Bul bassúıekti 1908 jyly belgili ólketanýshylar, aǵaıyndy Vıktor men Alekseı Beloslıýdovtar Ertistiń oń jaǵalaýyndaǵy Podpýsknoe eldi mekeniniń mańaıynan tapqan. Sol jyldary Vıktor men Alekseı mýzeı ıgiligi úshin aıanbaı eńbek etip, qorǵa kóptegen qundy jádigerdi syıǵa tartady. Sonyń biregeıi osy bassúıek ekenin mýzeı mamandary da erekshe nazar sala aıtady. Búgingi kúni mýzeı qorynda saqtalǵan 137 myńnan astam jádigerdiń ishindegi osy bir eleýli dúnıeniń azý tisterin ǵalymdar arheologııa jáne etnologııa magıstri, Nazarbaev ýnıversıteti qazaq tili jáne túrkitaný kafedrasynyń oqytýshysy Aıdyn Júnishanovtyń bastamasymen 2020 jyly radıokómirtektik saraptamaǵa jibergen.
Semeı qalasynyń oblystyq tarıhı-ólketaný mýzeıiniń dırektory Qaırat Sabyrbaı: «2023 jyly atalǵan bassúıektiń ǵylymı antropologııalyq músindik rekonstrýksııasy jasaldy. Búgingi kúnde qyzyǵýshylyq tanytqan mýzeı qonaqtary osy aýmaqta tirlik keshken turǵyndardyń belgili bir kezeńdegi kelbetin tamashalaı alady», deıdi.
Lıtva eliniń astanasy Vılnıýs qalasyndaǵy Fızıka-tehnologııa ǵylymdar ortalyǵynyń memlekettik ǵylymı zertteý ınstıtýtynda ıadrolyq zertteýler bóliminiń aǵa ǵylymı qyzmetkeri, zerthana meńgerýshisi Jılvınas Ejerınskıstiń jetekshiligimen zertteý júrgizilgen. Nátıjesine, súıensek, antropologııalyq materıal Joshy ulysynyń ústemdik qurǵan kezine sáıkes keletini anyqtaldy. Materıal HIII ǵasyrdyń sońy XIV ǵasyrdyń basyna jatady. Osydan-aq biz sóz etken antropologııalyq nysandy baǵzy zamanda ǵumyr keshken babalardyń bassúıegi dep topshylaýǵa bolady. Bizdińshe, bul bassúıekti ábden zerttep bolǵan soń kóne qorymnyń birine jerlegen durys.
Abaı oblysy
