Aýdan jurty ákimin saılady

Saıası naýqanǵa aýdannyń 4698 turǵyny qatysyp, tańdaýyn jasaǵan. Saılaýda basym daýysqa ıe bolǵan Abylaı Amanjolov aýdannyń jańa basshysy bolyp saılandy.

– Bul saılaýda úsh kandıdat óz­deriniń úgit-nasıhat jumysyn júrgiz­di. Barlyǵyna birdeı múm­kindik berildi. Saılaý komıssııalaryna da aryz-shaǵym túsken joq. Aqtoǵaı aýdanynda ákim saılaýyna baılanys­ty 38 saılaý ýchaskesi talapqa saı jumys istedi. Zań buzýshylyq tirkelgen joq. Aýdan boıynsha saılaý ýchas­kelerine barlyǵy 10 213 adam tir­kelgen. Saılaý qorytyndysyna súıensek, 2997 saılaýshy Abylaı Amanjolovqa daýys bergen. Al onyń básekelesteri Qaırat Nókesh pen Oral Stybaev 1424 jáne 59 daýys jınady. Munymen qosa, «Barlyǵyna qarsy» belgisi bar bıýlletender sany 60», deıdi aýdannyń aýmaqtyq saılaý komıssııasynyń tóraǵasy Janbolat Raıymbekov.

Aýdan ákimderin tikeleı saılaý – jalpy ózin-ózi basqarý júıesiniń mańyzdy bóliginiń biri. Sondyqtan aýdan ákimin tikeleı saılaý nátıjesi meılinshe mańyzdy deıdi komıssııa tóraǵasy.

«Bul bir jaǵynan saılanatyn ákimniń jaýapkershiligine baı­lanysty. Ekinshi jaǵynan halyq­pen qarym-qatynastaǵy «Halyq únine qulaq asatyn memleket» qaǵı­dasynyń shyn máninde júzege asýyna tolyqtaı óz úlesin qosady. Eger saılanǵan ákimniń jumysyna kóńili tolmasa, halyq oǵan máslıhat arqyly senimsizdik bildiredi. Máslıhattyń quramy da burynǵydaı partııa tizimimen emes, aýyl, aýdan, qala deńgeıinde tolyqtaı majorıtarlyq saılaý júıesi arqy­ly júzege asady. Bul – jergilikti belsendilerge, týǵan jeriniń damýyna úlesimdi qosamyn degen azamattarǵa jol ashady. Bul – tikeleı saılaýdyń artyq­shylyqtary. Ákim men halyq ara­syn­daǵy baılanystyń nyǵaıýyna, jaýapkershiliktiń artýyna jáne jumystyń tıimdiligine tikeleı áser etedi», deıdi ákim saılaýynyń el ishindegi saıası róli jóninde Jan­bolat Raıymbekov.

Sonymen, aýdandaǵy saıası doda máresine jetti. Halyq tańdaý jasaǵan ákim baǵdarlamasynda sheshimin tabýǵa tıis másele jeterlik.

«Halyqtyń senimi – eń qundy. Jerlesterimniń qoldaýy­na ıe bolyp, el tizginin ustaý – eń bıik mártebe ári orasan zor jaýap­ker­shilik. Osy dodada maǵan qarsylas bolǵan áriptesterime qurmetim joǵary. Saılaýǵa qatysqan barsha jerlesterime alǵysymdy aıtamyn. Naýqanǵa atsalysqan shtab múshelerine, senimdi ókilderim men baıqaýshylarǵa rızashylyǵymdy bildiremin. El men jerge qaltqysyz qyzmet etemiz», deıdi jańa ákim.

Aqtoǵaıǵa qyzmet etý – Halyqqa qyzmet etý. El senimine selkeý túsir­meı, aýdan halqynyń ál-aýqatyn arttyrý – endi jańa ákimge júk.

Qaraǵandy oblysy,

Aqtoǵaı aýdany