Foto:baq.kz
Birinshi satydaǵy sot komıssııaǵa mynany atap kórsetti:
- ákimshilik aktiniń negizsizdigi (ÁRPK-tiń 79-baby);
- talap qoıýshynyń eki aryzyn qaraý jáne eki hattamalyq sheshim qabyldaý kezinde jer komıssııasy músheleriniń bir daýysqa ıe bolýy, bul da zańǵa qaıshy keledi.
Iаǵnı, bul jaǵdaıda jer komıssııasy talap qoıýshynyń aryzyn qandaı negizde qabyldamaǵanyn anyqtaý múmkin emes. Daýys berý tártibiniń buzylýyna, jer komıssııasy músheleriniń qorytyndylary men hattama mazmunynyń sáıkes kelmeýine, bas tartýǵa negizderdiń bolmaýyna jáne hattamada túpkilikti sheshimniń bolmaýyna nazar aýdaryldy.
Jergilikti sottar talap qoıýshynyń talaptaryn qanaǵattandyrdy. Jer komıssııasynyń hattamalyq sheshiminiń kúshin joıdy, qala ákimine talap qoıýshynyń aryzdaryn qaıta qarap, qolaıly ákimshilik akt qabyldaýdy mindettedi.
JS ÁIJSA isti zertteı kele, sot aktileri jalpy zańdy jáne negizdi túrde shyǵarylǵan dep eseptedi. Qala ákiminiń jáne aýdandyq salalyq bólimniń ókilderi jer komıssııasynyń hattamalyq sheshimin zańsyz dep tanydy.
Kassasııa qala ákimine talap qoıýshyǵa daýly ýchaskelerdi berý týraly qolaıly ákimshilik aktini qabyldaý mindetin júkteý bóliginde quqyqtyq jaǵdaıdy túzetý qajettiligin kórsetti.
Talap qoıýshy daý bildirgen hattama zańsyz dep tanylyp, kúshi joıylǵandyqtan, talap qoıýshynyń eki aryzyn qaraýdyń ákimshilik rásimi jer komıssııasynyń otyrysynda qaralǵan kezinen bastap qaıta jańǵyrtylýy tıis.
Jer komıssııasynyń oń qorytyndysy bolmaǵan jaǵdaıda jergilikti atqarýshy organǵa mindetter júkteý qate bolyp tabylady. Sebebi aryzdardy sheshýdiń zańnamalyq rásimderi bar.
Joǵarǵy Sot ákimniń qolaıly ákimshilik aktini qabyldaý mindetine qatysty sot sheshimin qospaǵanda, jergilikti sottardyń sheshimderin kúshinde qaldyrdy.
