Senattyń qoldaýymen Qazaqstan shahmat federasııasynyń uıymdastyrýymen alǵash ret ótkizilip otyrǵan saıysqa oblystar men respýblıkalyq mańyzy bar qalalardyń máslıhat depýtattary, oblystyq jáne qalalyq qoǵamdyq keńesterdiń músheleri, sondaı-aq BAQ ókilderi qatysyp jatyr.
Almatyda ótken sońǵy jartylaı fınaldyq básekede «Shyǵys» óńirindegi 100-den astam áýesqoı shahmatshy baq synady. Olar – Almaty qalasy men Shyǵys Qazaqstan, Abaı, Almaty jáne Jetisý oblystarynda uıymdastyrylǵan irikteý kezeńderiniń jeńimpazdary. Jartylaı fınal saıysynyń ashylý rásimine qalalyq máslıhattyń tóraǵasy Meıirjan Otynshıev jáne Qazaqstan shahmat federasııasynyń ókilderi qatysty.
17 tamyz kúni 9 týrdan turǵan rapıd jarysynda «Shyǵys» óńirinen Senat Open fınalyna joldama alǵan 25 shahmatshy belgili boldy. Jarys sońynda depýtattar, jýrnalıster, qoǵam belsendileri, áıelder jáne 60 jastan asqandar arasynda úzdikter anyqtalyp, arnaıy sertıfıkattarmen marapattaldy.
Saıystyń fınaldyq básekesi tamyzdyń sońynda Astana qalasynda ótedi. Sheshýshi synda 200-ge jýyq áýesqoı shahmatshy ózara myqtyny anyqtaıdy. Olardyń qatarynda Parlament depýtattary men respýblıkalyq BAQ-tyń jýrnalısteri de bar.
