Toqsan tulpar topqa tústi

Jalpy júlde qory 24 900 000 teńgeni quraǵan jarys báıgeniń 4 túri: ­qunan báıge, top báıge, jorǵa jarys jáne alaman báıge boıynsha ótti.

– Bul báseke – báıgeden el chempıo­natynyń 8-kezeńi. Al bir jaǵynan osy kúzde Astanada ótetin V Dúnıejúzilik kóshpe­liler oıyndaryna irikteý ese­binde ótip jatyr. At jarysyna elimizdiń túkpir-túkpirinen eń úzdik jylqylar jınaldy. Olar báıgeniń tórt túrinen, ıaǵnı qunan báıge, top báıge, alaman báıge jáne jorǵa jarys atalymy boıynsha synǵa túsedi. Ár báıge túrine shamamen 25 tulpar qatysty. Bul attardyń jaǵdaıy jaqsy, aldaǵy úlken dodaǵa da­ıyn, – dedi «Báı­ge» federasııasynyń atqarýshy dırektory Altaı Bımen.

Qunan báıgeden birinshi bolyp kelgen «Qamysqulaq» atty tulpardyń shabandozy Aslanbek Abdyqal jeńis jolynda bap­ker­diń keńesi kómek bolǵanyn aıtady.

– Bapkerdiń aıtýymen shaýyp otyrdym. Ol maǵan jarys bastala sala aldyńǵy topta bolýǵa keńes berdi. Sońǵy aınalymda birinshi bolyp alǵa ozdym. Márege 500 metr qalǵanda artymnan taǵy bir at kele jatty. Jetip ala ma dep qorqyp edim, biraq men birinshi keldim. Endi kóshpeliler oıyndaryna da­ıyndalamyn, – dedi jas shaban­doz Aslanbek Abdyqal.

2-orynǵa «Naıza» atty qunan ıe boldy, shabandozy – Arnat Murathan. Júldegerler úshtigin «Aıshýaq» atty atqa mingen Ańsar Arystanbek túıindedi.

Top báıgede shabandoz Álı­han Jáni­bekuly «Ǵasyr» atty sáı­gúlikpen máre sy­zyǵyn birin­shi bolyp kesse, 2-oryndy Dilnur Nurmuqash «Ravshan» atty tul­pa­rymen, 3-oryndy Qaıyrjan Álıhan «Táýekelge» minip jeńip aldy.

Jorǵa jarysynyń qorytyn­dysyna kelsek, 1-orynda – «Orda» (shabandozy Iýrıı Lymar), 2-orynda – «Vypýsk» (shabandozy Ánýarbek Abdrahmanov), 3-orynda – «Aqjaýyn» (shabandozy Erbulan Tileǵalıuly).

Alaman báıgeniń nátıjesi bo­ıynsha 1-oryndy «Soflor Lend» atty aıǵyr ıelense (shabandozy Ámir Amanuly), 2-oryndy «Be­reke» (shabandozy Irınat San­jar), 3-oryndy «Shaıkúreń» (shabandozy Arnat Murathan) utty. Is-sharanyń seriktesteri – Ul­tyq sport qaýymdastyǵy, res­pýb­lıkalyq «Báıge» federasııasy jáne Pavlodar oblysynyń ákimdigi.

Eske sala keteıik, respýb­lıkalyq «Báıge» federasııa­sy Qazaqstan Respýb­lıkasy Ulttyq sport qaýymdastyǵy­nyń quramyna kiredi. Qaýymdas­tyq quramynda budan ózge «Aýdaryspaq», «Kókpar», «Teńge ilý», «Sadaq atý», «Jamby atý», «Qusbegilik», «Asyq atý», «Joryq» at sporty t.b. federasııalar bar. Ulttyq sport qaýymdastyǵyn belgili kásipker, mesenat, «Altyn Qyran Foundation» qoǵamdyq qory qamqorshylyq keńesiniń tóraǵasy Islambek Saljanov basqarady.

Bıyl 8-13 qyrkúıekte Astana qala­synda V Dúnıejúzilik kóshpeliler oıyndary ótedi. Is-sharaǵa 89 elden 2 myńnan asa sportshy qatysady dep jos­par­­lan­ǵan. Astanada ótetin Dú­nıe­júzilik kósh­peliler oıyndarynda barlyǵy 21 sport túri­nen 97 medal jıyntyǵy sarapqa salynady.

Pavlodar