Qurylysy qarqyndy Qosshy, berekesi mol «Rodına»

Ulttyq jobanyń bir oshaǵy

Qosshy qalasynyń jańa aýdanynda ornalasqan mektep «Bolat О́temuratov qorynyń» jeke ınvestısııasy esebinen salynyp, jergilikti bilim bóliminiń basqarýyna berilgen.

«Jaıly mektep» ulttyq jobasynyń standarttaryna saı boı kótergen bilim oshaǵynda qazirgi kezde eki aýysymmen 2 700 bala oqıdy. Mektepte 280 oryndyq akt zaly, 360 oryndyq ashana, 2 sport zaly, ınformatıka, hımııa, fızıka, bıologııa, tehnologııa jáne mýzyka kabınetteri bar.

Mektep dırektory Dıdar Asqa­r­o­vanyń aıtýynsha, oqýshylar tek bilim alyp qana qoımaı, «Birtutas tárbıe baǵdarlamasy» aıasynda sport seksııa­laryna jáne shahmat, toǵyzqumalaq, asyq atý, bı, hor, fortepıano, dombyra sekildi úıirmelerge tegin qatysa alady.

Memleket basshysy robottehnıka, mobılografııa, avtomobıl júrgizýdi vırtýaldy úırený, shet tili kabınet­terin, mektep kitaphanasyn aralap kórip, ustazdarmen jáne oqýshylarmen áńgimelesti.

– Qazaqstannyń ozyq memleketke aınalǵanyn qalasaq, osyndaı robottehnıka sııaqty baǵyttardy úırený kerek. Bul – óte qajet. Balalarymyz árqashan bilimdi bolsyn, – dedi Qasym-Jomart Toqaev.

Prezıdent ujymǵa sáttilik tilep, mektepke óziniń «Áke týraly oı-tolǵaý» kitabyn jáne Qazaqstanda shyǵarylǵan avtobýsty syıǵa tartty.

Turǵyndar sany artqan

Sonymen qatar Prezıdentke el­­­or­­daǵa irgeles ornalasqan Qosshy qala­sy­nyń ınfraqurylymdyq damý jospary tanystyryldy.

Qosshy qalasynyń ákimi Gaıdar Qasenovtiń aıtýynsha, eldi mekenge 2021 jyly oblystyq mańyzy bar qala mártebesi berilgennen keıin turǵyndar sany 110 myń adamǵa jetken.

Jalpy, qalanyń bas jospary aıasynda 1,5 mıllıon sharshy metr turǵyn úı men 45 áleýmettik nysannyń qurylysy josparlanǵan.

Keıingi eki jylda qalada úsh mektep paıdalanýǵa berildi. Taǵy bir mektep qurylysy aıaqtalýǵa jaqyn. Aldaǵy ýaqytta «Jaıly mektep» ulttyq jobasy aıasynda úsh bilim oshaǵyn, sondaı-aq eki balabaqsha salý kózdelgen. Densaýlyq saqtaý salasynda bir memlekettik emhana, memleket-jekemenshik áriptestik aıasynda eki emhana jumys isteıdi.

Qala ákimi qazirgi kezde jekemenshik ınvestısııa esebinen janynda 1000 kelýshini qabyldaıtyn emhanasy bar 300 oryndyq kópbeıindi aımaqtyq aýrýhana salynyp jatqanyn jetkizdi. Jańa aýrýhanada terapııa, onkologııa, nevrologııa jáne perzenthana bólimsheleri bolady. Medısınalyq mekeme tek Qosshy halqyna emes, jaqyn mańdaǵy aýdandardyń turǵyndaryna da qyzmet kórsetedi dep josparlanyp otyr.

Bıyl mamyr aıynda «Alan» deneshy­nyqtyrý-saýyqtyrý kesheni ashyldy. Keshende balalarǵa jáne eresekterge arnal­ǵan basseın, jattyǵý jáne sport zaldary bar.

Al Qosshy turǵyndarynyń ıgiligine kelesi jyly beriletin Qoǵamdyq mádenı-sport ortalyǵynda ınteraktıvti bilim berý bólimi, sport zaly, tennıs, basketbol, fýtbol, voleıbol alańdary, kınoteatr, kórme zaly, kitaphana, dárishana, amfıteatr ashylady.

Memleket basshysy Qosshy qalasynda qurylys jumystary qarqyn ala bastaǵa­nyn eskere otyryp, oblys ákimine eldi mekendegi ınjenerlik-kommýnaldyq ınfra­qurylymdy damytý jáne gaz quby­ryn tartý máselelerine aıryqsha mán berýdi tapsyrdy.

Otandyq ónerkásipti damytý mańyzdy

Memleket basshysy Aqmola oblysyna jumys sapary barysynda Qosshy qalasynda bıyl iske qosylǵan «IL-TOV» jaýapkershiligi shekteýli seriktestiginiń óndiris alańyn aralap kórdi.

