Sýretti túsirgen – Erlan ALTYBAEV
Oblystyq dene shynyqtyrý, sport jáne týrızm basqarmasy týrızmdi damytý bólimi basshysynyń mindetin atqarýshy Jannat Sabyrǵalıevanyń aıtýynsha, týrıstik qyzmet salasynda 48 kompanııa tirkelip otyr. Onyń 11-i – týroperator, 37-si – fırma, 2 etnoaýyl jáne 1 vızıt ortalyǵy bar. Onyń ishinde 127 oryn týrısterdiń ornalasýyna jaǵdaı jasalǵan. Jol boıyndaǵy 41 nysanda servıstik qyzmet kórsetiledi.
«Bıylǵy qańtar-naýryz aılarynda Atyraý oblysyna 32 myńnan asa týrıst keldi. Týrısterdiń 27 myńy – qazaqstandyq, al 5 myńnan astamy – sheteldikter. О́ńir turǵyndary men qonaqtaryn qyzyqtyratyn birneshe týrıstik baǵyt anyqtalyp otyr. Týrıster Inder aýdanyndaǵy Tuzdykólge, Qurmanǵazy aýdanynyń aýmaǵymen ótetin Qıǵash ózenindegi «Lotos» alqabyna, Jylyoı aýdanynda ornalasqan Aqkegershin borly taýyna, Isataı aýdanyndaǵy Naryn qumyna, Mahambet aýdanyndaǵy Ortaǵasyrlyq Saraıshyq keshenine, Atyraý qalasynyń mańyndaǵy «Aqjaıyq» memlekettik tabıǵı rezervatyna jıi barady. О́ıtkeni atalǵan oryndardan Atyraýdyń biregeı tabıǵaty men mádenı murasyn tamashalaýǵa bolady», deıdi J.Sabyrǵalıeva.
Onyń aıtýynsha, tabıǵı sıpattaǵy tótenshe jaǵdaı kezinde týrıstik maýsym keıinge shegerilgen. О́ıtkeni Atyraý oblysynyń ákimi Serik Shápkenovtiń sheshimimen jarııalanǵan tótenshe jaǵdaı rejimi áli de saqtalyp otyr.
«Qazir jaǵdaı turaqtala bastaǵannan ekskýrsııalyq týrlardy jandandyrýdy josparlap otyrmyz. Ony týrıstik fırmalar arqyly uıymdastyramyz. Aldymen týrıstik oryndardy birge aralap, jaı-kúıin tekserýdi oılastyrdyq», deıdi J.Sabyrǵalıeva.
Al «Easy Travel» týrıstik fırmasynyń basshysy Nuralhan Bısenovtiń aıtýynsha, shetelge saıahattaıtyn atyraýlyqtar az emes. Ásirese jaz mezgilinde demalysyn shetelde ótkizetin atyraýlyqtar óte kóp.
«Atyraýlyqtardyń basym bóligi Túrkııanyń Alanıa qalasyna, Egıpettiń Sharm-el-Sheıh shaharyna jıi barady. Keıingi kezde Azııa elderine qyzyǵýshylyq baıqalyp otyr. Máselen, maýsym aıynda Taıland pen Vetnamdaǵy kýrorttyq aımaqqa barý úshin joldama alýǵa suranys kóbeıdi», deıdi N.Bısenov.
Bıyl Atyraý oblysynyń týrıstik áleýeti zerttele bastady. Ony ál-Farabı atyndaǵy QazUÝ-dyń ǵalymdar toby qolǵa aldy. Joǵary oqý ordasyndaǵy rekreasııalyq geografııa jáne týrızm kafedrasynyń zerthana meńgerýshisi Aleksandr Artemevtiń aıtýynsha, ǵalymdar toby birneshe maqsatty kózdep otyr.
«Birinshiden, Qazaqstannyń batys óńirindegi týrıstik áleýetine zerdeleý júrgizýdi kózdedik. Ekinshiden, Atyraý oblysyndaǵy týrıstik marshrýttar men rekreasııalyq aýmaqtaryna taldaý jasaımyz», deıdi A.Artemev.
Almatylyq ǵalymdar toby aldymen «Aqjaıyq» memlekettik tabıǵı rezervatyna bardy. Bul – IýNESKO-nyń bıosferalyq rezervattardyń dúnıejúzilik jelisine kiretin tabıǵı qoryq. Jaqynda týrısterdi qabyldaýdy bastady. Munda saıahattyń eki túri usynylady. Onyń biri – qaıyqpen serýendeý, ekinshi baǵyty – jaıaý júrginshi marshrýty. Tabıǵı qoryq aýmaǵy 110 myń 500 gektardy quraıdy.
«Bizdiń ýnıversıtet byltyr elimizdiń batys óńirindegi týrıstik áleýetti zertteýge grant utyp alǵan edi. Soǵan sáıkes jumys tobynyń quramyna ǵalymdar, zertteýshiler, gıdrogeologter, týrıster men ekonomıster, basqa da sarapshy mamandar kirdi. Qazir batys óńirdegi týrızmdi turaqty damytýdyń múmkindikterin zertteýge kiristik. Buǵan deıin Aqtóbe, Batys Qazaqstan oblystaryndaǵy týrıstik baǵyttarǵa taldaý júrgizdik. Al Atyraý oblysyndaǵy lotos alqabyn, Saraıshyqtyń kóne qonysyn, Aqkegershin ústirtin men munaıly shahardyń kórikti jerlerine nazar aýdaryp otyrmyz. Maqsatymyz – Atyraý oblysynyń ákimdigi jáne týrızm salasynyń mamandarymen birge óńirdiń áleýeti jáne týrıstik marshrýttary boıynsha ǵylymı-zertteý bazasyn qurýǵa úles qosý», deıdi A.Artemev.
Atyraý oblysy
