Foto:Ashyq derekkóz
Aıta keteıik, bıyl qańtar aıynda seısmıkalyq qaýipsizdik máseleleri jónindegi keńeste Memleket basshysy Qasym-Jomart Toqaev tótenshe jaǵdaılardyń aldyn alý jáne joıý júıesiniń materıaldy-tehnıkalyq bazasyn nyǵaıtý sharalaryn qabyldaýdy tapsyrǵan bolatyn.
Prezıdent tapsyrmalaryn iske asyrý sheńberinde Azamattyq qorǵaý salasyndaǵy birinshi kezektegi sharalardyń 2023-2027 jyldarǵa arnalǵan keshendi josparyna zamanaýı avıasııalyq tehnıka satyp alýǵa qatysty túzetýler engizildi.
Úkimettiń baspasóz qyzmetiniń habarlaýynsha, qarjy lızıngi tetigin paıdalaný arqyly TJM materıaldy-tehnıkalyq bazasyn jabdyqtaý úshin 11 áýe kemesin satyp alý josparlanǵan. 24,8 mlrd teńge mólsherindegi qajetti soma respýblıkalyq bıýdjetten 2027 jylǵa deıin kezeń-kezeńimen bólinedi dep kózdelgen. Máseleni Respýblıkalyq bıýdjet komıssııasy tujyrymdamalyq túrde qoldaǵan.
«TJM materıaldyq-tehnıkalyq bazasyn nyǵaıtý avıasııalyq tehnıkamen qamtý aımaqtaryn keńeıtýge múmkindik beredi. Áýe kemeleri jetý qıyn jerlerde oryn alǵan tótenshe jaǵdaılar aımaqtarynan evakýasııalaý jáne qutqarý bólimsheleriniń jedel áreket etýin qamtamasyz etý úshin, sondaı-aq sý tasqyny jáne órt qaýpi basym kezeńderde monıtorıngtiń tıimdiligin arttyrý maqsatynda qoldanylady», delingen habarlamada.
