Aldııarhannyń bala kezdegi armany – kaskader bolý. Sol ónerimen shytyrman kınolarǵa túsip, kórermenniń kózaıymyna aınalǵysy keldi. Kishkentaıynan soǵan beıim boldy da. Sportpen shuǵyldandy. Áli de sportty serik etip keledi.
Mektepte oqý ozaty boldy. Shyǵarmashylyq keshterge belsene qatysty. Mektebiniń maqtanyshyna aınaldy. Akter bolamyn degen armanynan ata-anasy alystatpaıdy, jol ashady. Sóıtip, Qaraǵandy qalasyndaǵy Táttimbet atyndaǵy óner kolledjine oqýǵa túsip, 2020 jyly drama teatrynyń ártisi mamandyǵy boıynsha bilim alyp shyǵady.
Joǵary oqý ornyna túsip, bilimin jetildirgisi keledi. Qalada qalyp, bala armanyn oryndaǵysy da keledi. Biraq Aldııarhan ekeýinen de bas tartady. О́ıtkeni qara shańyraqta qalǵan ata-anasyna qamqorlyq kerek ekenin túsinedi. Onymen qosa janyna qaladan góri dala jaqyn ekenin sezinedi. Ábden barlyǵyn oı eleginen ótkizgen ol bar alǵan bilimin aýyl balalarynyń boıyna darytaıyn, ónerge degen mahabbatyn oıataıyn dep sheshedi.
Osylaısha mamandyǵy boıynsha Qarqaraly aýdanyndaǵy balalar óner mektebiniń Appaz aýlyndaǵy fılıalynda teatr óner synybyna jetekshi bolyp, jumysyna kirisedi.
Aýyl balalaryn jınap, talanttaryn ashady. Alǵashqyda synybyna 15 bala kelipti. Aýyldan teatr ashylǵany úlken jańalyq bolyp, balasyn jetektep kelgender kóbeıedi. Sóıtip, az ýaqyt ishinde balalardy sahnaǵa shyǵarady.
Aldııarhan «Jas fund» jobasy arqyly eki márte 300 myń teńgeden qarjy alady. Oǵan teatrǵa qajetti jabdyqtar satyp alady.
Alǵash KSRO halyq ártisi Qalıbek Qýanyshbaevtyń 130 jyldyǵyna arnalǵan aýdandyq «Sholpan» teatrlyq qoıylym saıysynda Appaz balalar teatry bas júldeni ıelenedi. Onda «Jýsan ıisi» qoıylymyn sátti oryndap shyqqan. Keler jyly taǵy da «Ańdar álemi – baýyrsaq» atty orys halqynyń ertegisin jańasha sıpatta alyp shyqqany úshin bas báıgeni oljalady. Sol joly «Úzdik qyz bala» atalymyn jeńip alǵan shákirti Sánim Rymbaı bolsa bolashaǵynan kóp úmit kúttiredi.
– Meniń bala kezdegi armanym – teatr ártisi bolý. Biraq bul armanym mektep bitirgennen keıin ǵana oryndalady dep oıladym. Sodan aýylǵa Aldııarhan muǵalim kelip, teatr ashty degendi estip qatty qýandym. Armanym oryndala bastaǵany tańǵaldyrdy. Aldııarhan aǵaı barlyǵyn keremet túsindiredi. Rólge qalaı kirip, somdaý kerektigin úıretedi. «Ańdar álemi – baýyrsaq» ertegisinde túlkiniń rólin somdadym. Barynsha aılaker, qý bolý kerek. Eptep qıyn boldy. Biraq jetekshimizdiń eńbeginiń arqasynda jeńil oınap shyqtym. Sol rólim úshin atalym jeńimpazy atandym. Men úshin úlken jetistik boldy. Ata-anam da, aýyldaǵylar da, bári-bári jetekshimizge rıza. Qanshama balanyń armanyna qanat bitirdi. Biz janashyr jetekshimizdi maqtan tutamyz, – deıdi jas ártis Sánim Rymbaı.
Bul teatr jetekshisiniń aýyl arasyndaǵy ǵana jetistigi eken demeńiz. Byltyr jas teatr Memlekettik qosymsha bilim berý salasyndaǵy balalar shyǵarmashylyǵyna arnalǵan respýblıkalyq «Burabay fest» jazdyq oıyn-saýyq jobasynan bas júlde alyp kelip, aýyldy máre-sáre qyldy.
Munymen qosa, Appaz aýlynyń jas akterleri elordadaǵy M.О́temisov atyndaǵy Oqýshylar saraıynda ótken «Alash Star» halyqaralyq baıqaýynda Saıyn Muratbekovtiń «Jýsan ıisi» dramasy men «Arman álemi» ertegisin zamanaýı úlgide usynyp, Gran-prı men I oryn ıelenip qaıtty. Túrkııada ótetin festıvalǵa joldama aldy.
Jas teatr úsh-aq jyldyń ishinde osyndaı jetistikterge qol jetkizip jatyr. Árıne, ol jumysyna úlken mahabbatpen kirisken Aldııarhannyń arqasy.
Jas jetekshiniń jetistikteri eleýsiz emes. Eńbegin eskergen aýyl ákimi teatr ashqan jyly «Appaz jyl úzdigi» syılyǵyn tabystapty.
– Aldııarhan aýylǵa kelgende qatty qýanǵandardyń biri ózim. Bala kezinen elgezek ekenin bilemiz. Teatr ashamyn degende tipti qýandym. Qazir shákirtteri baıqaýǵa barsa, júldesiz qaıtpaıdy. Aýyldyń atyn shyǵaryp júrgen talantty jastary bar, biz baqyttymyz, – deıdi aýyl ákimi Jolaman Tilemisov.
Qarqaraly aýdanynyń ákimdigi «Úzdik jas mádenıet qyzmetkeri» degen syılyqpen de marapattapty. Jalǵyz Appazdyń ǵana emes, Qarqaralynyń ónerin ulyqtap júrgen ulǵa ábden laıyq qurmet.
Aldııarhan da aýlynyń ymyra-birligine rıza. Aýyl turǵyndary «Bolamyn degen balanyń betin qaqpaı belin býdy». Qushaq jaıa qarsy alyp, qoldaý kórsetti. Ár sharýasyna demeýshilik bildiredi.
«Kindik qan tamǵan jerge mańdaı ter de tamý kerek. Bizdiń shaǵyn teatrymyzdan erteń úlken sańlaqtar shyǵady. Solardyń sol bıikke jetkeni – meniń de armanym oryndalǵany», deıdi teatrdyń janashyr jetekshisi.
Qaraǵandy oblysy,
Qarqaraly aýdany,
Appaz aýyly
