Foto: .facebook.com
Eske sala keteıik, sot úkimimen Q.Satybaldy QR QK-niń 28-baby 3-bóligimen, 189-baptyń 4-bóligi 2) tarmaǵy (senip tapsyrylǵannyń múlkin jymqyrý), 28-baptyń 3-bóligi, 195-baptyń 2-tarmaǵy (urlyq jasaý maqsatynsyz zalal keltirý) boıynsha múlki tárkilenip, memlekettik qyzmet atqarý quqyǵynan 10 jylǵa deıingi merzimge aıyra otyryp, 6 jylǵa bas bostandyǵynan aıyrý jazasyna sottalǵan.
Sottalǵan óziniń ótinishhatynda jazasynyń ótelmegen bóligin neǵurlym jeńil túrine aýystyrý týraly ótinishhatyn berý úshin zańnyń barlyq talaptaryn oryndaǵanyn atap kórsetken.
Proseske qatysýshylar sottalǵannyń ótinishhatyn qoldap, ony qanaǵattandyrýdy suraǵan. Negiz retinde óziniń oń minezdemesin, úkim boıynsha zalaldyń ornyn toltyrǵanyn, sondaı-aq jalpy somasy 700 mlrd teńgeden astam múlikti jáne ózge de qarajatty óz erkimen memleketke qaıtarǵanyn atap ótken.
Sonymen qatar túzeý mekemesiniń ókili sottalýshynyń ótinishhatyn qoldaǵan. Sondaı-aq Prokýror Satybaldynyń ótinishhatyn qanaǵattandyrýdy surap, onyń jazany aýystyrý úshin barlyq sharttardy oryndaǵanyn, sondaı-aq memleketke óz erkimen ózge de múlikti qaıtarylǵanymen negizdegen.
QK-niń 73-baby aýyrlyǵy ortasha qylmystar nemese aýyr qylmystar úshin sottalǵan adamdy jazanyń ótelmegen bóliginiń qalǵan bóligin mynadaı jaǵdaılarda neǵurlym jeńil jaza túrimen almastyrý múmkindigin kózdeıdi:
- jaza merziminiń keminde 1/3 bóligin ótegennen keıin;
- keltirilgen zalal tolyq ótelgen jaǵdaıda;
- ne jazany óteý tártibin qasaqana buzýshylyqtardyń bolmaýy.
Aıta keteıik, Qaırat Satybaldy ortasha aýyr qylmys jáne aýyr qylmys jasaǵan. Ol jazanyń 1/3 bóliginen astamyn ótegen. Túzeý mekemesiniń ákimshiligi sottalǵandy oń sıpattap, tárbıe is-sharalaryna belsendi qatysqany úshin kótermelegenin kórsetken. Sonymen qatar qylmyspen keltirilgen zalal tolyǵymen ótelgen. Sot úkimimen óndirip alynǵan somalar (is júrgizý shyǵyndary, májbúrli tólem) tólengen.
Sot joǵaryda aıtylǵandardyń negizinde sottalýshynyń ótinishhatyn qanaǵattandyrdy jáne bas bostandyǵynan aıyrý túrindegi jazanyń ótelmegen bóligin 3 jyl 3 aı 7 kún merzimge bas bostandyǵyn shekteýge aýystyrǵan.
Sot sheshimimen Qaırat Satybaldyǵa probasııalyq baqylaý belgilengen. Turaqty jumysy bolmaǵan jaǵdaıda sottalǵan jazany óteýdiń barlyq merzimi ishinde jyl saıyn 100 saǵattan májbúrli eńbekke tartylady.
Sot qaýlysymen oǵan mynadaı mindetter júktelgen: Sottyń qaýlysy turǵylyqty jeri boıynsha probasııa qyzmetine zańdy kúshine engen kúnnen bastap 10 kún ishinde esepke qoıý úshin kelý, sottalǵan adamnyń (probasııa qyzmetiniń) minez-qulqyn baqylaýdy júzege asyratyn ýákiletti memlekettik organdy habardar etpeı turaqty turǵylyqty jerin, jumysyn, oqýyn aýystyrmaý, basqa da mindetterdi oryndaý sottalǵandy túzeýge jáne onyń jańa qylmystyq quqyq buzýshylyqtar jasaýynyń aldyn alýǵa yqpal etedi.
Mindetterin oryndamaǵan jaǵdaıda bas bostandyǵyn shekteý, bas bostandyǵyn shekteýdiń bir kúni úshin bas bostandyǵynan aıyrýdyń bir kúni esebinen bas bostandyǵynan aıyrýmen aýystyrylatyny túsindirilgen.
Sot qaýlysy zańdy kúshine engen joq jáne shaǵym jasalýy, prokýrordyń ótinishhaty keltirilýi múmkin.
