Foto: Aqorda
Prezıdent sammıt jumysyna qatysqany úshin Serdar Berdimuhamedovke alǵys aıtyp, onyń bul sapary eki el arasyndaǵy kópjaqty seriktestikti odan ári ilgeriletý turǵysynan mańyzdy ekenin atap ótti.
«Qazaq-túrikmen qarym-qatynasy tabysty damyp keledi. Sondaı-aq strategııalyq áriptestik sıpatyna tolyq saı. Kópqyrly memleketaralyq baılanystarymyzǵa qoldaý kórsetkenińiz jáne ony únemi nyǵaıtýǵa atsalysqanyńyz úshin Sizge rızashylyǵymdy bildiremin. Buǵan deıin aıtqanymdaı, ekonomıkalyq yntymaqtastyǵymyzdyń deńgeıi joǵary. Úkimetter ózara saýda kólemin 1 mıllıard dollarǵa jetkizý úshin jumys istep jatyr. Buǵan elderimizdiń barlyq múmkindigi bar. Energetıka, ónerkásip, kólik, logıstıka jáne basqa da salalardaǵy birqatar jobalar júzege asyrý satysynda tur. Mádenı-gýmanıtarlyq baılanystardy arttyrýǵa da qolaıly jaǵdaı jasalǵan», dedi Memleket basshysy.
О́z kezeginde Serdar Berdimuhamedov qonaqjaılyq tanytqany úshin Qasym-Jomart Toqaevqa alǵys aıtty. Sonymen qatar eki el arasyndaǵy yntymaqtastyq qarqyndy damyp kele jatqanyna toqtaldy.
«Túrikmenstan Qazaqstanmen yntymaqtastyqqa basa mán beredi. Elderimiz arasynda belsendi saıası dıalog ornaǵan. Saýda-ekonomıkalyq jáne mádenı-gýmanıtarlyq salalardaǵy baılanystar jandanýda. Qurmetti Qasym-Jomart Kemeluly, Siz bıyl kúzde Túrikmenstanǵa resmı saparmen kelesiz dep kútemin. Sondaı-aq Maqtymquly Pyraǵynyń 300 jyldyq mereıtoıyna arnalǵan halyqaralyq forýmǵa qatysýǵa shaqyramyn», dedi Túrkimenstan Prezıdenti.
Kezdesý barysynda memleketter basshylary saýda-ekonomıka, energetıka, munaı-gaz jáne kólik-logıstıka salalaryndaǵy qazaq-túrikmen yntymaqtastyǵynyń damý perspektıvasyn talqylady. Sonymen qatar mádenı-gýmanıtarlyq qatynastardy keńeıtý máselesin qarastyrdy.
