Eske salaıyq, 2024-2025 oqý jylyna bólingen jalpy grant sany – 94 myńnan astam. Onyń ishinde 78 myń grant – bakalavrıat stýdentterge qarastyrylǵan. Úmitkerler bul tizimge ilikpegen jaǵdaıda qosymsha granttarǵa talasa alady.
Joǵary jáne joǵary oqý ornynan keıingi bilim komıtetiniń tóraǵasy Gúlzat Kóbenovanyń aıtýynsha, grantqa ilinbeı qalǵan talapkerler áli de úmit úzbegeni jón.
– Keıbir mamandyqtarda konkýrs óte joǵary boldy. Bul talapkerlerdiń mamandyqty tańdaýyna baılanysty. Máselen, «Stomatologııa» mamandyǵyna bir orynǵa 35 adam talassa, «Halyqaralyq qatynastar jáne dıplomatııa» mamandyǵy boıynsha bir orynǵa 12 adam, sondaı-aq «Aýdarma isi», «Dene shynyqtyrý muǵalimderin daıarlaý», «Quqyq», «Moda jáne dızaın» sııaqty baǵyttar boıynsha bıyl óte joǵary konkýrs baıqalyp otyr. Sondyqtan keıbir talapkerler jalpy granttyń tizimine ilikpedi, biraq áli de múmkindik bar ekenin atap ótemiz, – dedi ol.
Ákimdik 2,5 myńǵa jýyq grant bóldi
2024-2025 oqý jylyna jergilikti atqarýshy organdardan konkýrstyq negizde memlekettik bilim berý grantyna ótinishterdi qabyldaý bastaldy. Naqtyraq aıtsaq, bıyl jergilikti atqarýshy organdar 2475 bilim berý grantyn bóldi. Máselen, 858 grantty elorda ákimdigi bólip otyr. Bul – ákimdikter arasyndaǵy eń úlken kórsetkish. Odan keıingi orynda Shyǵys Qazaqstan oblysy – 270, Abaı oblysy – 200, Mańǵystaý oblysy – 175, Aqmola oblysy – 160 jáne Jetisý men Qyzylorda oblysy – 100, qalǵan aımaqtar 100-den az grant bólgen.
Bilim grantyn taǵaıyndaý konkýrsyna qatysý úshin úmitker joǵary oqý oryndarynyń qabyldaý komıssııasyna ótinish berý qajet. Sondaı-aq joǵary oqý ornyna bilimi týraly qujat, UBT sertıfıkatyn, jeke basyn kýálandyratyn qujattyń kóshirmesin, jeńildik sanatyn rastaıtyn qujattardy (bar bolǵan jaǵdaıda) tapsyrady. Grant berý týraly sheshimdi ákimdik janynan qurylǵan arnaıy komıssııa qabyldaıdy. Aıta keteıik, joǵary oqý oryndaryna qabyldaý 25 tamyzda aıaqtalady.
«Qazaqstan halqyna» qorynan 850 grant
«Qazaqstan halqyna» qory 2024-2025 oqý jylyna arnalǵan bilim granttary baǵdarlamasyn jarııalady. 2022 jyldan beri osy baǵdarlamanyń kómegimen búginde 2,6 myńnan astam stýdent bilim alyp jatyr. Bıyl áleýmettik osal toptaǵy 850 talapker joǵary bilim alýǵa qol jetkize alady. Bilim granttary bakalavrıat baǵdarlamasy boıynsha beriledi. Bul konkýrsqa aýyldyq jerdegi, shaǵyn jáne monoqalalardaǵy az qamtylǵan otbasylardan shyqqan balalar qatysa alady. Sonymen qatar jetim balalar nemese kámeletke tolǵanǵa deıin ata-anasynyń qamqorlyǵynsyz qalǵan balalar, múgedektigi bar jáne 2022 jylǵy qańtardaǵy qaıǵyly oqıǵalar kezinde qaıtys bolǵan azamattardyń balalary atalǵan grantqa ıe bola alady. Aıta keteıik, úmitkerlerdiń jasy 29 jastan aspaýy tıis. Memlekettik bilim grantyn alǵandar «Qazaqstan halqyna» qorynyń grantyna qujat tapsyra almaıdy. Talapker joǵaryda atalǵan talaptarǵa tolyq saı bolsa, joǵary oqý oryndarynyń qabyldaý komıssııalaryna habarlasyp, baǵdarlamaǵa ótinish bere alady. О́tinimderdi qabyldaýdyń sońǵy merzimi – 17 tamyz.
Sondaı-aq «Freedom Bank» «Freedom Grants» bilim jobasyna ótinishterdi qabyldaı bastady. Bıyl bank talapkerlerge 400 grant bóldi. Bul múmkindikke ıe bolý úshin úmitkerlerge qoıylatyn birneshe shart bar. Jas túlekter 18 tamyzǵa deıin óziniń Instagram jelisinde Bank paraqshasyn (@bankffin.kz) belgileı otyryp, «FreedomGrants» heshtegimen post nemese rıls jarııalaýy kerek. Jazbada talapker ózi týraly aıtyp, oqyǵysy keletin ýnıversıtetti ataýy tıis, sondaı-aq nege osy mamandyqty tańdaǵany jóninde jáne óz aımaǵyn qalaı jaqsartqysy keletinin túsindirýi qajet. Tamyzdyń 21-i kúni banktiń @bankffin.kz resmı paraqshasynda tikeleı efırde kezdeısoq sandardy tańdaý ádisimen «Freedom Grants» ıeleri anyqtalady.