Kásiporynda qus etin tereń óńdep, tez daıyndaýǵa bolatyn túrli taǵam shyǵarylady. Shıkizat oblystaǵy qus fabrıkalarynan jetkiziledi. Jartylaı fabrıkattar ishki naryqta ǵana satyl­maıdy, sonymen qatar Eýrazııa ekono­mıkalyq odaǵyna múshe elderge eksport­talady.

«Qazaqstan Investment Corporation» qory arqyly memlekettiń qarjylaı qoldaýyna ıe bolǵan joba 85 jergilikti turǵyndy jumyspen qamtyp otyr.

Kásiporyn dırektory Mıhaıl Sheınkman bul óndiristik keshenniń bastapqy kezeńi ekenin aıtty. Keleshekte qosymsha 10 mıllıard teńge ınvestısııa tartyp, jylyna 10–12 myń tonna ónim shyǵarý úshin ekinshi óndiris jelisin iske qosý, sondaı-aq muzdatylǵan birinshi jáne ekinshi taǵamdar óndiretin kombınat salý kózdelip otyr.

Prezıdent otandyq tamaq ónerkásibin damytý mańyzdy ekenine toqtalyp, mun­daı kásiporyndarǵa memleket tarapynan jan-jaqty qoldaý kórsetiletinin atap ótti.

Birligi jarasqan aýyl

Prezıdenttiń óńirdegi jumys sapary Selınograd aýdanyndaǵy «Rodına» aýylynda jalǵasty. Munda Qasym-Jomart Toqaev aýyldaǵy Mádenıet úıin aralady.

Jalpy aýdany 1563 sharshy metrdi quraıtyn nysanda horegrafııa jáne sport zaldary, dybys jazý stýdııasy men úıirmelerge arnalǵan kabınetter bar. Mádenıet mekemesiniń janynan túrli shyǵarmashylyq ujym qurylǵan. Sonymen qatar birneshe sport úıirmesi jumys isteıdi. Olarǵa 400-den astam aýyl turǵyny qatysady.

Prezıdentke «Rodına» agrofırma­synyń bas dırektory Ivan Saýer serik­testiktiń aýylda iske asyryp jat­qan áleýmettik jobalaryn tanystyr­dy. Byl­tyr bıznestiń áleýmettik jaýap­kershiligi aıasynda kompanııa Rodına aýylynyń ıgiligine 791 mıllıon teńge qarjy bólgen.

Memleket basshysy Mádenıet úıi ónerpazdarynyń «Dostyq shýaǵy» kompozısııasyn tamashalap, aýyl turǵyndarymen júzdesti.

– Sizdermen kezdeskenime qýanysh­tymyn. Aýylǵa arnaıy keldim. Qur­metti Ivan Adamovıch Saýerdiń sharýashy­lyǵy jaıynda buǵan deıin kóp estigen bolatynmyn. Biraq munda kelip, aýyldyń tynys-tirshiligimen tanysýdyń reti bolmaı júr edi. Bul – óte úlken ári barlyq kórsetkish boıynsha úzdik sharýashylyq. Barshańyzǵa baq-bereke tileımin, – dedi Qasym-Jomart Toqaev.

Sonymen qatar Prezıdent Rodı­na aýylynyń «Nasha rodına» sýpermar­ketin, «Dostyq» saıabaǵy men jalpy orta bilim beretin mektebin aralap kórdi.

Jumysy jemisti agrofırma

«Rodına» agrofırmasynyń óndiristik nysandarymen tanysqan Memleket basshysy agroqurylymnyń №1 sa­ýyn sehy men sút zaýytyna da bardy. Munda «GEA» fırmasynyń «Elochka» qondyrǵysy ornatylǵan. Atalǵan quryl­ǵynyń kómegimen bir mezgilde 32 sıyrdy qatar saýýǵa múmkindik bar.

Qasym-Jomart Toqaevqa «Rodına» agrofırmasynyń bas dırektory Ivan Saýer seriktestiktiń sút baǵytyn damytý jospary týraly baıandady. So­nymen qatar jańa saýyn sehy salynyp jatqanyn jetkizdi.

Budan soń Prezıdent Rodına aýy­lyn­daǵy sút zaýytyn aralap kórdi. Mem­leket basshysyna ındýstrııalandyrý baǵ­darlamasy aıasynda iske qosylǵan nysan­daǵy óndiristik prosess tanystyryldy.

Zamanaýı qondyrǵylarmen jabdyq­talǵan ári ozyq eýropalyq tehnologııamen jumys isteıtin kásiporyn táýligine 50 tonna sút óndiredi. Sonymen qatar sút ónimderiniń birneshe túrin shyǵarady. Qazir munda 36 adam eńbek etedi.

Prezıdent zaýyt jumysshylarymen áńgimelesip, «Rodına» agrofırmasynyń úlgili sharýashylyq ekenin aıtyp, júıe­li jumysty odan ári jalǵastyra berýge shaqyrdy.

Jalpy, Aqmola oblysynda sút ónim­­derin shyǵaratyn 15 kásiporyn bar. So­nymen qatar óńirde 7 taýarly sút fermasy salynyp jatyr. Osy baǵyttaǵy jobalardy qarjylandyrýǵa 13,3 mıllıard teńge bólingen.