Soltústiktiń Qyzyljar aýdanyndaǵy Podgornyı aýlyna kóship kelgen Túrkistan oblysynyń Qazyǵurt aýdanyna qarasty Shanaq aýlynyń týmasy Tastan Úskenbaev ta qystyń tym uzaqtyǵy sharshatatynyn aıtty. Oǵan otyn-kómirdiń taýsylyp qalatyny ǵana emes, qoldaǵy maldyń jem-azyǵynyń túgesiletini ekinshi jaqtan qıyndyq týdyrady.
Qyryqtyń qyrqasyna shyqqan Tastannyń tórt uly bar. 2021 jyly Qyzyljar qalasynan 30 shaqyrymdaı jerdegi osy aýylǵa qonys teýipti. Qazir onyń besinshi urpaǵy ómir esigin ashqaly otyr. Tastan kóship kelmes buryn kóp tolqyǵanyn aıtty. Shymkent qalasynyń ózinde turyp, joǵary bilimdi tarıhshy bolsa da, mamandyǵyna sáıkes qyzmet taba almaı, taksımen kisi tasyp júrgen ol kúnderdiń bir kúninde soltústikke halyqtyń kóshýin jaqtap júretin Nurjamal Támbetova degen belsendi apaıdyń shaqyrýyn estip, oǵan qońyraý shalady. О́zi 2016 jyly kóship kelgen, Maǵjan aýdanynyń ortalyǵy Býlaev qalasyndaǵy aýdandyq oqý bóliminde qyzmet etetin Nurjamal apaı ony qushaq jaıyp qarsy alatynyn aıtqan.
2020 jyly jaǵdaımen aldyn ala tanysýǵa kelgen Tastan coltústikke bet alǵan kóshti uıymdastyrýshylardyń biri Serik О́tebaımen kezdesip, sonyń aqylymen Petropavldan 90 shaqyrym jerdegi Maǵjan aýdanynyń ortalyǵy Býlaev qalasyna emes, 30 shaqyrym jerdegi Podgornyı aýlyna at basyn tireıdi. Alaıda 2020 jyly ákesi qaıtys bolyp, tek 2021 jyly mamyr aıynda kóship kele alady. Sodan beri Tastannyń otbasy Qyzyljar óńirine úsh qystap, jurt qatarly ómir súrip jatyr.
«Alǵashqy jyly qatty qınalǵanymyzdy nesin jasyraıyn. Bergen úıleriniń syrty ádemi bolǵanymen, úskirik aıazǵa esh qaırany bolmady. Edenniń asty syz, qabyrǵalar men tóbesi arnaýly materıaldarmen jylytylmaǵan, tek syrtyn árlep, kózboıaýshylyq jasap, syrly taqtaılar qaǵyp, ádemileı salǵan. Peshti qansha qyzdyryp jaqsaq ta, úı jylymaıdy. Onyń ústine ońtústiktiń ádetimen biz irgeni basqan qardy erip ketse úıge sý kirer dep ashyp tastaǵanbyz ǵoı. Munda kerisinshe, irgeni barynsha biteý kerek eken. Sol jylǵy sýyqtan qatty qınaldyq, ákimdiktiń mazasyn ala júrip, bir jyrtyǵymyzdy bitesek ekinshisi ashylyp, ózimiz aýyryp-syrqasaq ta áıteýir shydadyq. Bizben qatar kelgen keıbireýler úılerin jaýyp, ketip te qaldy. Al biz shydap, jyldan-jylǵa úıimizdi bútindep kelemiz», deıdi Tastan.
Kezinde tegiske jýyq ózge ult ókilderi qonystanǵan osy Podgornyı aýlynda qazir qonys aýdarýshylar men qandastar 37 otbasy bolyp otyr. 200-deı bala oqıtyn mektep qazir aralas. Biraq negizgi bóligi, atap aıtqanda, 167 bala qazaqsha oqıdy. Buǵan balabaqshanyń mektepke deıingi tobyndaǵy tárbıelenýshilerdi qossaq, qazaq oqýshylarynyń sany 180-ge barady. Mekteptiń burynǵy salttary da ózgerip, túrli jıyn men is-shara qazir eki tilde ótedi.
Tastannyń otbasy keler jyldary úıdi jylytýdyń qamdaryn jasap baqqan. Tóbege qalyń etip, aǵash úgindisin úıgen. Eden men qabyrǵalardy da ákimdiktiń kómegimen, óz kúshterimen bútindegen. Alaıda peshtiń temir qubyry qyzǵanda tez tutanatyn úgindiden ot shyǵyp, keıbir úıler kúıgen. Sony eskerip qubyrdyń aınalasyna kirpish qalady. Áıteýir jumysy kóp boldy. Bıyl Shymkenttegi anasy kelip, keń tynysty aýaǵa úırengeni sondaı, qapyryq tústikke qaıta ketkisi kelmeı qalypty. «Tek jol-jora, toı-tomalaq bolǵan soń ǵana amalsyz ketti», dep kúledi Tastan.
Sóıtip, shyn nıetpen qonys aýdarǵysy kelgen jandardyń soltústiktiń qıyndyǵyn ıgere alatynyn Tastan Ýálıhanuly óz mysalymen kórsetip otyr. Alaıda Úkimettiń berip jatqan kómek-qarajatyn ǵana alyp, ózderi kóship kelýge asyqpaıtyn jylpostar da jeterlik. Qazir bılik turǵyn úılerdi turǵyzyp bermeı, tańdaǵanyn ózine satyp aldyryp, onyń jarty aqshasyn tóleıtin tártip shyǵardy. Osynyń ózi qonys aýdarýshyǵa da, bıýdjetke de tıimdi ekenin ómir kórsetip otyr. Áıtpese, syrty ádemi bolǵanymen, ishi barynsha sapasyz úılerdi samsatyp sala bergennen eshkim de utpaıdy. Ondaı úılerdiń bos turǵandary da kóp. Al shynymen soltústikke turaıyn degen nıetpen kelgen aǵaıyn qandaı qıyndyqqa bolsa da tótep bereri sózsiz.
Soltústik Qazaqstan oblysy