Ýnıversıtetten bólingen grant kóp
Túrkistandaǵy halyqaralyq týrızm jáne qonaqjaılylyq ýnıversıteti «V091 Týrızm» jáne «V093 Meıramhana isi jáne meımanhana bıznesi» mamandyqtary boıynsha qosymsha 800 grant bólip otyr. Ol úshin talapkerlerdiń mindetti túrde beıindik pánderi «Geografııa – Shet tili» bolýy qajet. Sondaı-aq talapkerdiń ulttyq biryńǵaı testileýden jınaǵan jalpy upaıy 65-ten joǵary bolýy tıis. («Qazaqstan tarıhy» jáne beıindik pánder keminde 5 ball, «Oqý saýattylyǵy» jáne «Matematıkalyq saýattylyq» keminde 3 ball). Ataýly grantqa qujat qabyldaý 18 tamyzǵa deıin jalǵasady. Al J.Táshenov ýnıversıtetiniń qabyldaý komıssııasy joǵary ball jınaǵan talapkerlerge «Táshenov tartýy» bilim grantyn taǵaıyndady. Bólingen 150 grantqa ıe bolý úshin talapker ulttyq testileý ortalyǵy ótkizgen testileýdi tapsyrǵan jáne memlekettik bilim granty konkýrsyna qatysqan bolýy mindetti. Eń bastysy, testileýden bes pánniń jıyntyǵy boıynsha joǵary ball jınaýy tıis. Aıta keterligi, bul konkýrsta aýyldyq jerlerden qatysýshylarǵa basymdyqtar beriledi. Sonymen birge 10-11 synyptarynda pándik olımpıadalar men respýblıkalyq, halyqaralyq baıqaýlarda jetistikke jetken túlekter atalǵan konkýrsqa qatysa alady. Grant berý týraly sheshim arnaıy qurylǵan konkýrstyq komıssııanyń sheshimimen anyqtalady. Eskerte ketetin jaıt, konkýrsta úmitkerlerdiń UBT baly teń bolǵan jaǵdaıda, olardyń attestattaǵy úlgeriminiń ortaq baly eskeriledi. Al jańa oqý jylynda S.Toraıǵyrov ýnıversıtetinde memlekettik granttardan bólek, joǵary oqý ornynyń ózinen, seriktes kásiporyndardan qosymsha 100 grant qarastyrǵan. Olardyń qatarynda etnomádenı birlestikter ókilderine, oblystyq pándik olımpıada men ǵylymı jobalardyń jeńimpazdaryna, «Daryn» óńirlik olımpıadasy men S.Toraıǵyrov ýnıversıtetiniń pándik olımpıadasynyń úzdikterine, merzimdi áskerı qyzmet ótkergen jastarǵa, halyqtyń áleýmettik qorǵalatyn sanattaryna jatatyn jastarǵa arnalǵan granttar bar. Aıta keteıik, S.Toraıǵyrov ýnıversıtetiniń seriktesteri joǵary oqý oryndarynda tegin oqýǵa kepildik beredi. Sonymen qatar Abaı oblysynyń zııatkerlik elıtasyn qalyptastyrý jáne týǵan ólkesine qyzmet etý jónindegi óz mıssııasynyń sheńberinde Shákárim atyndaǵy Semeı memlekettik ýnıversıteti bilim berý granty boıynsha túspegen «Altyn belgi» ıegerlerine tórt jyl boıy tegin oqýǵa múmkindik beredi. Ýnıversıtet árbir talantty jastyń óńirde qalyp, óziniń áleýetin barynsha arttyryp, óz aımaǵy men eliniń damýyna úles qosa alatyn tulǵany qalyptastyrýǵa basa nazar aýdarady.
Daryndy, talantty jastardy qoldaý maqsatynda S. Amanjolov atyndaǵy Shyǵys Qazaqstan ýnıversıtetinde 20-dan astam pándik olımpıada ótkiziledi. Jeńimpazdar ýnıversıtettiń tórt jyldyq grantyn alýǵa úmitker bola alady. Ýnıversıtet jyl saıyn oqýda joǵary kórsetkish kórsetken, az qamtylǵan jáne kópbalaly otbasydan shyqqan, sondaı-aq ata-ana qamqorlyǵynsyz qalǵan balalar sanatyna jatatyn talapkerlerdi únemi qoldaıdy. S.Amanjolov ýnıversıteti aýqymdy oblystyq jáne respýblıkalyq olımpıadalar uıymdastyrady. Máselen, «Meniń Qazaqstanym», «Týǵan el. Týǵan jer. Týǵan global», «Abaı oqýlary», «Pedagogıkalyq assortı», «Daryn» syndy baıqaýlardyń qorytyndysy boıynsha jeńimpazdarǵa oqýdyń barlyq kezeńine júz paıyz jeńildik qarastyrylǵan.
