Sarabdal saıasattyń saltanaty

Elbasy Qazaqstan Respýblıkasy Prezıdentin saılaý nátıjeleri boıynsha exit-poll qorytyndysyn jarııalaý rásimine qatysty, dep habarlady Prezıdenttiń baspasóz qyzmeti. Is-shara barysynda exit-poll nátıjeleri jarııalanǵan jańa­lyqtar shyǵarylymy kórsetildi. Onyń qorytyndysyna sáıkes, prezıdenttik saılaýda Nursultan Nazarbaev eń kóp daýys jınady. Jınalǵandarǵa arnaǵan sózinde Qazaqstan Prezıdenti búkil Qazaqstan halqyna rızashylyǵyn bildirdi. – Men árbir azamatqa, árbir otbasyna maǵan el damýyndaǵy búkil Táýelsizdik jyldary boıy senim artqany jáne osy jolǵy saılaýda qoldaǵany úshin rızamyn. Kezekten tys prezıdenttik saılaý ótkizý ıdeıasy Qazaqstan halqy Assambleıasyna tıesili. Bul sheshimdi qazaqstandyqtar qoldady. Meniń kandıdatýramdy usynǵany úshin «Nur Otan» partııa­syna rahmet aıtqym keledi, partııa músheleri jergilikti jerlerde belsene jumys júrgizdi. Sondaı-aq, Respýblıkalyq qo­ǵam­dyq shtabqa da rızamyn. Onyń ókilderi búkil respýblıkany aralady, halyqpen kezdesip, elde júrgizilip jatqan saıasatty túsin­dirdi. Barlyq senimdi ókilder men belsendilerge alǵys aıtamyn, – dedi Memleket basshysy. Nursultan Nazarbaev atqa­rylyp jatqan jumystardy res­pýblıka azamattarynyń taǵy da qoldaǵanyn atap ótti. – Osyndaı jalpyǵa ortaq senim bolmasa, alǵa qoıylǵan mindetterdi júzege asyrý qıyn bolar edi. Saılaýǵa rekordtyq qatysý kórsetkishi qazaqstandyqtardyń birligin, turaqty memlekette ómir súrýge degen qulshynysyn, sondaı-aq, men usynǵan baǵdarlamalardy qoldaýyn kórsetti. Osynyń bári Otanymyzdyń bolashaǵy men órkendeýi úshin eselengen kúsh-qýatpen jumys isteýdi mindetteıdi, – dedi Qazaqstan Prezıdenti. Memleket basshysy qazaqstan­dyq­tardyń tutastyǵyn, damýǵa jáne bolashaq urpaq úshin bıik maqsattarǵa birlesip jetýge degen talpynysyn kórset­ken saılaýdyń  tarıhı mánine nazar aýdardy. – Saılaý barysynda zańnama talaby tolyq saqtaldy. Saılaýdy baıqaýǵa kóptegen sheteldik baıqaýshylar men jýrnalıster keldi. Qazaqstan álemdik qoǵamdastyqqa bıik saıası mádenıet pen demokratııa qaǵıdattaryn pash etti, sol arqyly óz deńgeıin álem aldynda taǵy bir satyǵa kóterdi, – dedi Nursultan Nazarbaev. Qazaqstan Prezıdenti el aldyna qoıylǵan aýqymdy maqsattarǵa jetý úshin barlyq múmkindikter bar ekenin aıtty. – Bizde bilikti mamandar, jetkilikti qarjy-qarajat, saıası ornyqtylyq, halyqtyń birligi men dostyǵy bar. Biz ındýstrııalandyrý, «Nurly Jol» baǵ­dar­lamasy aıasynda qoıylǵan mindet­terdi oryndaımyz, Qazaqstannyń álemdegi damyǵan 30 eldiń qataryna kirýin qamta­masyz etip, qazaqstandyqtardyń turmysyn jaqsartamyz, – dedi Memleket basshysy. Sońynda Nursultan Nazarbaev Qa­zaq­stan halqyna baq-bereke jáne tabys  tiledi. Is-shara barysynda Memleket basshysy sondaı-aq, úzeńgilesterimen já­ne respýblıkalyq qoǵamdyq shtab múshe­lerimen áńgimelesti. * * * Qazaqstan Respýblıkasy Prezı­dentiniń saılaýy barysynda Demokratııa ınstıtýty eldiń barlyq óńirinde jalpyulttyq exit-poll júrgizdi. Zertteýler 14 oblys­ty, sondaı-aq Alma­ty jáne Astana qalalaryn qamtydy. Exit-poll saǵat 7.00-den 20.00-ǵa deıin 550 saılaý ýchaskesinde, sonyń ishinde 312 qalalyq jáne 238 aýyldyq saılaý ýchaskesinde ótkizildi. Exit-poll-dy uıymdastyrý jáne ótkizý isine 1500-den astam adam tartyldy. Qol­danylǵan saýaldama ádisin sheteldik jáne qazaqstandyq ǵalymdar birneshe ret synaqtan ótkizgen, bul senimdi, repre­zentatıvti málimet alýǵa múmkindik beredi. Qazaqstan Respýblıkasy prezı­dent­tigine kandıdattar boıynsha exit-poll nátıjesi mynadaı boldy: N.Nazarbaevqa – 97,5%, T.Syzdyqovqa – 1,87%, A.Qu­saıy­novqa  0,63% daýys berilgen. ASTANA

QAZAQ ELI BAS IIP PARASATQA, AZAMATYN MINGIZDI AQBOZ ATQA!

