Erekshe esim-soı ıesi

1995 jyly Semeı qala­synda dúnıe esigin ashqan sábıge Qunanbaı áýletiniń úlkenderi qandaı at qoıamyz dep bas qatyrǵan joq. Sebebi náreste ómirge kelerden bir apta buryn baqıǵa kóshken Ekinshi dúnıejúzilik soǵysqa qatysqan atasy «Abaı» degen at qoıyńdar dep ósıet etipti. Sol jyly dúrkirep ótken hakim Abaı Qunanbaıulynyń 150 jyldyq mereıtoıy da áser etken bolar dep topshylaıdy jaqyndary. Búgingi kúni Abaı oblysy polısııa departa­­men­ti Esirtki qyl­mysyna qar­sy is-qımyl basqarmasy­nyń jedel ýákili bolyp qyzmet atqaratyn Abaı Shalqaruly atasy qoıǵan osy bir aıaýly atty abyroımen alyp júr.

Mektep jasynda júr­gende Abaı esiminiń bar aýyrt­palyǵyn sezinip, qınalǵanyn búginde jymıyp qana esine alatyn Abaı Qunanbaev: «Sa­baqty jaqsy oqýǵa tyrys­tym. Úıdegi ata-anam da, muǵalimder de barynsha bilikti, bilimdi bolýǵa baýlydy. Sabaq oqymaı ne qandaı da bir tentektik is qylsam, Abaı esiminiń máni men maǵynasyn tereń túsindiretin. Sodan keıin be, alǵyr bolyp alǵa umtylýǵa, zamandastardyń aldy bolýǵa qulshyndym», deıdi.

Orta mektepti támamdaǵan soń Almatyǵa attandy. Jas Abaı IIM Almaty akademııa­synyń kýrsanty atandy. Ishki ister salasynyń bilgir mamandaryn daıarlaıtyn oqý ornyn oıdaǵydaı bitirip, leıtenant shenin alyp shyqty.

Abaı Qunanbaev aqyn Abaı shyǵarmashylyǵyn bala kezden bilgeniniń artyq bol­maǵanyn aıtady. Eńbek jolyn О́skemen qalasy Ishki ister basqarmasynyń krımınaldyq polısııa bóliminiń jedel ýákili bolyp bastady. Osy bólimde qyzmet atqara júrip, qalta jáne páter urlyqtaryn ashýmen aınalysatyn arnaıy top ókilderimen tize qosyp qyzmet atqardy. 2020 jyly Shyǵys Qazaqstan oblysy polısııa departamenti krımınaldyq polısııa basqarmasynyń jeke tulǵaǵa qarsy qylmystardy ashý bóliminiń jedel ýákili laýazymyna aýysty. Eki jyl boıy qyzmet baspaldaǵyn oıdaǵydaı atqaryp, Abaı oblysy qurylǵannan keıin oblys ortalyǵyna kóship keldi. 2023 jyldan beri Abaı oblysy Polısııa departamentiniń esirtki qylmysyna qarsy is-qımyl basqarmasynyń jedel ýákili bolyp qyzmet etedi.

Uly aqyn esimin ıelenip júrýdiń aýyrtpashylyǵy men jeńil tustary týraly suraǵymyzǵa polısııa kapıtany: «Dana bolsyn, dana bolmasa da, sol danalyqty túsiner ul bolsyn dep at qoıǵannan keıin Abaı esimin alyp júrý aýyr ne qıyn dep aıtýǵa bolmas. Bastysy, osyndaı esimiń bolǵannan keıin ártúrli jaǵymsyz qylyqtan boıyńdy aýlaq ustaısyń. Jaýapkershilikti sezinesiń, bul aldymen Abaı atyn ja­mandyqtan arashalaý bolsa, ekinshiden, ata-ana úmitine selkeý túsirmeý», deıdi Abaı Qunanbaev aǵynan jarylyp.

Abaı oblysy