Foto: «Býrabaı» MUTP baspasóz qyzmeti
Ádette týrısterdiń kóptep kelýi jaz aılarymen tuspa-tus bolady. Ásirese Býrabaı, Shortan, Qatarkól, Úlken Shabaqty kólderiniń jaǵasynda demalǵandardyń qarasy qalyń. Al sporttyq balyq aýlaýǵa áýester Jókeı kólin jaǵalaıdy eken.
«Parktiń týrıstik júktemesi artyp barady. Demalýshylar negizinen mamyr-qyrkúıek aılary aralyǵynda, ásirese shildede kóp bolady. Maýsymda olardyń sany júz myńnan asty. Ulttyq parktiń biregeı tabıǵaty, sanatorlyq-kýrorttyq mekemelerdiń, ońaltý jáne saýyqtyrý ortalyqtarynyń alýan túrliligi týrısterdiń jyl boıy kelýin qamtamasyz etedi. Osy oraıda Ulttyq park ujymy rekreasııalyq júkteme tepe-teńdigin saqtap, tabıǵı keshendi qorǵaý úshin barlyq qajetti sharalardy qabyldap jatqanyn atap ótkim keledi», deıdi «Býrabaı» MUTP dırektorynyń orynbasary Venera Nuǵmanova.
Jeti aıdyń ishinde saıabaq aýmaǵyna kirgen kólik sany 175 347-ge jetti. Árbir úshinshi jolaýshylar kóligi saıabaqqa orta eseppen keminde 3 ret kirgen.
Dırektor orynbasarynyń aıtýynsha, kelýshiler sanynyń artýy saıabaqtyń ekojúıesine aıtarlyqtaı áser etedi. Bul, eń aldymen, turmystyq qaldyqtardyń kóbeıýine qatysty. Jyl basynan beri Ulttyq park aýmaǵynan 440 tonnaǵa jýyq qoqys jınalyp, shyǵaryldy.
«Ulttyq parktiń ekojúıesine túsetin rekreasııalyq júkteme men bıoprosesterdiń áserin tereńirek túsiný úshin ótken jyly bizdiń ǵylymı qyzmetkerler Qazaqstannyń geografııa jáne sý qaýipsizdigi ınstıtýtynyń ǵalymdarymen birlesip, keshendi ǵylymı zertteýlerdi qolǵa aldy. Zertteý gıdrologııa, orman sharýashylyǵy, rekreasııa, terıologııa, klımatologııa syndy baǵyttar boıynsha júrgiziledi. Orman sharýashylyǵyndaǵy qaterler zertteledi. Biz sý jınaý basseınderin qaıta qurý, aıyrtuıaqty janýarlar sanyn retteý boıynsha usynystar kútemiz. Týrıstik júktemeniń artýy ekojúıege qanshalyqty áser etetinin túsingimiz keledi. Tolyq dıagnostıka Ulttyq parkti odan ári damytýǵa qatysty ǵylymı negizdelgen sheshimder qabyldaýǵa múmkindik beredi», dedi V.Nuǵmanova.
Týrıster aǵynynyń artýy jergilikti ınfraqurylymdy damytý qajettiligin de týǵyzady. Demalýǵa jaıly jaǵdaı jasaý úshin Ulttyq park qyzmetkerleri kólderdiń jaǵalaýlary men basqa da týrıster jıi baratyn jerlerdi abattandyryp otyrady.
