Baılanys aıasy keńeıedi

Atyraý oblysymen iskerlik baılanysty ornatýǵa qushtarlyq tanytýshylar qatarynda Reseı quramyndaǵy Bashqurtstan Respýblıkasy da bar. Sońǵy kezde atyraýlyq stýdentter osy eldiń joǵary oqý ornynda munaıshylyq kásipti ıgerýde. Munaıly óńir men Bashqurtstan arasynda ózara yntymaqtastyq týraly memorandýmǵa da qol qoıylǵan. Osy memorandým aıasyndaǵy iskerlik baılanysty burynǵydan da keńeıte túsýge taǵy bir oń qadam jasalyp otyr. Osy maqsatty kózdegen Bashqurtstandaǵy «Impýls» ǵylymı-óndiristik kásipornynyń ǵylymı jetekshisi, hımııa ǵylymdarynyń doktory Oleg Ptashko Atyraýǵa erkin kelip, óńir basshylyǵymen kezdesti. Onyń aıtýynsha, Atyraýdaǵy arnaıy ekonomıkalyq aımaqta birlesken kásiporyn qurýdyń mol múmkindigi bar. «Biz munaı-gaz salasyna qajetti hımııalyq reagentter shyǵaratyn óndiris ornyn ashýdy, sonymen birge, bıznesti qurylys materıaldary men ósimdiktiń ósýin retteýshi retinde ázirleýge ártaraptandyrýdy  josparlap otyrmyz. Bul josparymyzdy barlyq talaptar men ekologııalyq normalardy saqtap, eki-úsh jylda iske asyrǵymyz keledi. Bizdiń kásipornymyzdyń ǵylymı áleýeti joǵary deı alamyz. Sonyń mysaly retinde 1996 jyldan beri hımııalyq reagentter shyǵaratynymyzdy aıtýǵa bolady. О́zimizdiń arnaıy eki zerthanamyz jumys isteıdi.  Reseıdegi jáne Bashqurtstandaǵy ǵylym akademııalarmen tyǵyz baılanys ornattyq. Endi biz Atyraýda da sońǵy tehnologııalar negizinde hımııalyq reagentter shyǵarýmen birge, qurylys, aýyl sharýashylyǵy salalarynda da eki jaqqa tıimdi jobalardy iske asyrýǵa nıettimiz», deıdi «Impýls» ǵylymı-óndiristik kásipornynyń ǵylymı jetekshisi Oleg Ptashko. Oblys ákimi Baqtyqoja Izmuhambetovtiń aıtýynsha, Atyraýda reseıliktermen birlesken jobalardy iske asyrýǵa ábden bolady. Bul bir jaǵynan kórshiles elder arasyndaǵy iskerlik qarym-qatynastyń aıasyn keńeıtetin bolsa, ekinshiden, mundaı jobalar eki eldiń ekonomıkasyn órkendetýge serpin beredi. Joldasbek ShО́PEǴUL, «Egemen Qazaqstan». Atyraý oblysy.