Foto: instagram.com/mfa_kz/
Jıynda Ortalyq Azııanyń syrtqy saıası vedomstvolarynyń basshylary altynshy Konsýltatıvtik kezdesýdiń kún tártibi men qorytyndy qujattarynyń jobalaryn qarady.
Keńestiń ashylý saltanatynda sóz sóılegen Qazaqstan Respýblıkasy Premer-mınıstriniń orynbasary – Syrtqy ister mınıstri Murat Nurtileý aldymen áriptesterine keńeske qatysýǵa shaqyrýyn qabyldaǵany úshin rızashylyǵyn bildirdi.
– Búgingi kezdesý bizdiń ortaq qoldaýymyzdy jáne besjaqty yntymaqtastyqty odan ári nyǵaıtatyn mindetterdi aıǵaqtaıdy. Biz tóraǵalyq sheńberinde atqarylǵan birlesken jumysty qorytyndylaımyz, sondaı-aq óńirlik jáne halyqaralyq kún tártibindegi ózekti máseleler boıynsha pikir almasýymyz kerek. Bul kezdesýdiń nátıjeli bolatynyna jáne Ortalyq Azııa elderi kóshbasshylarynyń sammıti tabysty ótetinine senimdimin, – dedi Murat Nurtileý.
Sondaı-aq ol bizdiń kóshbasshylarymyzdyń saıası erki men danalyǵynyń arqasynda aımaqta senim ahýaly ornaǵanyn atap ótti.
– Jyl saıyn ózara tıimdi jan-jaqty yntymaqtastyqty tereńdetý úshin josparly jaǵdaı jasalyp jatyr. Astanada Ortalyq Azııa memleketteri basshylarynyń alǵashqy konsýltatıvtik kezdesýi ótken sátten bastap eleýli progreske qol jetkizdik, – degen elimizdiń Syrtqy ister mınıstri Ortalyq Azııadaǵy saıası-ekonomıkalyq kórsetkishterge toqtaldy.
Mınıstrdiń aıtýynsha, qazirgi tańda óńir elderiniń jıyntyq IJО́ shamamen 450 mlrd dollardy qurap otyr. Nátıjesinde, ózara saýdanyń turaqty ósýi qamtamasyz etildi. Sonymen qatar bul kórsetkish keıingi 5 jylda 80%-ǵa ósip, 11 mlrd dollarǵa jetken eken.
– Parlamentter, qaýipsizdik keńesteri, salalyq vedomstvolar jelisi boıynsha ózara is-qımyl tetikteri, sondaı-aq áıel kóshbasshylar dıalogi iske qosyldy. Bıyl biz praktıkalyq ózara is-qımyldyń jańa sapaly deńgeıine jettik. Ulttyq úılestirýshiler keńesi óz qyzmetin bastady. О́ńirlik kooperasııadaǵy qol jetkizilgen progress halyqaralyq qoǵamdastyqta da úlken qyzyǵýshylyq týdyrdy, sondaı-aq bizdiń eń jaqyn strategııalyq seriktesterimiz qoldaıdy, – dedi M.Nurtileý.
Mınıstr buǵan Qytaı, Reseı, AQSh, Úndistan, Japonııa, Koreıa Respýblıkasy, Germanııa, Italııa, sondaı-aq birqatar kópjaqty qurylymnyń qatysýymen «Ortalyq Azııa+» formatynda ótkizilgen kezdesýlerdiń qorytyndylary dálel ekenin atap ótti.
Murat Nurtileý keńes otyrysy barysynda bizdiń el tóraǵa retinde konsýltatıvtik kezdesýlerdiń áleýetin odan ári nyǵaıtý jumystaryn belsendi atqarǵanyn aıryqsha aıtyp ótti.
– Qaýipsizdik keńesteri hatshylarynyń, energetıka jáne aqparat mınıstrleriniń kezdesýleri, sondaı-aq Ortalyq Azııa elderi tarıhshylarynyń forýmy alǵash ret ótkizildi. Osyǵan baılanysty qazaqstandyq bastamalardy qoldaǵany jáne ónerkásip, energetıka, kólik jáne logıstıka salalarynda birqatar qujatty daıyndaý boıynsha birlesken jemisti jumysy úshin alǵys aıtamyn. Búgingi sammıttiń qorytyndysy boıynsha memleket basshylary «Ortalyq Azııa – 2040» óńirlik kooperasııasyn damytý tujyrymdamasyna qol qoımaq. Osy qujattardy iske asyrý ózara tıimdi áriptestikti odan ári údemeli damytýǵa jáne bizdiń óńirdiń halyqaralyq sýbektıvtiligin nyǵaıtýǵa qyzmet etetinine senimdimin, – dedi mınıstr sózin qorytyndylaı kelip.
Budan basqa, delegattar keńes otyrysynda óńirlik baılanysty tereńdetý jáne besjaqty ózara is-qımyldy odan ári damytý keleshegi týraly pikir almasyp, óńirlik jáne halyqaralyq kún tártibiniń ózekti máselelerin talqylady.
