Sýretterdi túsirgen – Jangeldi ÁBDIǴALYM
«Taza orman» dep atalǵan aksııaǵa eriktiler, sportshylar, «Jasyl el» jasaǵynyń jas sarbazdary qatysty.
Shahtınsk orman alqabynyń aýdany 722 gektardy quraıdy. Bul qala – turǵyndarynyń demalýǵa, sportpen shuǵyldanýǵa arnalǵan súıikti orny. Degenmen ózinen qalǵan qaldyqty tazalap júrý mádenıeti ekiniń birine buıyrmaǵany kóbimizdi qynjyltady.
Qala, oǵan jaqyn kent, aýyl jastarynyń bastamasymen ormanǵa aǵash egý, qoqys-qaldyqtan tazartý jumystary boıynsha aksııalar jıi ótedi.
– Orman – dala baılyǵy. Búgin jastarmenen jalyndap júrip jap-jasyl aımaǵymyzdy tazarttyq. Aksııanyń negizgi maqsaty da – sol. Ortanyń tabıǵatqa degen janashyrlyǵyn arttyrý, – deıdi Shahtınsk qalasy Jastar resýrstyq ortalyǵy basshysynyń mindetin atqarýshy Alekseı Varzaev.
Shahtınsk qalasynda «Taza Qazaqstan» aksııasy bastalǵannan beri 100-den asa eńbek ujymy men 10 myńǵa jýyq turǵyn qatysty. 15 myń tonnadan asa qaldyq syrtqa shyǵarylyp, saıabaq, alań, eskertkishter aýmaǵy tazartyldy. Myńnan kóp kóshet egildi.
Qaraǵandy oblysy,
Shahtınsk qalasy
