Mundaı jarys Qyzyljar óńirinde alǵash ret ótkizilip otyr. Oǵan oblystyń jedel járdem brıgadasynyń byltyr osyndaı spartakıadada jeńiske jetýi negiz boldy. Bul ótken jyly 11 tamyzda Abaı oblysynyń ortalyǵy Semeı qalasynda ótkizilgen edi. Oǵan elimizdiń barlyq óńirinen jedel járdem brıgadalary qatysqan.
Spartakıadanyń bir maqsaty – jedel medısınalyq kómek kórsetý sapasyn jaqsartýmen qatar medısına qyzmetkerleriniń kásibı daǵdylaryn, tájirıbelerin arttyrý. Jarystar jedel medısınalyq járdem brıgadalarynyń jedel koronarlyq sındrom, polıjaraqat, balalar reanımasııasy, jańa týǵan náresteni úıde týǵan kezde reanımasııalaý jáne basqa jaǵdaılar kezinde jedel medısınalyq kómek kórsetýdiń ádis-tásilderi boıynsha ótkizildi.
Aýrýhanaǵa jetkizilgenshe naýqasqa jedel medısınalyq alǵashqy kómek tasymaldaý kezinde kórsetiledi. Sondyqtan jedel járdemdegi feldsherlerdiń jumysy óte jaýapty. Olar tótenshe aýyr jaǵdaıǵa túsken azamattardy qutqarý boıynsha alǵashqy jedel kómekti durys jasaǵanda ǵana adam ómiri saqtalýy múmkin. Iаǵnı aýrýhanaǵa aman jetkizýdiń mańyzy zor. Sondyqtan jedel járdemniń halyqaralyq ataýy «ambulare» degen latyn sózimen jazylady. Bul sózdiń týra maǵynasy – «jedel júrý» nemese «jedel qozǵalý». Demek naýqasty dereý aýrýhanaǵa jetkiz degen sóz. Qala kóshelerinde dabylyn bezildetip bara jatqan «jedel járdem» mashınalaryna basqa kólikterdiń jol berip, ony bosatyp jiberetini de sodan.
Arnaıy «jedel járdem» kólikterin qoldanýdy adamzat tarıhynda alǵash HV ǵasyrda oılap tapqan – ıspandyqtar. Al arnaýly mashınalar qoldaný HIH ǵasyrdan beri engizilgen. Jedel járdemniń qoldanýyn saralaǵan statıster onyń eń kóp kómek kórsetkeni ótkir aýrýy bar pasıentter men jaraqat alǵan jandar eken. Ondaı naýqastarǵa jedel járdem kóligi retinde tipti at-arbalar, qaıyqtar, tikushaqtar, ushaqtar qoldanylǵan. Árıne, qazir jedel járdem kólikteri barynsha jetildirilgen. Sanıtarlyq avıasııa ǵana emes, qazir arnaıy, óte tolyq degen naýqastarǵa arnalǵan barıtarııalyq jedel járdem kóligi de bar.
«Biz oblysta jedel medısınalyq kómek kórsetý úshin barlyq jaǵdaıdy jasap jatyrmyz. Jedel járdem ortalyǵyndaǵy sanıtarlyq kólikter 100 paıyzǵa jańartyldy. Bıyl jedel medısınalyq kómek kórsetýdiń halyqaralyq standarttaryn daıyndaıtyn oqý alańy ashyldy», dedi spartakıadany ashqan sózinde oblys ákimi Ǵaýez Nurmuhambetov.
Spartakıadanyń ótýine Densaýlyq saqtaý mınıstrligi, Ulttyq shuǵyl medısınany úılestirý ortalyǵy jáne Soltústik Qazaqstan oblysy densaýlyq saqtaý basqarmasy, jedel medısınalyq járdem qaýymdastyǵy uıytqy boldy. Qazaqstannyń túkpir-túkpirinen kelgen komandalar jedel medısınalyq kómek kórsetýde óz sheberlikterin kórsetti. Barlyq qatysýshy sheberlik sabaqtarynan ótip, júrek-ókpe reanımasııasyn júrgizýde, dıagnoz qoıýda, shaqyrý ornynda jumysty uıymdastyrýda tamasha nátıjeler kórsetti. Spartakıadanyń qorytyndysy boıynsha byltyr óz jerinde Soltústik Qazaqstan komandasynan jeńilip qalǵan Abaı oblysynyń ókilderi birinshi oryn aldy. Qyzyljarlyqtar ekinshi, mańǵystaýlyqtar úshinshi orynmen qanaǵattandy. Alaıda barlyq qatysýshy «AinalaMed Qazaqstan», «Astana Motors», «Allur», «TND» JShS t.b demeýshilerdiń qoldaýymen baǵaly syılyqtar aldy.
Soltústik Qazaqstan oblysy
