bos bótelkege 1 balmuzdaq úlestirgen. Buǵan halyq belsendi qatysty.
– Balqash kólin týrızmniń temirqazyǵyna aınaldyrýǵa zor múmkindik bar. Bul úshin aldymen qarjylyq jáne zańnamalyq turǵydan qoldaý qajet. Osy baǵytta jumystar júzege asyrylyp jatyr. Jaqynda ǵana ótken festıvalda etnomýzyka men ulttyq oıyndarǵa, onyń ishinde arqan tartys, qolkúres, toǵyzqumalaq, asyq atý sekildi oıyndarǵa basty nazar aýdaryldy. Kelýshilerge arnaıy ulttyq aspaptar kórmesi uıymdastyryldy. Festıvalǵa eki kúnde 30 myńǵa jýyq adam keldi. Kelýshiler úshin jaǵalaýǵa deıin tegin tasymaldaý uıymdastyryldy. Avtobýstar ár 15 mınýt saıyn 09.00-den 00.15-ke deıin halyqqa tegin qyzmet kórsetti. Aqysyz kólik turaǵy, polısııa beketi, jedel járdem qyzmeti men qutqarýshylar toby júıeli jumys istedi. Munyń barlyǵy – demalýshylarǵa jasalǵan qolaıly jaǵdaı, – deıdi oblystyq mádenıet, arhıvter jáne qujattama basqarmasynyń basshysy Erkebulan Jumakenov.
Festıvaldy ónerimen qyzdyrǵan Azamat Baqııa jáne «Joshy» etnofolklorlyq tobynyń ánderi men sheberlik sabaǵy jurtshylyqqa rýhanı azyq boldy. Qazaq ónertaný ǵylymynyń órkendeýine úlken úles qosyp otyrǵan toptyń sheberlik sabaǵynda ulttyq aspaptardy jasap kórsetti. Sáken Seıfýllın atyndaǵy Qaraǵandy oblystyq akademııalyq qazaq drama teatry balalarǵa «Kerik pen múıiztumsyq» ertegisin sahnalady. «Dance battle», «timur’s team» sekildi zamanaýı bı toptary men «Ivory live band» kaver toby qonaqtardyń kóńilin kóterdi. Al energy shynyǵý jattyǵýlarmen zumba bıi, «Aspazshylar baıqaýynyń» áseri tym basqa. Oblystyń qala, aýdandaryndaǵy horeografııalyq ansamblderdiń konserti Kókshe kóldiń jaǵasyndaǵy merekeniń kórigin qyzdyrdy. Qas qaraıǵan soń úlken sahnada DJ Nıkıta Fılatov án aıtyp, kóbik keshi ótti.
– Osyndaı qadammen Balqashtyń Birikken Arab Ámirlikteri, Dýbaı, Túrkııa sııaqty týrızmdi damytqan elderdiń qataryna enýge talpynys jasap jatqanymyz qýantady. Bolashaqta oǵan jetetinimizge senimdimiz, – deıdi Balqash qalasynyń mádenıet, tilderdi damytý, dene shynyqtyrý jáne sport bóliminiń bastyǵy Izbasar Shákenov.
Qolónershilerdiń kádesyılary men zergerlik buıymdary sórege qoıylǵan kórmeni de kópshilik qyzyǵa tamashalady.
Festıvaldyń hedlaıneri Dastan Orazbekov shyrqaǵan ánge jastar qosyldy. Festıvaldyń jabylý saltanatyndaǵy otshashý kelýshilerdiń kóńiline shýaq syılady. Elimizdiń túpkir-túpkirinen kelgen qonaqtar festıvaldan qımaı tarqasty.
Qaraǵandy oblysy,
Balqash qalasy