Keshe Prezıdent Nursultan Nazarbaev Astanadaǵy Oqýshylar saraıynda ornalasqan №81 saılaý ýchaskesine kelip, Qazaqstan Prezıdentiniń saılaýynda daýys berdi. Daýys bergennen keıin buqa­ra­lyq aqparat quraldarynyń ókil­derine bergen suhbatynda N.Na­zarbaev memlekettiń taǵy bir tarıhı naýqandy basynan ótke­rip otyrǵandyǵyn atap kórset­ti. «Halyqtyń talabymen, Qazaq­stan halqy Assambleıasynyń usy­nysymen kezekten tys prezı­denttik saılaýdy ótkizý máselesin qol­dadyq. Búgin elimiz úshin mańyzdy saılaý ótip jatyr», – dedi Elbasy óz sózinde. Memleket basshysy daýys berý quqyna ıe 9,5 mıllıonǵa jýyq qazaqstandyq 9700-den asa saılaý ýchaskesinde saılaýǵa qaty­syp jatqanyn atap ótti. «Búgin aza­mattar konstıtýsııalyq paryzyn óteý quqyǵyna ıe. Ekinshi jaǵy­nan, olardyń óz bolashaǵyn tań­daýǵa, bıliktiń qyzmetine baǵa berýge múmkindikteri bar. Qazaq­standyqtar eń aldymen elimiz­diń turaqty damýy úshin, halyq turmysynyń jaqsarýy úshin, óziniń jáne balalarynyń bola­shaǵy úshin, sondaı-aq, meniń basshy­ly­ǵymmen elde júrgizilip jatqan saıasatty qoldaý úshin daýys beretinine senimdimin», – dedi Qazaqstan Prezıdenti. Nursultan Ábishuly saılaýdyń transparenttiligine de nazar aýdardy. «Saılaý úderisi men daýys berý barysyn is júzinde 40-qa jýyq el men halyqaralyq uıymdar atynan ókildik etken 850-deı sheteldik baıqaýshylar baqylaýda. 170-ke tarta sheteldik BAQ tirkeldi. Biz búkil álemge zańdylyqtyń saqtalýyn, ashyqtyqty kórsetip otyrmyz. Baıqaýshylar ádil baǵasyn beredi dep sanaımyn jáne saılaýǵa qatysyp, qyzyǵýshylyq tanytqany úshin barshaǵa aldyn ala rahmet aıtqym keledi», – dedi Qazaqstan Prezıdenti. Sonymen qatar, Memleket basshysy osy saılaýda qazaqstandyqtar ózine senim bildiretin bolsa, birinshi kezektegi áreketi bes ınstıtýttyq reformany júzege asyrý boıynsha komıssııa qurý bolatynyn aıtty. «Bul komıssııa bes kishi toptan turatyn bolady, olar zańnamaǵa ózgeris engizýdi qajet etetin aýqymdy ári kúrdeli jumys kútip turǵandyqtan, dereý iske kirisedi. Jalpy, bul reformalar el damýynyń kezekti kezeńi bolyp sanalady jáne ekonomıkany, saıasatty, qoǵamdy qamtıdy, sondaı-aq, transparenttilik pen ashyqtyq úshin qajetti jaǵdaı jasaıdy», – dedi N.Nazarbaev. Oqýshylar saraıynda ornalasqan №81 ýchaskesine jalpy 2532-ge tarta azamat tirkelipti. Tańsáriden turyp, saılaý ýchaskesine kelip, daýys bergen azamattardyń sany tańǵy saǵat 10.00-de 543-ke jýyqtasa, kúndizgi saǵat 11.00-den asa 600-ge jaqyndap úlgerdi. Biz tańerteń erte turyp, saılaý ýchaskesine kelip, daýys bergen elorda turǵyndarynyń arasynan 68 jastaǵy Márzııa Qýanyshqalıevany keziktirdik. «Men buǵan deıingi saılaýlarǵa da úzbeı qatysyp kelemin. Buryn Atyraýda turǵan edim. Astanaǵa kelgenime 4 jyldaı ýaqyt boldy. Saılaý – qoǵam úshin aıtýly oqıǵa. Bizdiń otbasymyzda 4 adam bar. Olardyń barlyǵy búgin saılaý ýchaskelerine baryp, men sııaqty óz tańdaýlaryn jasady. Biz elimizdiń, memleketimizdiń, balalardyń bolashaǵy úshin daýys berýge keldik. Elimizde árdaıym tynyshtyqtyń bolǵanyn, kelisimniń ornaǵanyn qalaımyz», – dedi saılaýshy bizben áńgimesinde. Eldegi saıası naýqanǵa qatysýdy óziniń paryzy dep sanaǵan Ǵalymjan Ákimov Astanaǵa Batys Qazaqstan oblysynan 2000 jyly qonys aýdarypty. 