Osy baǵytta halyqaralyq «Qazaq tili qoǵamynyń» Astana qalasy boıynsha fılıaly talaı tartymdy iske bastamashyl bolyp, mańyzdy jobalardy júzege asyrdy.
Memlekettik tildiń mártebesin bıiktetýge yntaly til janashyrlarynyń basyn qosqan irgeli uıym qazaq mádenıeti men ulttyq qundylyqtaryn nasıhattaý, tildi qoldaný men ony úıretýde jańa tehnologııalyq ádisterdi paıdalaný baǵyttaryna nazar salady. Máselen, sońǵy jyldary kópshilik qoldaýyna ıe bolǵan Astana, Qostanaı, Atyraýda atqarylǵan «Kórneki» jobasy men shekara syrtynda tanyla bastaǵan «Tildes.kz» qazaqsha sóılecý klýbyn erekshe atap ótý qajet.
«Kórneki» jobasynyń maqsaty – elimizdegi tutynýshylardyń qazaq tilinde qyzmet alý quqyǵyn qorǵaý úshin jergilikti qoǵamdyq oryndardaǵy kórneki aqparattyń sapasy men sanyn jetildirý. Ilkimdi bastama kásipkerlik nysandardyń tilge qatysty zańnamany qatań saqtaýyna yqpal etip otyr. Máselen, byltyrdyń ózinde joba aıasynda Til týraly Zańnyń 21 babyna baǵyttalǵan arnaıy nusqaýlyqtar arqyly bilimin arttyrǵan eriktiler Astana qalasyndaǵy 3 myńnan asa nysanǵa monıtorıng júrgizgen.
Al, talaıdy «men endi qazaqsha sóıleýden qysylmaımyn, kúndelikti qajettiligimdi qazaqsha surap, qazaqsha aıtamyn» degizip otyrǵan «Tildes.kz» spıkıng klýbynyń jóni tipten bólek. Bul jobany til janashyrlary 2022 jyly ashqan.
Halyqaralyq «Qazaq tili qoǵamynyń» Astana qalasy boıynsha fılıaly oılap tapqan kelesi úzdik joba – «Tátti ertegi» jobasy. Maqsat 6 jasqa deıingi balalarǵa qazaq tilinde sapaly ertegilerdi tyńdatý arqyly til úıretý. Bastama «Táp-tátti» kondıterlik jelisimen birlese iske asqan. Bir ýaqytta 8 jerde uıymdastyrylyp, 80-ge jýyq bala ertegi tyńdap, ulttyq qundylyq dáripteldi.
Taǵy bir tyń tól týyndy – «Qazaq_camp» balalarǵa arnalǵan til úıretý lageri. «Ata-analardy pedagogıkalyq qoldaý ortalyǵy qyzmetiniń tujyrymdamalyq tásilderin bekitý týraly» Oqý-aǵartý mınıstriniń 2024 jylǵy 5 aqpandaǵy №55 buıryǵyn iske asyrý maqsatynda ata-analarmen birge jazǵy lager uıymdastyryldy. Onda 6 jastan 14 jasqa deıingi balalarǵa qazaq tilin «Tildes.bala» qazaqsha sóılesý klýby arqyly qyzyqty ádistememen úıretip, birneshe bala tegin lagermen qamtamasyz etildi. Taıaýda bastama «Eń úzdik etno lager» statýsyna ıe boldy.
Bul joǵaryda atalǵan jobalardyń jetekshisi – halyqaralyq «Qazaq tili qoǵamynyń» Astana qalasy boıynsha fılıal tóraǵasy, pedagog, jýrnalıst Larısa Aldabergen. Qoǵam belsendisi 2018 jyly fılıalda jaýapty hatshy, 2020 jyly tóraǵa orynbasary, keıin 2023 jyldan bastap jetekshilik laýazymdy atqaryp keledi.
Búginde «Qazaq tili» qoǵamynyń Jarǵysyna, fılıaldarynyń erejesine sáıkes Fılıal keńesi de belsendi qyzmet etip otyr. Til janashyrlary sapynda Nazarbaev ýnıversıteti, EUÝ, Turan syndy birqatar JOO professor, dosentteri ózge de Astanadaǵy bilim salasynyń bilikti pedagogtary, qoǵam belsendileri jáne belgili kásipkerler bar.
