Joba aıasynda zańnamany jetildirý jáne óńirlerdi ornyqty damytý jónindegi praktıkalyq sheshimder men usynystar toptamasy qarastyryldy. Saraptamalyq zertteýlerdi talqylaýǵa Parlament Senatynyń tóraǵasy Máýlen Áshimbaev, halyqaralyq uıymdardyń Qazaqstandaǵy ókildikteriniń basshylary jáne zertteý ınstıtýttarynyń sarapshylary qatysty.
Máýlen Áshimbaev Senattyń Qoǵamdyq Jobalyq keńsesi men Maqsut Narikbayev University birlesip iske asyrǵan Akselerator biregeı bastama ekenin jáne ol eldiń ornyqty damýyna qatysty jańa ıdeıalar men naqty usynystar ázirleýdi kózdeıtinin aıtty. Bul baǵyttaǵy jumystarǵa Memleket basshysy da basa mán berip otyr.
«Prezıdent Qasym-Jomart Toqaev shildeniń aıaǵynda Qazaqstannyń 2029 jylǵa deıingi ulttyq damý josparyn bekitti. Atalǵan qujatta aıqyndalǵan tásilder negizinen ulttyq jáne óńirlik deńgeıde Ornyqty damý maqsattaryna qol jetkizýdi jedeldetýge arnalǵan. Bul rette Akselerator Ornyqty damý maqsattaryna túrli baǵytta qol jetkizýdiń tıimdi tetigi ekenin atap ótken jón», dedi Palata spıkeri.
Kópshilikke tanystyrylǵan «SDG IMPACT REPORT 2024» jarııa esebi – Akseleratordyń 100 kúnge jalǵasqan jumysynyń naqty nátıjesi. Esepte zańnamany jetildirý boıynsha usynystar jáne Aqmola oblysynda iske asyrylǵan qanatqaqty jobalar men bastamalar jóninde jobalyq qujattama qamtylǵan. Atap aıtqanda, zertteý toptary densaýlyq saqtaý, bilim, ekonomıkalyq ósý, qalalardyń turaqty damýy jáne taǵy basqa salalarda syn-qater týdyrýy múmkin jaǵdaılardy taldady. Jarııalanǵan esep usynylǵan bastamalardy Ornyqty damý salasyndaǵy ulttyq maqsattar men mindetterdiń iske asyrylýyna monıtorıng júrgizý jónindegi Parlamenttik komıssııamen birlesip júzege asyrý barysynda da aıryqsha mánge ıe.
Sondaı-aq Máýlen Áshimbaev qoǵamdyq ınstıtýttardaǵy sarapshylardy ornyqty damý kún tártibin iske asyrýǵa jumyldyrý asa mańyzdy ekenin jáne bul bastamaǵa Taldaý mektebi men Sarapshylar klýby sııaqty Senat janyndaǵy jobalardyń túlekteri de qatysqanyn atap ótti.
«Aldymen Ornyqty damý maqsattarynyń óńirlik deńgeıde iske asyrylýy óte mańyzdy. Akselerator jumysynyń aıaqtalýyna qaramastan, oblys ákimdigin jáne komanda múshelerin jobalardyń iske asyrylý tıimdiligine júıeli túrde monıtorıng júrgizip turýǵa shaqyramyn. Is-sharanyń qorytyndysy boıynsha qajet bolǵan jaǵdaıda tıisti ózgerister engizemiz nemese jańa zańdar ázirleımiz. Mundaı joba elimizdiń basqa óńirlerinde de kóptegen ıdeıa aýqymyn keńeıtýge múmkindik beredi. Senat aldaǵy kezeńde de syndarly bastamalarǵa júıeli qoldaý kórsetýge daıyn», dep Máýlen Áshimbaev jobaǵa qatysýshylarǵa, volonter-zertteýshilerge jáne sarapshylarǵa alǵys bildirdi.
Is-sharaǵa Prezıdenttiń ǵylym jáne ınnovasııa máseleleri jónindegi keńesshisi Kúnsulý Zakarııa, Aqmola oblysynyń basshylyǵy, BUU-nyń Qazaqstandaǵy Turaqty úılestirýshisi Mıkaela Frıberg-Storı, Qazaqstandaǵy BUU Damý baǵdarlamasynyń Turaqty ókili Katarjına Vavernıa, Parlament depýtattary jáne taǵy basqa sarapshylar qatysty.