54 jastaǵy saılaýshynyń 3 balasy bolǵanymen, ekeýiniń ǵana daýys berýge quqyǵy bar eken. Ol ózderiniń Qazaqstannyń damýy men órkendeýi úshin daýys bergenin jetkizdi. Bul kúni saılaý úderisin qadaǵalaý úshin №81 saılaý ýchaskesine 29 baı­qaýshy kelse, olardyń 12-si halyqaralyq baı­qaýshy. Biz halyqaralyq baıqaý­shynyń biri, serbııalyq depýtat Dragomır Karıch­ten saılaý úderisine qatysty oıyn bildik. Ol saılaýdy baıqaý úshin Qazaq­stanǵa arnaıy shaqyrtýmen kelgen eken. «Búgingi saılaý óte jaqsy, tipti, merekelik kóńil-kúıde ótip jatyr desem, artyq aıtqandyq bolmas. Muny halyqtyń jyly júzderinen-aq baıqaýǵa bolady. Keıbir azamattar óz otbasylarymen, tipti, kishkentaı balalarymen kelip, daýys berip jatty. Bir sózben aıtqanda, saılaý aýany maǵan durys áser etti», – dedi G. Karıch. Serbııalyq baıqaýshynyń aıtýynsha, Qazaqstan – Ortalyq Azııa aımaǵyndaǵy saıası, ekonomıkalyq turaqtylyqty qamtamasyz etý baǵytyn ustanyp kele jatqan birden-bir el. «Sondyqtan, bul saılaý osy eldiń odan ári ilgerileýine belgili bir deńgeıde qozǵaý salady dep oılaımyn», – dedi G.Karıch sózinde. Al fransýz baıqaýshysy Olıve de Tıllıeniń Qazaqstanǵa úshinshi márte kelýi eken. Ol óz sózinde Qazaqstandaǵy saılaý men Fransııadaǵy saılaý úderisteriniń aıyrmashylyqtaryna toqtalyp ótti. Onyń aıtýynsha, Fransııadaǵy saılaý naýqandaryna halyq kóp qatyspaıdy eken. «Eýropada, onyń ishinde Fransııada da kezekten tys saılaý degen bolmaıdy. Iаǵnı, bizde saılaýdyń merzimi aldyn ala, naqty bekitiledi. Saılaýǵa daıyndyq sharalary, elektoratty naýqan jumystary uzaq júrgiziledi. Sizderde bul jaǵynan ózgeshelikterdiń bar ekenin baıqadym. Meniń oıymsha, kezekten tys saılaý kandıdattarǵa óz baǵdarlamalaryn daıyndaýǵa, nasıhattaýǵa az ǵana ýaqyt beretin sekildi», – dedi ol. Osylaı deı kele, sheteldik baıqaýshy jalpy alǵanda, eldegi saılaý úderisi oń sıpatta ótip jatqanyna toqtalyp, baıqaýshy retinde óziniń kóńili tolatynyn jetkizdi. Bul kúni ózderiniń saılaý ýchas­kelerinde Qazaqstan Respýblıkasynyń Premer-Mınıstri Kárim Másimov, Par­lament Senatynyń Tóra­ǵa­sy Qasym-Jomart Toqaev, Parlament Máji­lisiniń Tóraǵasy Qabıbolla Ja­qypov, Memlekettik hatshy Gúlshara Ábdiqa­lyqova daýys berdi. Qazaqstan Kommýnıstik halyqtyq partııasynan prezıdenttikke kandıdat Turǵyn Syzdyqov Astana qalasyndaǵy №32 saılaý ýchaskesinde daýys berdi. Prezıdenttikke kandıdat Ábilǵazy Qusaıynov ta saılaýda óz tańdaýyn jasady. Ol daýys bergen ýchaskedegi saılaý naýqanyn halyqaralyq sarapshy retinde tirkelgen Reseı Memlekettik Dýmasynyń depýtaty, tanymal boksshy Nıkolaı Valýev baqylap otyrdy.