Cherkassk aýylynyń turǵyndary kópten kútken jańa dárigerlik ambýlatorııa qoldanysqa berildi. Buryn beıimdelgen ǵımaratta otyrǵan medısına mekemesi endi qajetti jaǵdaılary jasalǵan jańa orynda aýyldyń 2 500-ge jýyq halqyna qyzmet kórsetedi. Oblys ákimi baspasóz qyzmetiniń málimetinshe, bul nysanǵa 70 mln qarjy jumsalǵan.
Ǵımarattyń ashylý saltanatyna Cherkassk aýyldyq okrýginiń ákimi Maqsat Aıtjanov pen Sarqan aýdandyq ortalyq aýrýhanasy dırektorynyń orynbasary Birjan Ýahanov qatysyp, aýyl turǵyndaryn qýanyshymen quttyqtady.
Jalpy, blokti-modýldi qurylysty «SheberMetall» JShS 2023 jyldyń qarashasynda bastap, osy jyldyń shildesinde aýmaǵy 240 sharshy metrlik jańa ambýlatorııany paıdalanýǵa berdi. Buǵan deıin aýyldyq dárigerlik ambýlatorııa mekteptiń bastaýysh synybyna arnalǵan eski turǵynjaıynda, ıaǵnı sanıtarlyq normaǵa saı emes beıimdelgen ǵımaratta otyrǵan edi.
Atalǵan aýylda 2 448 adam turady. Jańa ǵımaratta halyqqa sapaly medısınalyq qyzmet kórsetýge barlyq jaǵdaı jasalǵan. Dárigerlik ambýlatorııa jalpy kúnine 60 adamdy qabyldaýǵa qaýqarly. Sol sııaqty 5 adamǵa laıyqtalǵan kúndizgi stasıonar da qarastyrylǵan. Munda 3 dáriger, 9 orta býyn qyzmetker, 1 kishi býyndy jáne 2 basqa da qyzmetker jumys isteıdi. Aýyl turǵyndary úshin pedıatrııalyq, terapevtik, akýsherlik, stomatologııalyq kómek kórsetiledi. Ǵımaratta dárigerge deıingi qaralý kabıneti, saý balalardyń kabıneti, ekpe, prosedýra, dezınfeksııa, zerthana bólmeleri, arnaıy dárigerler kabınetteri bar. Sol sııaqty qajetti qural-jabdyqtar, sonyń ishinde sterıldi quraldarǵa arnalǵan ýfo kamera, zerthanalyq taldaýlarǵa qajetti apparattar tolyqtaı ornatylǵan.
«Aýrýdyń aldyn alý, naýqastyń dıagnozyn dóp taýyp, ýaqytynda em-shara qoldanyp, halyqty dárigerlik tekseristen ótkizip turý – bizdiń basty mindetimiz. Munda turǵyndar aýdandyq emhanaǵa barmaı-aq analız tapsyryp, osy jerden qorytyndysyn ala alady. Jańa zamanǵy tehnologııaǵa saı jabdyqtalǵan ambýlatorııada arnaıy taldama kabıneti bar. Osyndaı qajetti múmkindikter jasalǵan, materıaldyq-tehnıkalyq bazasy bar jańa ǵımarat medısınalyq qyzmet kórsetý sapasynyń artýyna yqpal etedi dep senemiz», deıdi ambýlatorııa meńgerýshisi Sálıma
О́teýlınova.
Jetisýda áli ondaǵan aýyl óz kezegin kútip otyr. Keler jyly taǵy osyndaı nysandar alystaǵy eldi mekenniń qýanyshyn eseleıdi.
Jetisý oblysy
